Kawlzang Khuano Khangno Kipawlna (4K) min tawh a na phuatkhiat uh, Green Kenedy Group (GKG) ci uh a, tua min tawh July 20, 2012 ni-in Thangmual dungah singno suan dingin kuankhia uh hi.

July 21, 2012 ni-in,  Dyna motor khat leh motor cycle thum tawh mi 35 kuan to a, Tai 9 panin Singno kipua hi. Taingen khuakhung, Middle School huangah Phuitong kung, Khadawmi leh singkung hoih pawlkhat suan kipan to pah hi. Tua panin Muhum acihna uh, Akluai gam lamdung mualtungah zong kisuan to hi. Tua ni pen guah zu ngekngek den hi ta
leh ahithei bang danin kisem veve hi.

Akluai hausa pa, Pa Dalpi te' inn dintunna-in kizang hi. Akluai khuate in zindo leh a kisambangin tavuan na la uh a, Kawlpi pan a puak toh uh, Vok golpi, tuk nga val khat zong go uh a, akluai khuate in a bawl tavuan hong laksak uh hi. Zong ciangin zin leh leng teng tawh nekkhop ding geelna ahi hi.

July 21, 2012 (saturday) ni-in, khuakim-khuapam panin hausa leh sang siate' makaihna tawh sangnaupang hong pai ciat uh hi. Tua khuate in: Suangpi, Dimpi, Zung, Phunom, Dimzang, Thangnuai, Sozang, Akluai leh Laibung ahi uh hi. Mimal 300 val pai uh hi. Hi vai-ah sumbei pen mun tuamtuam pan a mipihte’ panpihna hi, ci uh hi. Thu-le-la te zong
tungsiah lampan thapiakna leh panpihna tawh mapankhopna hi, ci uh a, Akluai khua-lai, laippi tungah Signboard nam li suang uh hi.

Bullam thunei lampanin Tai 9 Forestry pan mangpi khat, Tedim Township Forestry pan Bo.Kimlai, Sang lampan Sia Sum leh a dang pawlkhat hong pai uh a, thugenna tomno nei uh hi. Tuabanah hih hun mah tawh a zangkhawm ding leh thapia ngiat dingin Kawlpi, Nitha Phungzi mangpa hong pai to a, a sawl tangzang ahi, Journalist te mi 4 leh sia Lian
Tuang tawh hong ton to uh hi.

(Amauteng pen Tedim ah pai suak uh a, hun manphatak mahin ka zang thei uh, cih hong gen hi. Tedim ah Pa Suan Pau’ singno huan Ecre 500 pen tha ngah mahmah uh a, mai lamah a kiciantak a et phat ding lunggulhna nei lai uh cih thu kiza hi. Annek pih nuam a tuamtuam om hi ta leh hunin cin zo lo ci uh hi. Zanin Kawlpi hong ciah kik ta uh hi).

Nitha Phungzi pa in Singkung a thupitna, singno suan a puah leh zuun ding a thupitna leh i gam i lei pen amasa pen ei mahmah in it leh puah a i zuun ding a kulnate leh nungzuih a kulna cihte hong gen a, hi kasa mahmah ciat hi. Khual-le-tual pan hong pai mipi khempeuh voksa tawh sun-an kivaak hi.

Tutung a singno a kisuan pen kung 1800 in kiciamteh a, a zawdiakin, Phuitong, Khadawmi hi a, a dang pawlkhat zong kisuan hi. Phungzi pa mahmahin guahzu meikai leh vot tampi omna lakah hong suanpih ngiat hi. Nitaklam lamin Kawlpi kizuan a, Topa'n cidamin innciat hong tunpih hi.

Hihbang nasepna thupi sa lua ka hih manin makaite' hong zotna bangin a zui to ka hi a, tha ka ngah mahmah hi. Maan ka zaihkhak tawmlai kong khak hi. A kisam lai a om leh amau khuano group lampanin ahizongin hong behlap le uh ci hang. Makaite' apna tawh zomi group pite-ah kiallap a hong khakkhiatsak hi ing. Ka lungdam leh angtang in, cih ka
gennuam hi. Topa' thuha!!!

Thupuak,

Peter Khampu

 

Views: 184

Comment

You need to be a member of Zomi Community Network - Your Network to add comments!

Join Zomi Community Network - Your Network

© 2024   Created by Zomi Community Network.   Powered by

Badges  |  Report an Issue  |  Terms of Service