KIM-LE-PAAM KEP SIAMNA TAWH KISAI KIMUHKHOPNA

[Zomi Center]

Kalay Council of Churches (KCC), Nyi Tha Phunggyi sang leh Kalay Diocese makaihna tawh Kawlpi huamsung Biakna tuamtuamte leh Buddish kigawmin, "Kim-le-paam kepsiamna" cih tawh kisai holimna hun thupitak kinei hi.

Tuni, June 1, 2012 (Am.7:00-12:00) sungteng Bishop Compound, a dawl tungnung meeting haal, Kalaymyo ah kinei hi. Zingsangin Breakfast kine hi.  Hih munah Christian lampanin mi 50 leh Buddish lampanin 50 mah kisam a, mi 100 bangmah kihel thei hi. Kawlpi Phunggyi sang mun giat panin Sayadaw te mi 8 mah hong paithei uh hi.  Guahzu daikai nuai ah
hi ta leh lunglut takin kipai ciat a, hun nuamtakin kizang thei hi. 

Hun-uk: Revd Lang Suan Thawn (a) KaThawn hi a, Thukonghonna pen, U Myo Nwin (Chief of Forestry, Kalay Township) in nei hi. Tua panin Kawlpi Phunggyi mangpi'pa in thugenna hong nei a, tua khit ciangin amau Phunggyi kipawlna, Kalay panin Thuzeekpi ahi, Nyi Tha Phunggui mangpipa in hong nei a, dotna leh dawnna zong om hi.

Hun nihna-ah Tapidaw lampanin, Bishop Felix Lian Khen Thang in hong nei to leuleu a, lungluthuaitak leh muibuntakin hong gen to ngeungeu a, zaknopin thupi kisa mahmah ciat hi. LST thuciamlui-ah Piancil a piansaknate leh Isaiah sung a kipan, Late sung hi ta leh LST tungtawnin thukong honna hong nei a, i pute bangin zong zaknopsa-in lunglut tuak mahmah uh hi. Ih Bishoppa pen Zomite' adingin angtang huai mahmah ahihna ka phawk thakthak a, tha ka ngah mahmah hi. Pasian in hibang mi hong piak mawk pen i pahtawi a, i panpih ding longal om lo hi, ka cinuam hi.

Media lampanin 11 Journalist kician mahmnah khat leh a pawlte zong hong pai uh a, video camera man zong Nyi Tha te' zat tangzang khat hong ton pih uh hi. Eimau lampanin E.Mung (Layseih Mung) in video hmattan hong tensak a, ken' camera tavuan ka na la hi.

A nunung lamah Revd Suang Cin Pau (Chairman, KVBC) in lungdamkohna hong nei a, tua khit ciangin Hun-uk i thuciaptehna tomkim pulakna neih khit ciangin hun zawh tangkona hong nei a, tua panin mapang pidiakteng group photo kilakna neih khit ciangin Lunch, sunan nekna kinei hi. Aksa leh Ngasa sa bal malin kimal himai hi.

NB: Hih bang kimuhkhopna hong piankhiatna dingin a "leikha" dinmun hong la masa pen Sia Lian Khan Tuang (a) Lian Tuang (Micro Wave) leh Sia Ka Thawn te' tungah i lungdam mahmah hi. (Tuhun pen kipawl a nasepkhop hun ahih manin mailam ah hibang dan thu hoih tuamtuamte i zop toh zel ding thupi mahmah ding hi, cih i pulakbeh nuam hi).

Maan tampi ka ziahna lakah muhtheih pak dingin tawm hong khak ung. Thu-le-la gentuak a kisam lai a om leh lawmte'n zong hong kum le uh hi'n teh. Ih omna ciatah Topa' thupha ci ni.

 

Thupuak,

Peter Khampu