LEITUNG BUP ZOMITE TUNGAH THU ZAKSAKNA

[Zomi Center]

LEITUNG BUP ZOMITE TUNGAH THU ZAKSAKNA

Pianna Zogam le leitung buppi ah kikhena om kong it Zomite khempeuh tungah Leitungbup Zomi Kipawlna (Global Zomi Alliance) min tawh kong hopih hi. I biak i paai Pasian kiang panin daihna le matut zawhna thuphate note khempeuh tungah a thakin hong tungkim ciat tahen!

 

Pasian in mihingte hong bawl ciangin a lungnuam thei ding, a kikhawl liailiai thei dinga hong bawl a hihi. Tua bang mahin minam (race) hong bawl ciangin zong kikhawl liailiai-in, nuamsa-in a kikhenglah thei dinga hong bawl a hihi. Tua banga a pianna dingin minam khempeuh tungah Pasian in Minam Pawi (cultural festival) hong piatek hi. Lai Siangtho sung en lehang zong, Pasian in Ama’ teelsa Israel minamte minam pawi na pia-in, tua pawite a hun tun simin a kum a kumin na na bawl uh hi. Gentehna-in, Purim pawi le Paisan pawi (Passover).  Hih pawite in a minam uh ki-it sakin, a khang tangthute uh phawksak dena, a minam uh kiphungvuh-in koilai, koilai tung tale-uh, minam kip suak uh hi. 

 

Ei Zomite zong Pasian in i Minam Pawi dingin Anlaak pawi ahi “KHUADO PAWI” hong pia hi. Tuuktun khat le khat kikal ciaptehna ahih manin Zomite adingin Kum Thak Pawi zong kici thei hi. I minamte kikholh khawmna ding, kikhenlahna ding leh minam kiphungvuhna ding KHUADO PAWI a hihi. Tua pen tangtawng aa  kipanin i pu i pate in a na pat khanggui kizoma i neih Zomi namte pawipi a hihi. A hun pen Khuado kha mah zong i cih pah ahi Mikang kha-in October kha le Kawl kha-in Thadinkyut kha  hi-a, Calendar kha-in kha sawmna a hihi. 

 

Tu a Zomi khempeuh tungah kong zaksaknop thu in, Zomite i omom, i tuntunna-ah tua i minam pawi ahi, KHUADO PAWI i bawl hamtang nading thu a hihi. A nuam theithei-in bawlin, tukhawm khawlkhawm-in, i biak Pasian’ tungah mimal thupha le minam thupha nget khawm dingin kong phawksak nuam hi. Taanga kipanin a ni pen a kibangin seh lian theih hi lo a, Khuado kha sung hipeuh leh, eima’ vai tawh a kituak, a kilem penpen dinga bawl a hihi. 

 

Kong it Zomite khempeuh aw, 2012 kumin zong i minam pawipi ahi KHUADO PAWI pen na omna munmun, na tunna munmun uhah, Khuado kha sungin na na bawl nadingun itna tawh kong zasak hi. 

 

I biak Pasian in hih KHUADO PAWIPI tungtawnin leitungbupa om Zomi khempeuh a thakin thupha hong pia-in, hong mainawtpih kimciat tahen! 

 

Itna takpi tawh, 

 

Rev. Dr. S Pau Khan En 

GZA Makaipi 

August 3, 2012

 

PDF Version Download Leitungbup Zomi Khempeuh Hopihna (Khuado).pdf