Tu kum 2010  in USA gam Portland leh Tulsa pan in Papi nih ko kiang ah hong zin in pawlpi ah hun hong zangh tuak uh hi.
A nih un USA ah aom zawh uh kum ( 10 ) val tuak bang apha hi ta-in, a tate uh eikiang  pan in khang
khia lo-in, USA pan mah in khang khia zaw uh hi.


A masa pa hong  thugen na-ah, " Ka tate pen Mangpau in hopih kha kei un, amau eipau thei uh ahi maw, inn sung ah eipau bek in ka ki hopih uh" hong ci hi.
Amau pen US gam mi hi khin uh a, US pan in Sang zong man khin ta uh hi.

A nihna pa leuleu in, hong gen na-ah, "khat vei dam meel lo-in ka om laitak in, ka tapa neu pen in  Daddy I Love You hong ci-in tua in ka lungsim hong su kha mahmah hi" ciin hong gen hi.

A cihna ah:- tua laitak in amah pen cina in gim simsim pian in, a tapa in a Pa  a ngaihna agen nuam hi. " Ka tapa in eipau thei lo-in, mikang pau in Daddy I Love You hong cih pen ka lungsim hong su kha mahmah" ci hi.

I Pate nih pen Topa lenggah huansung ah nasem tuak uh hi-in, a mipih te hong it, hong ngai mahmah tuak Pasian nasem te ahi uhi.

Kua zaw Pa Hoih?

Kongit mahmah Pate aw,

Na innkuan sung ah eipau in na pau loh khak ding uh hong phal kengh!
Na innkuan sung ah ei tatdan in na tat loh khak ding uh hong phal kengh!

Na tate uh ei pau in apau theih loh khak ding lau lua ing!
Na tate un ei lai a sim theih loh khak ding dah lua ing!

Na tate uh Zo min tawh nasap loh khak ding hong phal kengh!
Na tate un Zo min a neihloh khak ding dah lua ing!


Na tate un Zomi ahih lam a mangngilh khak ding phal kei ing!

Na tate un Zomi te a daaipih ngam loh khak ding lau lua ingh!

Zomi hibuang, Zo min na neih loh khak ding,
Zomi hibuang, Zo pau na pau theih loh khak ding;
Zomi hibuang, Zolai na sim theih loh khak ding,
Zomi hibuang, Zomi nakisak loh khak ding
;

A lunglau den,
Pau Khan Kap
22 December 2010

Views: 47

Comments are closed for this blog post

© 2024   Created by Zomi Community Network.   Powered by

Badges  |  Report an Issue  |  Terms of Service