Hong nusia, Pa Thang Mung (Sozang) Zi leh Tate' maan

[Zomi Center]

Tutung Akluai paina tawh kizomin i mipihte veina leh lainatna tawh Sozang ah ka baang vat uh a, hong nuisia, Pa Thang Mung' zi leh tanoteng 3 maan kong la uh a, mipi in i mitkha ah i bawltheihna ding leh a laina tuamdiak, a panpih zo i om leh zong cih deihsakna kawm tawh a maan uh kong khak hi.

Amau nuta teng pen innsap a hih kawmkal uh ah a pa' nungsangah a omna vuah om nawn lo uh a, Thang Mung' naupa, Pastor Khai Pum te'n om uh hi. Thungetna neihsak ding ka kipat laitakin a taneu pen ka mukha a, kha bangzah pha hiam, ci-in ka dot leh kha giat bek phapan cih a zi in hong gen teh ka nehno sa suakin ka khitui hong muangtuang mawk hi. Sanggam nu lah hong nehno leuleu teh ka kim a ka lawmte zong a na lawhdan ka hih tuak hi. Maiphiat samsam pongin tua pan Topa' tung ka kiko uh hi.  Pa Thang Mung' zi (amin ka dot hi ta leh ka ciapteh na pua pak kha lo) pen kum 22 pha pan hi. A ta u pen tan nih, tan lang leh a neu pen kha giat pha pan hi.

(thudang khatah hih sihna tawh kisai-in ih Zomi weely journal te ahi a, net sung pawlkhat ah ahizongin a kisuahsakna a telkhial om leng kilawm kasa hi. Pa Thang Mung pen Sozang hausa pa hi lo hi. Sozang hausa pa pen Pa Khual, mi tampite in pu Khual a cih pen uh ahi hi, cih khensiam le'ng ci ing).

THU KHAT-AH:

Pa Thang Mung' zi leh tate ading Sum-le--pai tawh ahuh nuam i om a, contact nading kician a thei lo te in keima tungtawnin hong kizom thei hi uh teh, cih kong theisak nuam hi.  Tunungin net sung khat-ah panpihna a nei nuamte' adingin koi-ah bang cih kizop ding cih khat ka mu ngei tawh kibang ahih manin hong zasak ka hi hi.

Peter Khampu