Namdang pasal nei zawding maw? Zomi pasal nei zaw ding 2.

[naalianzomi]

Zolia te tung kong gennop ah! kei pen- ka omna Denmark hi in, Denmark ah pen- pau leh lai pen- manglai hilo in, amaulai Dansk lai leh pau ka sin kha uh hi.
Tua pau leh lai ka sin na uh ah- adiakdiak in Asia pan in hih ko omna Danisk pasal nei tampi tak om aa- tua te in kei kiang bang hong ci uh hiam cih leh- na lawmna gual te- numei pasal gamdang zi/pasal neihloh ding han thawn in ong ci zaw uh hi.amau zong ki siik uh a hih man aa hi bang ong gen a hihi.a thu a cingin gen leng tam lua ding a hih man in- a ki siik na uh ong at nawn keining.

1.Mangkang( mikang) te tawh ki teng lehang!
2. Asia mi limlim tawh ki teng le hangh!
3. Kawlgam mi tawh ki teng le hang!
4. Zomi mahtawh ki teng le hang!
5. Khuapih tuipih mah tawh ki teng lehang!

Anuai ah hih a tung aa number 5 teng kei muhdan ong at nuam ingh.

1.Mikang te tawh kiteng le hang pen- mangkang te pen-atam zaw in sumnei mah.ahih hang-in,hau lua cih omlo uh hi.Mikang te pen- ki ngaih ding a ol(manlang) mahbang in ki khending zong ol( manlang) sak mahmah uh hi. nupa ih cih pen- khantawn dingmah aa ki tel ahih man in, tua bang ziauziau aa ki khen ding a tangzan ngaihsut te na ngai ngam veve diam? mikangte pen- zahmawh thu gen in, Sex lam maizum ngaihsut lo a hih man in Zotg te sangsiam zaw mah in teh! ahi zong Sex pen- nupa khat aa ding in apha mawh/omloh pha mawh a hita zong in tua sa'ng in Itna( abeitheilo) ih neih ding kisam zaw ding hi.( bangbang zi/pasal ih neizong in, Pasian thu tawh nungta mi ahih ding thupi penpen sa ingh.)

2. Asia mi limlim pen- ih dan kibang zawdeuh in, Pasian thu um khat a hih hamtang ding kisam penpen sa ingh. Pasian thu umlo, milim bia ahih aa nang biakna Ih Biak ih Pasian na upsak zawh sawm nak leh tuazong pen sia lua lo in mu ingh.

3.Kawlgam mi limlim zi/pasal ih neih dingpen thupi hi. ih gam ih lei ih minam ih puah nop ciang in, nupa sung ah- ngaihsut ki bang ongtam zaw deuh pah ding aa- nupa ki kal thu ki nialna ong tawm zaw deuh pah ding hi.

4.Zomi tektek mah pasal/zi aa neih ding pen 100% pen- tha ong pia ingh. hihthu tawh kisai at ding hi leng tamlua.

5. Khuapih tuipih mah hi leh zong thu pi kaan lai. na behna phung, na pawlpi, na innkuan sung ong tel pih mahmah zi nei pasal nei le teh! tua kaan aa anuam bang om nawn ding a hi hiam?

Gamdang tungsa Zolia te'n- gamdang ah Zotg tam mahmah aa namdang tangpal ong ngeihsut sansawm lai mawk ding maw?
Zotg te zong Zolia a ki ci'n loh man aa namdang lia pal aneikha bek ong hi ding aa- Zolia mah deih masa veve ding in ka um hi.

Mangkang zi/pasal nei leteh- nidang teh- nata  te in- ka Nu or ka Pa Zomi aci ngam diam?
Asia mi limlim zi/pasal in nei le teh Kawlgam pen- ka Nu or ka Pa gam a ci ngam diam?
Kawlgam mi limlim zi/pasal nei le teh- Zogam pen ka Nu ka Pa gam a ci ngam uh diam?
Zomi tektek zi/pasal nei le teh- na khua na tui pen  na ta ten- ka khua uh cih nangma pianna khua agen khia ngam diam?
Khuapih tuipih tektek zi/pasal in nei le teh! nupa kikal/ minam lungsim ki khenna om nawnlo ding aa- thu ki nial ong tawm pen ding hi.

Zomtoto lai ni ei. comment tungtawng khawng in maw.

https://www.youtube.com/watch?v=TIXwfye49Ug

[mannuam]

Tha ngah peuh mah ing ei .lung dam ei .tua dan in lai hong at zel o .

[mannuam]

Ka ngaih sut sut kik ciang kong dot nop khat om kik leu leu heh pih na tawh Nam bat 5 na a na gen pen a ki cian zaw in hun na ngah te hong gen khia kik lai ve. Ka ki thei pih te khat un ki beh len ki nai lua,khua ki bang ci khawng pen lung kim lo na tam ci kawi kawi.Pawl khat in lah i lawm ngaih te tawh i beh ,i inn kuan sung ki tam thei lo ding tua dan hi leh hoih zo ci .bang dan in na ngaih sut aa ??

[David Lian]

Pauno in zong "Zomite hai lua sa ing, Zomi ka hi." na ci sam hi ven... hai heihawi mai taleh minam leh behlephung thu ah Zomi mah thupi hi. Nam dang vive tawh kiteng leng, kua in ih gam ong itpih lo dinga, kua in ih gam ong zuun pih lo ding hi. ngaihsut dingin, itna sum le pai cih pen Zomite khialhna lian khat ahih lam tampi takin ki tuak khin tek hi.

Zomi Upa, laithei te sungpan "Namdang zi anei lakah kei anunung pen ong hisak un" a ci pen khat bek aom phial ding ahizongin, meet(phattuam pih) akisa pen adang te sung zong ah omin um tuan keng.

Tua ahih manin kei bangbel tu dong ka tangval na hang pennn Zomi mah aci se ka ve... Lawm Sianpu na heh ken maw... kisuantak pah ding hi kei e..

Namdang zi leh pasal neih pen a hoihna a om ding hang, hun paisa sungteng ih et teh neikei le uh bnag i ci diam cih ding pen om kiukiu hi...

Tg khattang hei in lia na bazal zu nong leh ding haibang ngaklah tang...

[naalianzomi]

Sanggamnu, Mannuam- in ong dotkikna tawhkisai- dotna:5 pen- EU.US,Canada,Austilia, -etc: te ah eimi te tampitak ki omta aa- veng leh pam mah ki ngaiveve hi lo hiam?
Innlam tawh ki ho leng ih khuapih te kua teng tawh ki nai na hi hiam cih ih ki dot tangtang pen- ih Zomi ngeina hi aa- Mannuam in a cih- alawmte acih pen khua kibang, beh kibang te ki ten hoihlo acih pen- keimuh na ah tua te theihloh kal aa gamta simnuam zaw hi lo ding hiam ci ingh.( ahi zong kei zongh. ka mailam ding thei nai keng) ih thulu leh ahoih pen ding cih ih genna hi. Pasian kiang thu ngen ni maw guai.. :D

[Taang Sianpu]

Guaite aw hih thu pen i kikup theih liai liai hoih kasa hi. Hih dan pen kikup luat ding hi a, khat leh khat muhna leh i tuah thute ki nialbawl lozaw in kikup, holim thei ihih man in thupi kasa hi. Mailam ah tu a i kikupnate tungpan in thu leh la hoih tampi hong piang ding in lamen ingh.

Zi leh Ta vai ah kei bang lian bel ka muhna kician leh singsinsen bilbel in kei leh kei "confident" nei kisa leh, "ka it mi ding khat ka teel a, ka teel khat pen ka it hi." Khangthak khangmoilaite tangval, nungakte zong a tua ci ding in kong lamen hi. Tua ding mah in zong i hanciam ding thupi hi. Tua tawh kisai in kei zong nam dang zi neih, namdang pasal neih cih vai ahi zong in, nam ki bat pih veve kua, koi, bang ci zon ding cih ahi zong in i lawm ngah ding bang ci zong ding cihte pen khangthak te ka veina leh, ka genpihnop mahmah thu khat hi bilbel hi.

I sanggam "It Zomi" in a laigelhna sung ah keima min hong "quote" ahih man in angtang in, kalungdam a dam mahmah hi. Mailam ah zong tu a dan mah in a thu thuk zaw tektek kikup tohtoh lai ding ka lunggulh mahmah hi.

Lawm itna vai ah i kikuph ding ciang in i theih ding leh a kikup dan ding khawk khena dan pawl khat hong nei masa phot ningh.

I. Zomi Tangval lai, Nungak lai lawm ngaih nei nailo, a zong laitak te a ding

II. Zomi tangval lai, nungak lai Zomi lawm ngaih a nei laitak te a ding

III. Zomi tang vai lai, nungak lai namdang lawm ngaih a neite a ding

IV. Zomi tang val nawnlo ahih kei leh (engaged/ married) pasal nam dang zi nei te a ding

V. Zomi nungak nawnlo pasal nei (engaged/ married) nupi namdang pasal nei te a ding

VI. A dang thu tuamtuam...


A tamzaw internet hi ta leh mun tuamtuam ah hih vai tawh kisai kikupnate lak ah thulu (topic) tuamtuam pen khat in gawm khawm den kha ihih man in siang sinsen in ki tel theih lo ban ah lungkim tak in kikupna zong om thei phalo ahih man in a lomlom in kheng in kikum leng a lem zawk ding deihna tawh a tung a dan in hong khil bawl ingh.

A tung a thute tawh kisai in a gen tatak ding ci leng bel sau mahmah ding a, ahi zong in tawmtawm in khen khat khit khen khat kikum toto ni. Hehpihna tawh hong simsak unla, kikup nopte thudam in kikum khawm toto lai ni. Hih thulu hong hong masa Naalian a kipan, hih lai a sim sak sanggam a kuamah peuh leh, hih thu kikupna ah a kihel khempeuh tung ah lungdam kong ko nuam hi. A tam zaw kan lai in nong kuppih lai na ding in zong kong thum to nuam lai hi.

[Taang Sianpu]

Na pum phellang khat bang ci zon ding...

Lai siangtho sung ah nih kigawm caing khat ci pan ahih man in khat bek pen mi picing in kisim zo tak nailo cihna zonghi pian mai a mi picing leh, mi' muan leh suan i hih theih na ding in minam i makaih ma in innkuan a makaih thei ding ciang, a makaih zociang ihih masak phot ding kisam hi. Tua ahih man in mihing khat guak om ding hoihlo a, i phellang khat i muh hunhun leh hun lem hunhun in pumkhat i suah ding pen Lai Siangtho i deihna ahi hi.

I. Zomi Tangval lai, Nungak lai lawm ngaih nei nailo, a zong laitak te a ding
-Zomi tangval lai, nungaklai lawmngaih nei nailote a ding in i pumpi phellang ding pen a thupi mahmah ahi hi. I khantawn a ding ahih man in teel khial leng kum khat kum nih sim in laih ziauziau theih vanzat dan hilo ahih man in innkuan nuam suah haksa mahmah ding hi. Tua ahih man in i angkawi (zi), i angpom (pasal) ding pen bang ci zon ding ihi hiam?

A. Zi leh Pasal hoih, kician khat i neih theih na ding in lawm ngaih hoih, lawm ngaih kician khat i neih masak phot kul hi.
Lawm ngaih kician khat ineih hang in zi/ pasal ding zong hi khin lo thei hi. I ki itpih khempeuh i zi leh i pasal hi khinlo hi. Lawm ngaih masak tawh akiteng tampi mah om a, ahih hang in lawm ngaih khat sang a tamzaw a nei ngei tam zaw lai ding hi. Lawm ngaih kicianlo, hoihlo na neih masak khak leh tua tawh kiteng kha zenzen, kiten na ding hong om zenzen leh khantawn kisikna hi ding ahih man in zi leh pasal ding vai ah lawmngaih kician n eih masak ding thupi mahmah hi. Nu leh pa hong deihsak (arrange marriage) pen i san siam leh bel a thutuam ci ni. Tu hun ciang zong nidang lai dan in nu leh pa' deihsak khempeuh tawh zong lem khin nawnlo thei hi.


B. Upna, Updan, Sandan kibang leh biakna kibang thupi hi
-Biakna kibang hi leh hoih pen a, upna kibang, sanna kibang hi leh hoih pen hi. A tawpna ah akibat kei phial leh zong lawm kingai in i om khit ciang in khat leh khat ki theihsiamna a om ding kisam a, a diakdiak numeite in a pasalte a a zuih pih zo ding zong kisam hi. Leitung ah mihing pen biakna leh minam pen a thupi mahmah nam nih ahi hi. Minam a kibat hang in biakna akibat loh man in innkuan sung ah, tu leh tate makaihna ah buaina tampi piang om a, minam a ki bat loh hang in upna, sandan leh biakna kibang ahih manin a lem mahmah zong tampi tak mah om hi. A hang in minam a ding sang in biakna hang, biakna a ding in mi ki si ngam zaw hi cih pen leitung paizia khat ahi hi. Tua ahih man in hi thei hi leh nungak lai, tangval laite in eima upna tawh akibang, eima san dan tawh akibang hi leh hoh pen a, ahih zawh kei leh zong i ki-itna in tua ki lamdannate hong giksak zaw lo, ki zuihsiam ding, ki zuih theih ding ciang ahih nak leh san siam theih ahi hi.

C. Mel leh sa zong thupi veve hi
-Mel leh sa thupi veve hi. Bang hang hiam cih leh zing leh nitak, sun leh zan, nisim bek thamlo khantawn a om khop pih ding hi mawk ahih man in, mite' lak ah na kithuah pih ding, hau in zawng ta lecin na angpom, na angkawi ding hi mawk ahih man in mel leh sa zong thupi hi. Mihing pen akimu theilonate sang in akimu thei nate ah ki lungkim zaw tawh kibang hi. Tua ahih man in mel leh sa mah hoih leh lungkimna om a, suan leh khak a ding in zong ci hoih, sa hoih hong suak ding hi.

Khaici meima, khaici muat pan in singkung no a hoih suak khollo zaw a, khaici limci, khaici cidam, khaici hoih mah pan in singkung no hoih hong suak zaw hi. Hih pen 100% a hih khin loh hang in a tamzaw ah man zaw gige den hi.

Gentehna in, nu leh pa cingo sinsen nih sung pa a tate a vom dikdek suak khollo zaw a, nu leh pa a vom dikdek sung pan tu leh ta a ngo sinsen suak khollo zaw hi. Cidamna lam pan en leng numei ahi a, pasal ahi zong in cidam in (pumpi cidamna) a om leh bek suan leh khak neihna akizom thei ahi a, khang gui kizom ahi thei pan hi. Tua ahih man in pumpi cidamna, mel leh sa zong thupi hi. Mel leh sa pen ki khel na ding hamsa mahmah hi. Tu hun ciang in Melhoih ningzu kidawn ta hi.

D. Lungsim hoih thupi hi
-Lungsim hoih pen thupi hi. Ahih hang in lungsim hoih icih kuate hi ding cih om leuleu hi. Leitung ah lungsim hoihlo pen hi icih te zong "nang na lungsim a hoih hiam ci-in dong leng, hoih kei" hong ci kuamah omlo ding hi. Kuamah in kei ka lungsim hoih lo hi hong cilo ding hi. Tua hi leh lungsim hoih icih koi hi ding?

Lungsim hoih icih pen ei ma ngaihsutzia/ dan tawh akituak pen a hoih pen ahi hi. Midang khat a ding in a hoih mahmah khat pen ei a ding in hoih khinlo thei kha maitak a, ei a ding in hoih i sak leh a hoih khempeuh zong mi khem peuh a ding in hoih khinlo thei kha mai tak hi.

Khanglui paunak khat ah "mel hoih ning zu kidawnlo, Lungsim hoih mah thupi pen hi" kici hi. Nidang lai in i omna Zogam sung ah mual leh guam kawm ah nungta ihih man in i ci leh sa zong ham, khauh, vom mai a, tu hun ciang in Zomi te zong i mel leh sa te hoih mahmah ta mai hi. Hoih zaw tektek hi. Khat ah civom dikdek khat pen a ngo na ding in make up, powerder bang zah bang zah a zang zong in ngo tuanlo ding hi. Mel hoihna pen deih bang in ki bawl theilo a, lungsim pen Biakna, Pasian' thu sung ah ki puah thei zaw ta hi.

Nidang lai in i omna gam mang tu lak, lo lak, mual leh guam lak ahih man in mel hoih ningzu kidawnlo mah hi. Hi mah hi. Tuhun ciang in Zomi te pen gamlak, mual leh guam lak ah ki omnawn lo a, khuapi sung, gamdang leh leitung bup level in ki nungta ta ahih man in "Mel hoih ningzu kidawn ta hi." Na sepna leh vai khat peuhpeuh ah hi sinsen ding, mel leh sa mah kician sinsen leh a lem zawkna mun tampi tak omta hi. Nasep zonna ahi a, sang kahna ahi zong, zum kong mang kong paina tuamtuam te ah...

E. Pilna leh Siamna thupi hi
-Zi leh ta a nei ding, suan leh khak a kizom ding nahi zong in tu leh ta, zi/ pasal vak na ding in pilna ahih kei leh siamna ahih kei leh a nih in kisam ta hi. Nidang lai in i omna Zogam sung ah pilna lian sang in siamna ki sam zaw hi. Pilna zong ki nak saplualo mai leh i nei lenlan phialzong in tu hun zah in i za theih na ding mun leh hun om khollo zaw a, thatang cidam, thahat ding kisam zaw ahi hi.

Tu hun ciang in leitung khantohna tawh kizui in (Information age) ah i omna gam, mun leh nuntakna zui in pilna ahih kei leh siamna khat teitei kisam hi. Tua hi leh bek i zi, i tate or i pasal te ki vazo ding a, innkuan picing i suak thei ding hi.

Nek zong, sum zonna haksa ahih man leh vanman te khang lam manawh ahih manin thatang tawh sep bek tawh hi thei nawnlo a, pilna leh siamna mah tawh i kop ding kisam hi. Zi ahih kei leh pasal ding zong tuadan mah in pilna khat a nei or siamna khat a nei hi leh i mailam ding meivak zaw deuh bek hi.

F. Minam zia leh tong kibang zong thupi hi
-Minam kibang icih ciang in Zomi ihih leh Zomi dang khat mah tawh kingai, kiteng ding cihna hi. Ahih hang in minam i kibat hang in, khua khat leh khat, i pau, i zia leh tong zong ki bang khinlo ban ah beh leng phung zong ki bang khinlo thei hi. Pawl khat in i kibatlohna neuneute pigen lua zaw in, Zomi leh Zomi ihih veve hang in, ko khua, ko beh, ko pau cih bang a zang om in nupa sung ah buaina nengneng om thei veve bek thamlo in tampi zong om khin hi. Tua ban ah tua nupate in ta a neih uh ciang in, a nu pau zang zaw ding maw, a pa pau zang zaw ding cih bang in zong a buai om thei hi (Zomi veve ahih hang in kha leh beh leh phung kibanglo hi leh).

A tawpna ah bel Zomi leh Zomi ahi a, Zomi leh Zomi lo ahi zong in i ngeina, pau leh tat zia a kibat kei leh zong aki zuizo ding ciang, a pasal in khiam ding maw, a zi in zuih bawl ding maw, a nih un khiam tuak ding maw, a pasal a 100% zui ding in a zi pen a vekin "0" hi sak cing etc. te pen tua lawm kingai ding nih geel i ki thutuak dandan hi ding hi. Ahi zong in Zomi te ngeina leh Lai Siangtho ngeina ah bel a Pasialte suan leh khak, ngeina leh zia leh tong aki sim ahi zaw hi...

[Taang Sianpu]

II. Zomi tangvai lai, nungak lai lawm ngaih Zomi mah a nei laitak te a ding Zi leh Pasal ding i zon laitak in eima deih pasal, numei in bang quality teng nei ding cih ngaihsut ding leh qualification/ checklist neih ding pen a ngeina ahi hi. Tua sung a a tung a i kikup teng en kik pak leng...

A. Mi kician, mitei
B. Upna, Updan, Sandan kibang leh biakna kibang thupi hi
C. Mel leh sa hohi zong thupi veve hi
D. Lungsim hoih thupi hi
E. Pilna leh Siamna thupi hi
F. Minam zia leh tong kibang zong thupi hi

A tung a check list sung teng ah nang ma i deih lian tawh akituak mi na mu diam? Bang zah om ding a, mu phial mah lecin zong amau hong deih kik diam cih pen eima mimal hanciam thu zong hi veve a, hanciam bek tawh zong a pian khit loh na mun zong pawl khat om thei hi. Kingai, kiteng cih pen khat bek i it, khat bek i ngaih tawh hi thei khinlo hi. Nih mah in aki it, aki ngaih uh a kul ahih man in i lawmnu ding, i lawmpa ding in i deih Check list teng lak ah 100% a kim ding i muh leh a hampha ihi hi. A vek in a kim i muh kei leh zong a tam kim thei penpen cih tawh ki zon beh hi.

Lam khat ah a tung a teng deih napi in ei ma omdan tawh akipia phalo, akituak phalo zong om thei hi. Gentehna in No. A pan E kikal teng numei khat deih ci ni. Ahih hang in ei pen tua nambat nam (5) lak ah 1 or 2 khong bek i neih leh amau ei hong deih kik na ding hamsa kha ding hi. Thatang hah nek a zon zong hi nawnlo in, pilna, siamna nam khat mah tawh hanciam in i deih numei, pasal khat i ngah ma dong in itna khah khia in itna, ngaihna thu akigen ahi a, tua hong khang toto in a sawtna ciang in ki lungkimpihna, ki thukimpihna a om leh bek innkuan khat akipiang thei ahi pan hi. A thupi pen ah Pasian' deihsakna leh Pasian zahtakna bulphuh peuh leng i khial ngei kei zaw ding hi. Tua ahih man in Topa zong sak ni...! A dang teng zomto lai ni.

[Taang Sianpu]

Hih pen a om thei mah hi ci ingh. Khamlam pan in Zangkong khuapi sung ah hong vak hih tuak. Tua leh tua pa pen khuapi sung pai ngei nailo ahih man in zangkong a inn sangpi, super market te leh taih innpite a tunglam nak et lua kha ahih man in a lampai kawm in meikhuam (electric pole) phua kha dan hih tuak hi. A lawmpa in "Khuadak lo maw lawmlawm, na phut khak zaw zen" acih leh "a lawmpa in a Khuadak lua hi zaw ingh..." tua hang in a phukhahi ingh acih dan maw. Khat veivei ciang kithei, kitel lua leng ki ngai theilo, ki it zolo zaw thei cih zong bel om mah ai ve :) hehe...

[Tg. GT]

Ong kicing sak zawzen ciai. Tua na tawm No. Khawkpi thum bang a om hi lai ci leng, laibu booklet dan bang in hong bawl vet ve leh. A kisam lai teng hong zom lai ou. Thupi mahmah in, picing vai leh counseling siam mahmah ei. Lungdam.