Obituaries

[Zomi Community Network]

Dahna thu leh Dahpihna laikhakte (Obituaries & Condolence Letters)

[Zomi Center]

Dahna Pulakna : Lia Ciin It Lian Muang in hong nusia.

 

Zogam Anlang khuami, Pa Pau Khan Kap leh Nu Kim Tawi Hau-te tanu naungek Ciin It Lian Muang (Suah ni : Oct. 24, 2011) in Washington DC khuapi a om Children National Medical Center zatopi pan-in tuni Oct. 29, 2011 (Saturday) ni zingsang nai 4:00AM hun pawl in a leitung nuntakna hong nusia ahih manin adah akap a nu a pa leh meeltheih tanau a kua mahpeuh tawh a kibang in Zomi Innkuan USA kipawlna in kidahpih hi.

Naungek Ciin It Lian Muang pen a suah a kipan damlo ahih manin a suahna Annapolis zatopi panin Children National Medical Center akipuak ahi hi. A luanghawm tawh kisai in Zomi Innkuan DC makaite leh innteek bangkuate kikum in vaihawm ding uh a, a thu a la hong pulakkik ding uhhi.

 

Dahna tawh;

Zomi Innkuan USA

[Zomi Center]

Tulaitak Kawlpi ah sihna mun tuamtuam aomte lakah Pasian' nasem bangkuasung a thupiang ka theihpih khak innkuan nihte' hangin dahpihna thu i kitheisak hi.

1. REV.LANG KHAI NU, NU NING IN HONG NUSIA:-

Revd Dr Lang Khan Khai (ZTCS), Pilong Tuiphum Pawlpi' i a nu, Pi Zam Zen Ning (Kum 70), Khualui Maal Suangzang, Teenna, Paangpi veeng in zanni zingsanlamin hong nusia a, tuni 3:00 PM hunin sihvui hunbawlna kinei a, mi tampi in gal hi. Hanthotna pen Church Pastor, Rev.Lang Suan Mung in nei a, munute 17 1/2 bek sawtin, thuciik kisa, manpha
kisa-in, siam zong kisatek hi. Nu Ning pen a nuntak sung mi nunnem, nu hoih khatin kigen hi.


2. REV.ZAM KHAW LIAN' ZI, NU NGEM KHAW HAU IN HONG NUSIA:-

Tulaitak Zomi Pasian nasem, Ordained Pastor uham i neihte lakah khat ahi; Rev.Zam Khaw Lian' lawmnu, Nu Ngem Khaw Hau (Kum 77), khualui, Suangphei; teenna, Sanpyah, Khuamawi khuagei a pen in zan ni, Nov.6, 2011 in hong nusia a, zingciang Nov.8,2011 (wed) 2:00 PM sihvui hunbawlna om ding a, Pawlpi keem, Rev.En Khan Hau (a) Haupu in vuina
nei ding hi.

Hih Sia Liante'  innkuansung nuntak khuasak danuh a galzak a kipan a tel tampi om ding hi hang. A tapa uh a pil mahmah ngei khat ahi, tangvalpi, Paubawi pen a mihing ngeina ahih loh zawh kum 2/3 bang pha khin a, a innsunguh khuazing mahmah kawmkal ah hibangin sihna in tuam behlap ahih manin thungetna leh panpih theihna munmun panin panpih
ciat ni.

ZIS min tawh huhna zong a kipia zelzel hi a, nuamtuam sa mahmah uh hi. Rev.Zam Khaw Lian zong teek, zawm mahmah tamai hi. A khuamuhna hat nawn lo lailai hi. Thungetpih ni.

Dahpihna tawh thupuak,

Peter Khampu.
Kalaymyo

src: ZomiCenter

[Taang Sianpu]

Nu Cing Khaw Don, Tahan i hong nusiatna hang in dahpihna Attach file ah kisim thei hi. Ka Pi, ka Nu' nu hi a, kum tampi mah ong nuntakpi na pan in, Pasian' in hunsata ahih man in hong laksakna tungtang in a dah a kapte ban ah, vai khempeuh ah ong panihte tung ah Kha Siangtho ompihna hong tungkim ciat ta hen.

[Zomi Center]

ZOGAM (MOTOR ACCIDENT) TAWH KISAI DAHPIHNA THU TAANGKONA:-

Koh masak nop:- Zomite in tuahsiatna tuamtuam i tuahnate thu ciamteh nuam pawlkhat om thei zel i hihna leh itna, lainatpihna tawh ci-in a hun bei khin ta leh kong tangko khia uh hi.

A beisa kigin ni zan (Dec.17,2011, sat.), 7:00 Pm hunpawlin, Tg.Lian Deih Cin Khaw Khai (a)Khaipi in Motor tuahsiatna hangin hong nusia hi. Amah pen hong nusia sa Pa Suan Za Gin leh nu Lian Khan Niangh te' tapa nihna hi a, khualui Saipimual hi, tulaitak Tahan-ah teeng uh a, ama kum (24) pha pan hi. Tukum Oct.kha-in, a pawlpi un Campaign khat bawl
uh a, Revd Daniel Pau Lian Mung (Macedonia Gospel) te pawl sam uh a, tuatak panin pianthak kitel cianna ngah manin i khamuanpih hi.

HONG NUSIATNA THU A TOMIN:-

Amah pen Haimual Jeep nungzui hi a, a motor hawl pen eimi mah hi a, amaute geel bek van a dim pua-in Kawlpi panin Tio lam a zin uh ahi hi. A motor nei pen sanggam Mizote pu Zala (mi gi mahmah khat ahi hi). Tua ni sun khit lam teh Tio lam zin to uh a, Tedim panin khuamial pai uh ci hi. Lamzang khua tun madeuh lamkawina mun khat ah hawl khia suak
dan hih tuak! Tua munah a hawlpa suakta-in, Khaipi amun panin hong nusia pah hi. Motor pen feet 300 bang tuk dingin gen uh hi. Motor hawlpa zong a liam hangin Tedim pha zo lai a, ngeina om bangin thuneite'n kem phot uh ci hi.

Hih bang thuteng a om ciangin a nai pen a om sanggam Lamzaang khuamite in na na don pah uh a, i lungdam mahmah hi. Nipi ni zingsang tungin Kawlpi pan sanggam pawlkhat in a theih teh va delh to uh a, Tedim zato panin a kilah khit teh Kawlpi hong pai uh a, 18 nitak nai 9:30 hunin Tahan a inn uh hong tung uh hi. Ama luang pen 18 ni-in kivui hi.

MOTOR NEITE' THUPIT'NA:-

Pa/Pu Zal-a te in zong a motor dang uh tawh lamkal ah vadawn tuah uh hi. Khaipi it mahmah, pakta mahmah uh hi. Sihvuina ah a innkuanun leh a motor 4 uh tawh galin handong kha uh a; amah mah akipan a zi leh a sanggamte tawh kah tangial uh hi. Taih han bawlna, hankuang, leh vok luang khat a kipan sihvuina tawh kisai a bei khempeuh sikh uh hi. Amau
motor nei ahih uh hangin amau khialhna om kilkel lo-in, hibang zah dong a itna hong lah uh pen ettehhuai mahmah kisa tek hi.

Dahpihna thupuak, KSK tangin,

Peter Khampu
Kalaymyo.

[Zomi Center]

Zomi Innkuan USA kipawlna pan Dahna Pulakna

 

Oklahoma State, Guymon khuapi a teng Pa Thang Za Dal (kum 62) in tuni, Jan. 10, 2012 in a omna inn phual panin a leitung nuntakna hong nusiatsan ahih manin, adah akap a innkuan pihte leh meeltheih tanaute, pawlpimite akipan khua leh tui khempeuh tawh akibang Zomi Innkuan USA kipawlna Executive Committee pawlin nakpi takin kidah hi.

 

Pa Thang Za Dal pen US gam ahong tun zawh sawt nailo a, gil sung damlohna hangin ahong tuahsia ahi hi. Amah pen Pastor Gin Lian Pau’ nau (Sia Lianpau) hi a, Zogam ah a kham khua uh Mualkawi pan ahi hi. Ama luanghawm tungtang tawh kisai thu athei nuamte in ahi zongin, adah akapte hehnem in tha apia nuamte in ama u, Sia Lianpau (580-461-8605) kihopih thei ding hi.

 

Dahna tawh;

 

Executive Committee

Zomi Innkuan USA

 

Tang’in;

 

Pa Go Sawm Khup

President

 

Tulsa, OK

January 10, 2012

[Zomi Center]

DAHPIHNA THUPUAK

Zogam, Tedim gam huam Muizawl khuami Tedim khuapi, Lawibual veng ateeng (Pa Gin Mung), Gualnam beh i zi Nu Dim Za Go ( Kum 65), in sung lam damlohna tuamtuam hangin April 7,2012 ( Saturday- 10:00 PM) hunin a teenna inn pan hong nusia cih kiza ahih manin Svolvær Zomi  Innkuan pan dahpihna i pulak hi. 

A nusiat a tate; Pa Go Suan Mangte innkuan le Tg. Nang Suan Hau (USA), Nu Cing Tawi Nuam le Pa Zam Suan Thangte innkuan (Norway), Tg.Lian Khan Thang le Tg. Cin Suan Pau (Malaysia), le Inn lam a om a ta atute akipan adah akap meltheih U le naute tungah Khasiang tho in na hehnepsak ta hen. Nu Go i luanghawm pen April 10,2012 ( Tuesday) ni-in Tedim RC hanmual ah kivui ding cih kiza ahih manin, Sihvui hungeelna akipan vai tuamtuam te ah buaina nawngkaina bang mah om lohna dingin thungetna ah phawkpih ciat ni. 

Lunnupi te Innkuan tawh Dahna hun sungah,

Svolvær Zomi Innkuan
North Norway

[Zomi Center]

April 11, 2012 Malaysia nitak 7:30pm hun ding pawlin Pa Dal Za Khup @ Joseph Dal Khup (Ngalbual Khua, Suante Beh) tawh a zi Nu Cingpi leh a tano kum (2) apha apeng nih, a vekpi mi (4), Taman Chileong (KLang) lampi tung khatah apai laitak un mawtaw taii-in phu kha-in, lim phukkhak lua ahih manin Klang Zatopi kipuak hi.

Zatopi panin sanggampa Pa Dal Khup pen a nuntakna hu beita-in, kha siat huai takin mual hong liapsan hi. Azi zong pen, liamna baiina lim tuahlua ahih manin, operation kibawl hi. A tano uzaw zong lim liam pian ahih manin Sg Buloh zatopi puakkul ding, ci uh hi. A tano nauzaw pen ahih leh, hoihkik damkik dingin lamen thei pah uh hi. Hih pen, April 12, 2012 zingsang 12:30am hun ciang thupiang hi. A za khempeuh lungtang hong lawng mahmah hi.

Zomi tul tampi-in a ngaklah, a kisap, a lunggulh gamthumna paitheihna ding hun zong amau innkuan aa ding ani ding a theikhin uh hi aa, tuapen April 18, 2012 ni, ci hi. Tua ih theihpih semsem ciang na kisakpih tek hi.

Lamet hetloh hun tektekin hong nusia Pa Dal Za Khup hangin Zomi bup ih dahkhawm aa, a it a zi leh taneu tegel cidam pumpi tawh gamthumna a zuattheihna ding uh thu ih ngetpih hi.

iNFO

ZAM

[Zomi Center]

Yangon, Insein Township a teng Pa Khup Khan Cin zi, UK gam London Khuapi a teng Dr. Langh Lam Thang leh Dr. Pau Khan Mung te sanggamnu, Nu Ciin Khat Niang, damlohna hangin Asia Royal zato ah tawlkhat a lupkhit nungin April 4, 2012 ni in, a it mahmah a pasal, a tate thum, a u leh nau Zomi pihte nusia in tawntung Pa Pasian kiangah hong ciahsan ta hi. Nu Niangpi luanghawm ahih leh April 9, 2012 ni in leiah vuina ki nei ding hi. Nu Niangpi hong nusiatna hangin adah, akap, lungzuang khuangai te khempeuh ih Topa Pasian in hong hehnem ta hen.