Zomi sung ah "Pu" min leh zate deih luatna lungno (Pu Virus)

[Taang Sianpu]

Zomi sanggam a kua mah peuh,


Zomi sung ah tunai sung teng diakdiak "Pu" cih kammal pen a deih ong tam mahmah ta cih zong pawl khat in ki thei hi.

Pu cih ciang in i deihna leh i zat dan tuamtuam om dan hi.

Tua sung ah i zat ngei pha deuh ahi:-

1. Putekte (aged fathers)
2. I Pu-te (grand father)
3. Sepna tawh kituak in "Pu" cih kammal zatna cihte leh a dang zong om lai ding hi.

No. 3na sung ah ngaihsut ding thu tampi om ding hi.

1. Sepna tawh kizui icih ciang, tua "Pu" akici Tangval (Tg.) in bang teng tak sem a, bang ciang a sep man in PU cih ding ciang in kilawm hiam?
-Hih pen bang tawh tawikhai, bang tawh teh hi ding hiam cih thu.


2. Pu cih ciang Tangval lai hi lawmlawm sam kei leh kilawm zaw deuh tawh kibang hi.
-Tangval lai khat pu icih sang in Tg. or Taang mah ci leng kilawm zaw tawh kibang hi.
-Pu icih dingte in Zi leh Ta hong nei masa phot buang le uh, or tua dong ngak zo lai deuh le uh bang aci ding hiam?

-Kipawlna thak khat peuh, nasepna kician zong nei nailo in, ei leh ei PU kicih ding ngaklah luat hang zong i sep khiatna ah aki lamdanna tam lua zungzung lo thei hi.

-Min leh za deihna leh ei leh ei min kipiakna (self promotion) zong hoih sam na ven ah, tua ban ah ei leh ei mah "Ki niamkhiatna leh Pasian' zahtakna bulphuh zaw in" (low profile)
tawh sem leng bang aci diam?


3. Ei leh ei "Pu" akici hi kei zaw henla, midang, Kipawlna lianpi or Zomi bup kipawlna dangte' hong piak "Zahtak piakna or Honorary" tawh midangte in "Pu" hong ci hi zaw leh bang aci diam?


4. Mihing pen "min" hoih ki deih tak a, "za" zong ki deih tak hi leh kilawm hi. Za pen eima hanciamna tawh kizui in kingah thei a, U Lian za, Degree ngahna za, Supervisor, Manager, Coordinator etc.

Min icih ciang zong tel gen leng a deihna tampi a om ding ban ah, tu a i gen min "Pu" cihna za pen ei leh ei kipiak hi kei zaw henla, midangte in pahtakna leh pahtawina tawh hong piak hi zaw leh akilawm zaw kei kha tam cih zong ngaihsutna om leh kilawm hi.


Min leh za deih man in kipawlna khat bawl ziau, pai luailuai etc. cih dan zong om thei maitak hi. Pawl khat in naupang vai sa in, kimawlna dan tawh kibang in ong na mu zong om thei hi.


A tung a muhdan tuamtuamte bangci isa hiam?
Eima muhna ciat kihawm sawn in, ki theisak ni.

Thu kilawm zaw ding deihna ahih man in gen khialh a om leh innkuan lungsim tawh ki maisak ciat ni.


Lungdam.

Tg. Sianpu



Note: Degree, Min leh Za pen ei leh ei kipia cih omlo zaw mai hi. Mi khat in degree a ngah leh tua degree pen amah leh amah kipia cih bang om khollo zaw a, midangte, kipawlna dangte, sangpi, kipawlnapi a dangte' piak ahi hi. Ahih hang in ei leh ei "Pu" za kipiakna, min deihna pen leitung
mite' ngeina ahih sam hang in, makai picing i suah na ding leh, makai ihih theih na ding in tua min leh zate masuan masa kei leng i sepna leh i bawlna khat peuh a picing zaw kei diam?