Economic Sanction leh Kawlgam Mipite nuntakna

Economic Sanction leh Kawlgam Mipite nuntakna

Kawlgam business makaite' (siang gen leng Galkap kumpi, U lian lamte leh a pawl te) amau sum leh paai hamsat theih na ding, sum leh paai tampi a sup lawh na ding, amau power a kiam zawk deuh na ding etc. deihna tawh economic sanction cih pen politics strategy in leitungbup ah a ki zang thu ahi hi. Economic sanction (Gamdang, gam khangto gamte tawh sum leh paai suakta tak in bawl theihna khaktanna, lampi hukbitna) pen NLD leh a pawlte' vaihawmna bang tak hi leh a ngei mah a bat ding deih uh hi.
Kawlgam economic sanction tawh kisai ngaihsut huai mahmah ding thu pawl khat mipi' tel theih ding in tom gen mahmah leng:-
Tua sung ah i ngaihsut ding thu pawl khat pen penglam vai tawh a kibat hun om thei zeuhzeuh hi:-
A hang a nuai ah en suk ni...
1. Namsia (bed bug) tam sa lua mahmah ahih man in namsiate tung hehsuak lua in, namsiate gotna, a sihsuk na ding ci-in, a lupna leh a inn a vek in hal tum tawh kibang.

2. Solomon in Nupi ta kituhte a thukhenna sung ah, tano nei nupi tatak zaw in bel, ken ka ngah sang in, amah pia zaw in ci in, tua a ta ngek a sih ding, a gimthuak ding khual hi. Nupi khat zaw in bel ama ta tatak hilo ahih man in, naungek i thuak ding khuallo in, tum tan in, phel hawm ding, naungek pen a lang tuak in hawm ding cih hi mawk hi. Economic sanction icih pen khat veivei ciang in, tua nupi nihna zaw dan mah bang in, aggressive thei a, amau political interest bek en in, phulphuh in, mipite' thuak ding, mipite' hamsat ding khua man nawnlo thei hi.

Ama ta tatak ahilo leh khualna a nei taklo nupinu in naungek phel hawm ding ngen zaw hi cih manghilh kei ni.

3. Paunak sung khat ah, Saipi a gawng pen zong laipi thau cia pha lai veve kici hi. Kawlgam sung ah gamdang pan in a diakdiak (Europe leh America) business men economic sanction a om man in Kumpi lam U Liante in haksatna tampi tuak hi. Mihau khin leh, neih leh lam a dim val liang in a nei U Liante' business suplawhna pen, ei bang in mi mawmawk, nisim buhtang leh anngiam na tawm nisim nek ding a kham zolo mipite' neih pen hun tawh teh leng ki khai lai mahmah hi. Kumpi U Liante gotna (dan piakna) ding in economic sanction bawlna in, nek leh dawn ding a kham zong a nei zolo mizawngte hau sak tuamlo a, mipi' va, gam leh lei sung pan vanmangpha teng ong laksak U Liante' hauhna leh business a nawngkai sak tuam hang in, ei a tawh kikim dek nai tuanlo hi. A thuak tatak pen nisim nek leh dawn ding a lungkham ciang, mipi teng mah ahi hi.

4. I lang ong pangte in ong zo lua, en lel kisa lua ihih man in, amau ei ong zo sa in in nuantak suak sang in, i vek in si khawm ni, si khawm ngeingai leng hoih zaw cih lungsim pen Extremists (a diakdiak Muslim extremists leh suicide) te tawh kinai mahmah hi. Kawlgam economic sanction (business bawl na ding lampi khaktanna) ong bawlna in kumpi lam u liante a ding lampi ki khak tan mahmah takpi hi. Tua sang in a ki khaktan zaw lai in ahih leh mipite ahi uh hi. Mipi a ding in a ngei sang zong haksa zaw lai in, mihaute a kiam pen hun tak ciang zong, mizawngte i cih theih pen sang nuam sa zaw lai veve uh hi.

Mipi nautangte khualna sang, party lungsim khat peuh ong khauh zawk luat ciang economic sanction hang in a hamsatna tuakpen ding ahi mipi te khualna lungsim omlo pahpah thei hi. Tua pen Kawlgam bek hilo in, leitung bup ah a piang ngei thute ahi hi. Koi hoih zaw, koi zat huai lo zaw cih lam sang in, a thu leh la kantel ding a kisap ban ah, immediate effect pen kuate tung ah tu zaw hiam cih zong i ki theih mawh bawl ding hoih tuanlo hi.

Zusa talpite man nuam lua kisa a kuapi lam pan meitawh i hal, i thawh a, a phi pan a man lian ding in i pang khinkhiat hang, khat veivei a phi lam ah na taisuak lo uh in, sih leh sih ci-in a meikuang leh, buhtukungte kantan in eima lam hong leh tai in ong pet zawk sop hun zong om thei hi.

Economic sanction pen gam khangtote leh mi bang deuh gamte ah sep theih na lianpen khat, kumpi u liante dan piak theihna lianpen khat ahi hi. Ahih hang mi a bang phalo Kawlgam leuleu ah, tuadan mibang gamte ah a kizang sanction pen ki zang kim theilo hi. Gilsung gut (hut) sih na ding zatui tawh gut bek mah si zo a,gut (worm) ahilo ganhingte si khollo lel hi.

Mi lungsim nei gam uk kumpi leh u liante' hamsat na ding in akibawl ahi sanction pen, mi lungsim a nei phalo gamuk u liante' a ding in bang mah lauhuai hetlo, nawnkai tuanlo lel a, nuam bang sa zaw sop thei hi.

Gim thuak sak nuam lua kisa, tui sumkuang, tuilipi sung ah i i khiat leh, aman nuam na sa zaw san lai cih bang zong om thei hi...

Kumpi lam hi ta leh, kumpi langpanglam (opposition party) te hi ta leh mipi lam et huai ta hi. Et hun ta hi. Mipi/ gam i economic in koilam masuan hiam cih lungngaih huai mahmah ta hi.

Views: 84

Comment

You need to be a member of Zomi Community Network - Your Network to add comments!

Join Zomi Community Network - Your Network

Comment by §ʋѦ¶♪Δиɢ on February 8, 2011 at 5:56am

Hih Saction vai kei muhdan ah:

Saction khak nawnlo in hong hileh pen kawlgam ah nasep ong omding a, vanzuak te sum ongsuak ding(hih sang atam manzaw aong kilei ding) hi. A hih hang in kawlgam ah na ongsem ding Company te in sepngam huai diam cih pen a semte a ding ngaih sut huai sa ing. Tun Paliman Democracy dan in parliman ih neih hang in a nasem leh a tavuan nei pen Galkap tebek mah gial phei zihziah uh a, a mau sep kalsuan luidan en leng a mulkim huai vive tawh om mawk hi. 

Bang zah kum pawl hiam(197...kaup mawh, kei suaknai lo :P) in kawlgam ah sum si cih thu nasia tek in oma, dangka tampi ih neih hang zangthei lo hi hang. 

U Khin Ngiunt ong khan ciang in, a ma maipha ngah pawl khat ong khang a, a mah akimap ciang in amah tawh kipawl teng koitung hiam cih nangawn muhding ong haksa dan inom mawk hi. Company lian pawl khat in sangleh lampi tampi lamsak a tun tua conpany ten nasep bangci ciang tung cih pen kuaman gen lo hi. May Flower Bank in kawlgam ah ATM zangma sa pen leh Vanleng line(Yangon Airway) nei masa pawl hi na pin tukum a kipan vanleng line license update sak thei nawn lo mawk hi.

Tun U Thanshwe mai muteng in sum luakziah ziah nasep senpi a, a semteng en leng ama bawng(ဦး ေတဇ) teng leh U Tawng (ဦးေသာင္း)bawng teng hilel hi.

Hih te dan ih et ciang in, Kawlgam paizia ah nasem leh tavuan nei zan ni leh tuni a mau teng mah hi a, a ki vat giap giap dan te uhpen mulkim huai thei mahmah hi. Nasem khawm pipi thong in kipuak a sam na ngawn a mah leh amah met zah dong in koih mawk thei uh hi.

A mau kampau pen Law a suak sak nuam pah pah gamuk te tawh nasep ding pen hamsa in um ing, a nasep pih te nangawn gawt ngam pen nasep dinga gamdang pan pai mawk khat pen ong gawt ngamlah lo ding hi. :P 

Kawlgam ah nasep kipan ding in ding mah leng U lian te leh makai maipha ngah kul(Journal te Ulian te tawh kinai te bek in license ngah thei) ong suak hi.

Tua a hih man in kawlgam business khantoh ding hoih mahmah

Comment by Taang Sianpu on February 7, 2011 at 7:19pm
In another word: "The tension, misunderstanding the enmity they have between the two organizations/ groups is much stronger than the desire to help their own people (who struggle for their daily end meet) which caused the civilians and innocents suffer from economic crisis. Their hatred against each other blinded them to see the agony and out cry of the people for a day to day survival. Its time for the world especially the West to rethink their economic sanction policy on Myanmar and to impove the suffering of the people the country." (Tg. Sianpu)
Comment by Taang Sianpu on February 7, 2011 at 6:59pm

Lawm Mangsen,

Nong na simsak tangtangh man in lungdam ingh. Saipi leh Saipi (elephant) kitong leh, a nuaig a om kiak leh lopa (small grass and plants) te in thuak hi. Hih pen Kipawlna khat leh khat, makai khat leh khat, gam makai khat leh khat kikal thu leh la piangte in amau zong sukha veve napi in, tua sang in a mipite (mi nautangte) in buaipih zaw leh, thuak lah zaw hi ci principle thei in, mipite hehpihna nei leng, i Kawlgam i hamsatna a bei theih na ding i sep theih loh hang, a kiam tuam na ding in ki bawl thei tham ding hi.

Comment by moemangsen on February 7, 2011 at 6:17pm

Dear U Sianpu,

Economic Sanction vai kician takin nong gelhcian manin lungdam hang. Hih thutawh kisaipen Kawlgam in ihthuak geihgeihzel ahihmanin mipi telcianding thupi mahmah hi.

© 2020   Created by Zomi Community Network.   Powered by

Badges  |  Report an Issue  |  Terms of Service