Tonzang Youth Library: Intensive Learning toward Community Development

[Biak Lyan Sang]

Laibusaal Kipatna

Tonzang Youth Library pen Rev Tuan Khan Mung ii makaih vaihawmna tawh 2008 kum April sunga khualetui ading veina le deihsakna tawh a na kihong laibusaal ahi hi. Mailamah khualung vai a geel a hawm ding tulai khangthak khangnote in lai tawh kilawmta-in lai mah hong sim tangtang photphot uh leh cih lunggulhna tawh a na kihong laibusaal ahi hi. 

Laibusaal Lungtup

Leitung khuahun luanzia kantelin tua khualun luanzia tawh a khangto khawm khualetui hih theih nading (Intensive Learning toward Community Development) cih pen laibusaal ii ngimna bulpi ahi hi.

Laibusaal Kalsuanzia

Tonzang khua laizang, lam tun a nopna mun VMBC Biakinn paisukna lam gei lianah kongvang nih (20'x18') inndei kha khat Ks 16000/- tawh kisaap hi. Sumlepaai haksatna hang tawh laibusaal a ngak ding mi kituamcial zolo-a committee member sung panin Library Director in laibusaal hong ngaksak hi. Director ii hanciam zawhna tawh kizui-in Nipi ni simloh laibusaal kihong den hi. Kumsim laibusaal committee etphatna kinei dena, 2013 kum adingin a nuai-a teng ahi hi:

Advisors   : Rev Tuan Khan Mung, Rev Go Van Mung, Rev Thang Suan Kim

Chairman : Zam Lun Nang

Director   : Biak Lyan Sang

Members : Zam Suan Pau, Thang Khen Cin, Thang Thawn Kham, Thang Suan Dim

Tulai, laibusaal a kihon zawh kum 5, takin laibusaal-ah laibu 1500 val omin, encyclopedia aa kipan laibu nam tuamtuam kihel hi. Laibusaal panin laibu a kawm nuamte a khawnkhong tawh kal khat bu 2 ta kikawmsak-in, kum khat sungah laibu tam a kawm penpen mi 1 Lungdambawl ciangin letsong kipia hi. Tuamah bangin, laibusaal in Kawlpi panin kalsim journal nam 9 bang kila hi. Lai sim ding ngiat aa laibusaal a hawh mun penpen mi 1, Lungdambawl ciangin letsong kipia hi. Nipi kalkhat-in laibusaal a hawh mi 20 kiim kipha dena, laibu a kikawm pen 10 kiim ta ahi hi.

Laibusaal panin khualetui phattuam nading nasep tuamtuam kivaihawm nuam himah leh, sumlepaai haksatna hangin bangmah kivaihawm zo nailo hi. A kivaihawm khat bel oma, tua pen kiimlepaam lam tawh kisai nasep ahi hi.

Laibusaal Sum Neihzia le ZeekziaLaibusaal in sum nam nih nei hi. A khat pen Endowment Fund ci-in sumbul-a kinei ahi hi. Hih sumbul pen khasim 4% a meet piak tawh a zang nuamte kum khat term tawh kizangsak-a, tulai takin Ks 700 000/- kinei-in mi 5 in a zang uh hi. A dang khat pen General Fund ci-in sum a kizeekkhiatna ahi hi. Endowment Fund pana summeet le mimal tungpan a kingah sumte pen General Fund thulu nuai-ah kikoihin, tua thulu panin sum kizeekkhia hi.

Laibusaal Mailam Tupna: Tu zawh kum 5 sungin

1. Laibusaal pen inndei saap aa hon hi loin khua laizang lam tun a nopna-ah a kizatcing innmun le inn nei ding;

2. Laibusaal-ah Internet Access kingah ding;

3. Laibusaal-ah laibu a tawmpen bu 3000 bang nei ding;

4. Laibusaal-ah LED TV 50" kiim le SkyNet thuah ding;

5. Laibusaal panin khualetui phattuam nading nasep vaihawmkhia ding;

6. Library Endowment Fund Ks 20 00 000/- nei ding;

Ma hong Panpih un!

Tonzang Youth Library pen a self-support community library ahi hi. Tonzang khualetui veina le deihsakna tawh a kisem hi-in ih khualetui adingin cihna tawh a tunga mailam lungtupte-ah ma nong panpih ding committee panin kong zawn uh hi. Lungdam!

Aung Aung @ Biak Lyan Sang

Director, Tonzang Youth Library

[Zomi Community Network]

Hih pen nakpi in thupi hi! Hong hanciam toto lai un.