Zomi sung ah, kipawlna khat leh khat ki zahtak sak na ding a kisapna

[Taang Sianpu]

Tunai sung teng Zomi Nam Ni ah bang flag, kua a suang ding cih tawh kisai a lunghimawh leh a tel cian lo mipi lak pan pawl khat i genna tampi i za khin hi. Dotna tuamtuam leh, gencianna tuamtuam zong a om hi.

Thu leh la vaihawna khat peuh ah theih huai leh, pilvang ding ban ah, thumuh hun khat ah:

1. LZI/ ZNC/ ZRO pen kipawlnapi (organization) ahi uh hi.

-Amau By-laws tek om ding a, Constitution nei tek ding uh hi.

Tuni ciangciang Zomi bup a huam kipawlan i neih sun (3) ahi,

ZNC- Kawlgam sung huam kipawlna hi pha deuh a,

ZRO- India leh Kawlgam huam kipawlna hi pi diak a,

LZI- Leitungbup Zomi Innkuan- Zomi International kipawlna hi pha deuh, hih i neih Zomi kipawlnapi (3) teng lak ah amau kipawlna i ki vaipuakzia leh, 

nasepzia, a scope leh, mission te a tuamtek ahi a, tua a tuamtek gawm khawm leng hong kimsak (complement) ahi hi.

Tua ahih man in hih kipawlnate' phalna omlopi in, tua kipawlnate' "mandate" or "comission" omlo pi in kipawlna Flag bek hilo, kipawlna min hi ta leh, kipawlna Logo ahi a, Kipawlna vai khat peuh va thang zat sak, mawk zat sak ding ahih loh lam Zomi makai thumu zaw deuhte in i theih ciat sa ahi hi.

2. Kipawlna khat i min tangzang ngaihsut ding a kilawm loh mahbang in, va kosiat sak ding zong hoih masa lo hi.

-Tungsiah lam pan in official tak in zaksakna, tute in, kua teng in zang thei ding cih lamlahna hong neih leh lah, lungsim siangtho tak in zat theih ahi hi.

3. Gentehna:

-Refugee hi ta hangh, galtai hi hangh ei kan in, ei tawh a kisai dang kuamah omlo ding ahi ci in UNHCR te pahtawina in UNHCR Logo leh UNHCR Flag pen community khat i kipawlna zumsung, pawi khat peuh ah a suang ding hi leng etlawm mahmah na pi ding in, tuaci gamtat a kilawmloh ban ah, thuthei leh, thumu kipawlna khat peuhmah in tuabang gamta mawkmawk loding cih pen i theihsa ciat hi.

-Refugee community-te in UNHCR support mah hi.

-Refugee te in UNHCR panpih mah hi.

-Refugee kipawlnate in UNHCR pakta in, kizona nei mah uh hi.

Ahih hang tua Refugee kipawlna khat in UNHCR i Logo leh Flag/ Dialkhai a zang zah ciang dong ding in phalna a om hiam, zat khuan a om hiam, zat theihna thupiakna (tungsiah pan) a om hiam cih pen a diakdiak Refugee ahi ngei leh, refugee vai a telte, refugee vai a theite in, a tel khit thute ahi hi.

Thu icih pen tuadan ahi hi. Nidang lai in bang mah i theihma, experience i neih ma in ut bang bang in ki gamta mah ding hi, ahi hang in, tu hun ciang, gamdang i tun a, thu leh la tawh kimakaih, a khangto minam hih na ding a masuante in pilvang hun hi ta hi. Thu leh la khat peuh thangko, thangzat ding hun hi nawnlo hi.

3. Zomi-te CD, VCD, DVD, Laibu etc. phalna omlo pi in ki nak zat lua khinta hi.

-Phalna omlopi in, mawk zat loh ding kigen khin napi in a mawk gamtat zong om lai veve thei hi.

-Bang tan vei thang gamtat lai ding ihi hiam?

4. Kipawlna khat, pawlpi khat, mimal khat i neihsa leh lamsa i zahtak sak mateng in mipi kisuak ngeilo ding a, ki picing ngeilo ding hi.

-Phalna om masa lopi, cialna omlopi, official zaksaknalopi in mi khat a zat mawk sakloh pen hoih zaw leh kilawm hi.

5. A thupi pen ah khat i neihsa, ki makaihna leh ki vaipuakna ki zahtak sak ding kisam hi.

Official Diplomat mipi kituah khopna khat peuh ah gam cia tin lan/ Flag zang ding ci hi leh koi zaw na zang tam?

Kawlgam flag a lui maw, a thak...

Minam khangto, gam khangto ding i ut takpi leh, i khantoh ma in, mipil, mi khangto, gam khanto gamte' gamtat, kilawm zia, thuman, thudik tawh gamte leng i minam hong ki lamto tektek ding a, Pasian in zong thupha hong pia ding hi.

Mimal khat leh khat, kipawlna khat leh khat ki it, kizahtaksakna, vang ki piakna thupha tuamtuamte 

Zomi Nam Ni tawh kituak in Topan' thupha hong pia kim ciat ta hen.