The Truth about Zomi Politics

[Taang Sianpu]

The Truth about Zomi Politics
(Demystified political movement and inclusive common interest among the Zomi people)

1. Gam khat, minam khat I Politics icih pen mimal khat, khua kipawlna pawl khat, beh leh phung pawl khat bek tawh aki sai thu hilo hi. Gambup vai ahih man in gambup mah tawh kisai hi. Gambup, minam bup vaihawm ding ihih leh mipi’ theihpihna (consent) leh ciaptehna lak loh a phamawh ahi hi. Ahih hang in party khat ciang, kipawlna khat ciang ding bek ahih leh tua a kipawl khawm teng bek tawh kisai masa pen ahih man in midangte zong konlawh kul tuanlo leuleu hi.
2. A uk teng, a vei zaw deuh teng, a puan kang silh teng, a pilna neilo teng, sang man nailo teng etc. cih bang a ki tuam loma ki tuam bawlna in beltuam, phaul tuam sat a sepna, sep nopna, kalsuanziate in gambup tawh kiai lo a, minam bup tawh zong kisailo cihna ahi hi.
3. Politics pen aituam bawl ding hilo a, aipeng ngaih ding ahi bek hi. “Ko a bek, ko bek tawh kisai, ei teng bek I kikup ding” icih leh tua pen party politics ahi hi. National politics dinmun a tung nailo cihna ahih man in I sapna min natawm ah zong national politics or “national or global” etc. kizang theilo nailo dingsuak phot tadih hi.
4. Politics cih I kam ah I gengen hang in, tua I gen politics pen gilsung, angsung, meltheih tanau sung ciang lel bek leh mi tampi lak ah lom khat, pawl khat a ding bek ahih leh, mipi tawh kisailo a, mipi lak ah zong kikup loh ding mah ahi hi. Ahi zong in mipi a ding, mipi’ phattuamna ding, mipi vai leh gam khat I vai a gennuam takpi ihih leh mipi leh mipi’ kipawlnate (Civil Society Organization) te lo tawh bangmah ki  tangtung zo ngeilo ding a, ki khuasuak zo ngeilo ding hi cih theikhawl leng I hun mawk beilo ding ahi hi. Biakna lo tawh mipi, minambup cik mah hun ciang in ki huamkim zo ngeilo ding hi. Biakna bek tawh ah hih theiloh mahbang in, biakna thudonlo a, peem ta bawlna tawh lah ki lawhcing zo ngeilo tuanlo ding hi. Tua pen politics I thuglaigilpi (gist) tatak ahi hi.
5. Pawl khat bek, a tuam khat bek ki kaikhawm luailuai a thugenna, thu kikupnate ahih leh national politics hilo cihna hi a, mipi in zong sawk, sai, lung hihmawh ding omlo hi. Amau a tuam pai nuam teng, a bel tuam kipawl tuam nuamteng in sawmna khat nei, phatuamna ding khat peuh bawl theih ngap hi lel ding hi. Minam bup in phattuamna a nei kei zong in amau akipawl tuam nuam teng beek in phattuamna ngah lawh leh zong Zomi mah hi veve uh ahih man in bang mah ngahloh sang hoih zaw lai veve thei hi.
6. Politics sung min vawh leh, min zat zia zong thupi mahmah hi. Ahi zong in a thupi pen hi masa den lo hi. Gentehna: NLD (National League for Democracy) cih sung ah “Myanmar” cih kammal khat zong kihello hi. Burma lah kihello, Burmese lah kihel tuanlo hi. Myanmar cih laimal kihello ahih man in Kawlgam tawh kisailo, Kawlgam veilo, Kawlgam itlo, Kawlgam taisan hi, a thu bek hi akici thei diang hiam? Kici theilo hi cih pen I theihsa hi. (Politics is beyond names. It’s all about policy and principal).
7. Party politics leh national politics ki telcianlo in, party politics pen national politics a sa kha Zomi sung ah tampi a om kawmkal ah, national politics pen partisan politics kalsuan dan in a kalsuan pih sawmsawm zong tawm lo hi leh kilawm hi. A tel pen ding a I upmawh makai pawkhat te natawm in zong tello thei a, a telloh lam zong a mimal mahmah in kitheilo zong tampi om thei hi.
8. Party politics leh National Politics a ki batlohna leh a ki zatna, a ki lamdan zia Zomi sung ah ki gen ngeillo citciat hi. Gentehna in: America gam ah party tuamtuam a omna sung ah mipi’ tawh aki nai zaw deuh pen Republican leh Democrats ahi uh hi. Republican mee kuang a lui dingte in ”Republican mee na piak kei leh America mi hilo. American gal suak ding, USA gam leh leitang a itlo hi ding hi” ci theilo a, zong ci tatak ngeilo ding uh hi. Tua mah bang in Democrats in zong “no ka Democrats party uh mee (vote) ong pialo nahih man un American hi nawnlo ding, USA gam itlote…” ci-in mukpik san in kobawl theilo a, tua ci ngeilo ding uh hi. Hih pe party politics leh national politics a khen theih man uh ahi hi. Bang hang hiam cih leh Party politics leh National Politics pen tel sinsen uh a, a semte ngiat in zong thei uh in, mipi in zong telpih uh ahih man ahi hi.
9. Politics pen gam lak a omte bek, khuapi sung a omte bek, khuata a omte bek, gamdang a omte bek cih bang in a mun leh a mi kilom zia deidan in ki sem zenzen hi leh tua politics, tua kalsuanzia pen mipi a ding a kibawl politics hilo cihna hi a, mipi tawh akisai loh mahbang in (minority interest for minority benefit) ahih man in national and politics a sem ding, a sem zo ding leh a sem thei takpi ding zon kul ding, kipat kul ding cihna ahi hi.

 

10.  Politics I ngeina tatak ah gal hiam (violent and arm) tawi masa lozaw uh hi. Leitungbup tangthu ah mi vauna leh mi ausakna tawh politics a semte sawt khuasuak zo ngeilo uh hi. Gentehna: US ah party pite in galvan van tuamtuam ahi Air Force, Navy leh leilam cihte tung ah kingah masa lo uh hi. Mite in a neih na tawm uh ki phatsak pihlo uh a, amau neihna suang masa lo uh hi. Ei pawl ahih leh I neihloh na tawm I ki suanpih, I ki phatsak ph kha hiam cih ngaihsut huai mahmah hi. Tuate pen a kah party khat peuhpeuh in, a zo te in a kisap hun ciang a, a zat tangzang, a sawltak dingte hi bek a, political structure sung ah kihello hi.

 

11.  Tu ciangciang I gam sung ah, gambup a puah zo ding, minam bup a zuun zo ding kipawlna (single organization or party party)  khat zong ki mu nailo phot tadih hi. US a Democrat leh Republican te khong tawh ki tehkak mawkmawk thei bel nailo pho hi. Amau pen party khat ahih uh hang in gambup, minam bup a ukzo, a makaihzo te ciang dinmun hi ta uh hi. Zomi sung, Zogam sung ah tua bang tu ciang a om nailohna zong Pasian in Zomi-te sem khawm lai un, ki pumkhat lai un, mimal mahmah  tawm lua lai nahih man un, hong cihna zong hi kha ding hi. Party khat guak tangdin tawh, kipawlna khat guak pum phut tawh gam bup I ki tangsapna (national interest) a dinzo ding hi leng, midangte tawh kipawl theilo lua ding, ei leh ei bek tuam din, teu len ding ihih lam Pasian in thei hi ding hi. Eima party khat guak bek in, eima kipawlna khat bek tawh Zogam leh Zomi I kitangsapnate a sepsak zo I om nailoh zah khat in, a ki pum ngap leh ei leh ei dinmun, I dinna leitang (foundation) a ki thei nailo makai sung natawm ah tampi mah ki om lai veve hi leh kilawm hi.

 

12.  Party tatak te in gam bup leh minam bup a ding geelna nei in, huamkim uh a, sepna nei uh hi. Zom te party cihte in ahih leh gambup uk na ding vai (Gtn. Kawlgam bup uk na ding) vai hawm masa hetlo uh hi. Zomi-te ei leh ei beek ki-uk zo leng cih ciang hi phot a, tua ei leh ei I ki-uk na ding mah zong, Kawlgam bup I majority lak ah, minority ahi Chin State, tua sung ah Tedim leh Tonzang township sung ah zong Khua khempeuh or pawlpi khempeh natawm zong a huam kim zolo, gam leh nam a ding in Zomi kipawlna tampi a omna lak ah “ei a tua teng, a uk zawk deuh, a min nei zaw deuh teng” cih bang in ki tuambawl suksuk lai, kituah luailuai ciang bek tawh Kawlgam bup zong hi nailo, Zogam bup zong ahilo, Tedim leh Tonzang gambup natawm zong ki huaikim zo nailo lai tawh kibang hi.

 

13.  Zomi politics kipawlna khat bek or a dang om peuhmah hiam ci in pawlkhatte bang in deih kaih lua zawzen ici diam, deihkaih lolua zaw ici diam, in a gen zong om kha thei maitak hi. Zomi min a ki vawh man in Zomi a ding a sem zong hi khinpahlo in, Zomi a kivawh a akivawh kei zong in, minam nasep pen min leh za neihna sang thukzaw pek (beyond names  and fame) ahi hi (Min deih man bek n a sem te lo buang… ). NLD cih laimal sung ah Myanmar or Burma cih kammal kihello ahih man in NLD in Kawlgam politics a ding a semlo hi. Kawlgam politics kipawlna hilo hi, politics a ding tatak hilo uh hi akici thei takpi mah ding hiam? Gam leh nam nasepna ah kum tampi a phak khit zawh I lawhcin zah ding I lawhcin nailohna zong I picinlahna leh, thu I muhloh man zong nahi thei hi cih ngaihsut  kik huai hi. Min ciang bek tawh a buai zong om lai hi leh kilawm hi. “MIN A DING” buai ding bek hi a, “MIN TAWH” buai khak ding hi peuhmah lo hi. “Min deih man bek, min a ding bek khualna” (just the name sake) tawh a buaite in thu leh la tatak vaihawm ding hun nei man lo, sep ding hun nei manlo zaw uh hi.

 

14.  Gam pualam a omte in a thubek, a gen bek mah hi aci pawl khat om a tua mahbang in, gamsung a omte zong lah gu neilo gul (tuigul) tawh kibang bek lel uh hi. Bang mah sem thei tuanlo uh hi aci zong lah om hi. Tua ding ngiat in tungsiahte in bawl in, gakcip ahih manin, bang mah tang thei tuano uh hi aci zong lah om leuleu hi. Gamsung a I m a, gampua ah I om zong in I vek in a kibang vive hi lel hi aci zong lah om lai hi. Kibang leh kibanglo bel thei khang in, gamsung a omte in “gampua lam a te in hong panpih uh…” acih laitak in, gamdang a omte in bang mah a gal sep theihloh kawmkal uh ah sum thalawh in, pilna sin kawm in, gam khangtote ki-ukzia, ki-ukdan, muhna leh sinna nei gige den a tua ban ah gamdang a om Zomi kipawlnate ding bek hilo in Zogam leh Zomi a ding in sum leh paai ngiat ban ah thu leh la tampi tawh huhna pia in, panpih kawm thei lai uh hi. A tatak in pen Zomi it takpi, Zogam vei takpi ihih leh gamsung, gampua kidem bawl in, ki deidan bawl a, kuan sem zaw, kuan vei zaw cih ciang bek tawh buai ding, ki deidan ding hilo zaw a gamsung leh gampua ki pawlkhawm in I sep khop, I mapan khop ciang bek in a ki lawhcing thei pan ding ahi zaw ahih lam I phawk ding kisam hi.

 

15.  Democracy tatkak leh Gam khat, Minam khat I Politics pen mial khat bek i kellu puak bang a puak ding hi ngeilo hi. Mimal khat bek, kipawlna khat bek in puazo ngeilo ding hi. Pua zo phial mah leh zong van gik pi hi ding a, pua lah mahah ai ding hi. Nek khop lim, puak khop zang acih mahbang in ki puak pih diamdiak ding, gam mi khempeuh, kipawlna khempeuh kipawl khawm a mapan ding, mipi’ mawhpuak ahi  zaw hi. Zomi khempeuh minam khat, gam khat, aw khat hih sawm ni!

 

Taang Sianpu

October 14, 2011
http://friend.ly/sianpu
http://twitter.com/sianpu
http://facebook.com/sianpu
http://facebook.com/TaangSianpu

 

Downoad PDF version of this article here The Truth about Zomi Politics