ZOFOP SOUVENIR MAGAZINE KI-HAWMKHIA PETMAH TA EI!

[Taang Sianpu]

Zan deuh a kong zaksak uh bangin tuni, May 27, 2010 ni-in “Zomibup
Pasian Phatna Pawipi” 2005, Tedim a I neihpne phawkna tawh Zofop
Committee te hanciamna tawh hong bawl uh Magazine kihawmkhia taktak ta
hi. Magazine bu (2000) kibawl a, tuni-in Kawlpi ah bu (200) kihawm
khia hi. Hawmkhia cihtak ciangin a thu om bangin a kipia, letsong
pawlzong tamkhop mah om a, tua lo te a bawlna beizah mialmial ciang
tawh a kizuak ahi hi. Page zanih val leh maan tampi a colour tawh
kibawl a, simnop leh muhopin thangahhuaina tampi om hi. Tutung a ih
Magazine pen laibu dangdang tawh kibang lo-in Zomi bup ahuam, ih
sepkhop, mapan’khopnate ciaptehna dan hong suak ahih manin kep loh,
lei loh a phamawh zah a I tuat ding thupi dingin ka-um hi.

MAGAZINE AAPNA LEH HUNBAWL DAN HIH ANUAI A BANG AHI HI.

A ni : May 27, 2010 (Thursday)
Ahun : Am.8:00-10:00
Amun : Galilee A.G Biakinn (Pinlong 8, Bogyoke Road) Kalaymyo.

Zingsang Kiallap/Breakfast ki-ne a, tua khit ciangin hun kipan hi.

1. Hun-uk - Rev.Pum Za Kap
2. Hun-ap - Sia Do Khan Cin (Pyidaytha)
3. Zaksakna & Introduce na – Pa Hang Lian Khup
4. Lungdamkohna & A kul bang genna - Sia David Go Lian Sum
5. Magazine Aapna - Rev.Lian Khen Pau (G.S, ZCLS)
6. Hunzawhna & Thupha Piakna – Rev.Hau Go Kham


Hih Magazine aapna ding tawh kisai-in Kawlpi khuasung leh Pyidawtha
ciang bek a kisam man suak hi. Mi 140 sapna lakah 102 kipai thei a,
hun limci tak kibawl thei hi. Tua sungah 2005 kum, Tedim khua ah,
“Zomi Bup Pasian Phatna Pawipi” I bawlna leh “Hallelujah Chorus” I
sakna, I kidemna tawh kisai muhdan a tuamtuam, a sawi lam a kigenna hi
ta leh a hoih lam leh I khantohna, Zomite ki-pumkhat tuamna a pianna
cihte pen Sia David Sum in kiciantakin pulakna hong nei hi. Tua banah
hih zah cianga sum-le-pai, thu-le-la leh vai haksa tampi kawmkal a
nasepna leh a munmun pan a piakkhiatnate hi ta leh sum zat dante a
kipan kisuanna om kilkel lo a a kizatnate siangtakin hong gen a
ki-lungkim mahmah ciat hi. (A Magazine na sim uh teh a kicing zaw-in
na thei ding uhi).

Pasian’ hoihna leh Amah a muangte’ tungah Pasian in a sepnate hong gen
teh Sia David Sum a khitui hong mualtuang a, mi tampi lungdamna tawh
lungsim hong lawngmahmah ciat a, ki-daikhipkhep hi. Hua hun lai banga
Zomibup a huam kipawlna leh Pasian’ min tawh nasep khop nading pen
ki-lunggulh mahmah lai hi ta leh a thu ol het lo khat hong suak ahih
manin mailam ah lunggulhna ciang bek kigen thei hi. Ih neih zawh
pepeuh ciangin a mun koilai hi ding a, a kua tungtawn a Pasian in hong
kipansak ding cihte a kipan thungente hi ta leh ki limhel mahmah hi.

(Hun zawh phetin Magazine kilei pah ziahzaih a, a mi pai zah sangin a
tamzaw bang beipah hi. Pasian’ min tawh nakpitak a a ki-ap ngiat ahih
manin sathau nilhna om cih phawk ni. Na sim a, na et ciangin Laibu
dang dawngte tawh hong kibang lo ding a, na khatha hong nosuaksak ding
hi).


MAGAZINE DEIHTE’ ADING THEIHSAKNA:-

Australia Zomi Innkuante in a masa pen in hih Magazine Bu hong vaikhak
uh a, ki-lungdam leh ki-angtang mahmah hi. Tua banah tuni-in zong a
munmun pan a za masa sa in ki-lunggulh ahihna ki-za za ta ahih manin
lungdam hang. Gamdang ah Zomi Kipawlna tuamtuam hi ta leh mimal in
ahizongin a deihte in, Sia David Sum tawh na ki-contact thei ding hi
uh teh, cih kong theisak nuam uh hi. A lomlomin hi leh zong nasep dan
lem thei ding ahih manin nong ki-thuzak tuah tek dingun zong I
lunggulh hi. Sia David Sum’ E-mail hih a nuai a bang ahi hi.

[e-mail],

Tellohna a om leh hong theisak kik un. Topa’n ih omna ciat ah hong kem
tawntung ta hen! Amen. (Tuni Magazine Aapna hunbawlna te a
maan/Photo tawh zong hong khak ing. Na na etsak ciat dih vuau leh).

Khazih sungah;

Peter Khampu