KEIMA THU TAWM 

              Kei pen kaminpi Tg. Ngin Sian Thang hi-in hongkisapna pen Thangno, Sian, Lawmsian, Lawmthang, Ngian, cihbang in nopsak dandan in hongkisam hi. Phunom khua Pa Sian Za Dal leh Nu Cing Lawh Nuam te sungpan' apiang ta 2na ka hihi. Kapa in 2003 kum in Cancer natna tawh hongnusia hi. Ka nu pen sikhang leh luvai natna tawh omden a hihman in nuntaak haksat man in 2008 kum in Malaysia ah sumzong dingin ka vapaikhia hi. Himah ta leh ka tun khit kha 3 a cin lian in ka nungguh L4, L5 kisia in lupna tung ah tho theilo, ki heek theilo in omdan ding theilo in ka omkhit kha khat a cin ciang in kanasepna pu te'n ka agent tekiang ah hongpuak kik in agent te'n Kawlgam hong puakkik sawmpian a hihman in Malaysia Zomi Zumpi (ZAM) te' hong hanciamsak na tawh Zato leh UN lam ah hong mapi-in kei ading lampi hoihpen hongngahsak a hihman in Zomi leh Zomi makai khat kimciat kei a ding in manpha mahmah hi.

 

              Malaysia ah tuabang haksatna tawh ka-om ciangin  ka innlak sanggam te khat in neeklehdawn leh sum leh paai tuamtuam hongsik himah ta leh hunkhat ciang in tua kasanggampa in Palik te' matna hong thuak ciang in ngaisut bei a hihman in lampai siamthei nailo pi mah in part time nasep ding kazon leh Pasian hehpihna tawh Computer puahna ka ngahhi. Ahi zong in Malaysia ah pen computer pair part muhhak lua ahihman in kha khat bek kasemhi. Tua ka computer puah tepen ZAM, ACR, CRC leh kipawlna tuamtuam te pan' hongki la theizel hi. 

 

              Tuapan Outbac Broga Adventure Camp ah nasep kangah leuleu a, Maintenance ka sem hi. Ka Manager pa-in email na neihiam? hong ci a, neilo pi mah in Computer/Internet ka sin/zatnop man in nei kacikhem hi. tua leh Internet nadeih leh hih computer (asia aneih khat) puah inla internet man ding hongpia in hong ci-in puahpah in internet manding kapia hi. Internet ka neihciil nitaak pen computer ka sawkciil nitaak hipah hi. Email, Blog, Website bangci kibawl cihzong ka theinai kei hi. Lawmte' gen nei kazaak pawl khat mot-hon in ka hihhih leh email leh free website(Ning site leh Blogger site) kabawl theipah hi.

 

              Tua ciang kalawm te hihdan khawng enen in Website leh email nuamtak in ka en/zang thei hi. Tuabang a website ka-et theih ciangin Zomi Website tuamtuam enen in thupi leh hoih kasa mahmah hi. Tua bang a hoihkasak mahmah ciang in bangci bawlding, bang program kizang cih ka kankan a kei leh kei in kasinsin hi. Tua leh asawt lo-in ZOCIA cihkhat min kaza a thupi kasa mahmah  a **e-hei!.. banghun ciang in ZOCIA tawh innkuan khat in kaom zo dinghiam..ci-in a hihhang a lah "Membership" khawng ka-et ciang a lah kei-i zop zawh dingpak ding hikei- cizel. Sangkah ding computer sin ding ci lenglah damlo/sumneilo hizel kawikawi ka hih man in mi theihbang ka theihnai loh hang in ka lunggulh IT leh cidamna ah hiciang ka theihna ding ma hongpanpih Pasian leh Zomi akua mapeuh tung ah lungdamna lianpi kongko hi. 

 

Kei ngaihsut leh ZOCIA KAVEINA (pen)

              Leitung ah IT lotawh na kisem theinawnlo (a niampen Microsoft Word themkhat beek hihthei cih)dan himawk ahihman in ei Zomi te'n migam milei ah nasep hoih i ngah theihnading.

               Zogam khuaneuneu te-ah computer/internet omlo bek lo-in Tan 10 ciangciang ah zong computer cihpen Physic sungah amin leh alim bek mah kisin himawk ahihman in Zomi akua maciat in Computer isawkkim theih nading.

              Zocia pen amin pua bek hilo a Hongsemkhia takpi na hih man un keima tumtak in Zomi kipawlna te lak ah amanpha penpen a kangaihsut hi-in Zomi sungbek ah hilo-in Hakha(Laimi)leh adang dang a ding zong ah tampi sepkhiatna kimu ahih man in Zomi (ZOCIA) cih pen keima tumtak in angtang mahmah ing.

 

              ZOCIA WEBSITE ah zong ka hawhden a menu(page) te pen na omkim nai lo a hih manin kei ma ngaihsut tawm pawlkhat honggen leng:

Blog ah pen theihuai zattawm pawlkhat beek koihzo leeng, Tuaciang a page dingpen host napan izang kei zong in Blog dangkhat zangin Dictionary dan in <iframe> zang leeng ,

News ah bel ZOCIA(International) pan nasep ding te leh nasep khiat te hong suaksak zel le-uh teh cih kei ngaihsut,

 

               Ka ki piakkhiat zawh danding bel tu'n zong IT lam nasep kazonlaitak hi-in hun ciangtan cihdan bel thei khang in ka uuk penpen lam ah kipawlna a hihman in keima hih theihzah, hihtheih bang nikhat bel nai 2 sungpan atungsiah keima hin neih bangbang pen Computer ah hun apia den hi-ing. Banghang hiam cihleh kei leh kei a asin ka hihciang a, keima home school a kangaihsut hi. Mite bang a lukhu neelkai khu cihbel hilo kahi maw...

 

              Zomi te zong Persional blog kitamzat mahmah ahihman in tua i blog te adiak in akitamzat Blogger pen bangci-in picing sak, etlawmsak, Website bangmah hisak ding cih zong kadeih khat hi-in asiamsa lah om, apost thei ciang zong ki-om ahihman in hih Zocia Blog ah post thei leeng Zomi kim i theih Website ahihman in tampi nuamtuam in ka-um hi. Kei bang in HTML, CSS. JS cih bang tawmtawm kasawktheih na pen Ning site tepan' , Blogger pan a ka kankan leh online tutorial pan vive a hihman in Blog post nei leeng kikhang tuam in a-um hi-ing.

 

TULAITAK  keima Aiituam sep

              Zokam Lai Siangtho Site

              Online pan Zolai sintheih nading

              Create Website Template

 

cihbang keima ngaihsut zia tuamtuam hi-in ka laigelhzia zong telhak thei ding hi. Money lam pang bel (0) tawh kipan pan ka hih man in bangmah sepzawh kician omnailo hiphot. kei ma free blog leh learning teng hiphot. A hizong septheih aom leh septheihbangbang Zomi te' phattuamna ding kaseptheih a omleh a ci hi-ing.

 

Lungdam

Tg. Thangno@Zo Hornbill

Computer acih i tungah ka khut tawh kasawk kipat: June 2009 hipan ei guai..hongnuihsan kei unmaw..

"HUH" cih kammal pen kadeih mahmah khat hi. Kei ma khekhaap tantan.

Views: 87

Comment

You need to be a member of Zomi Community Network - Your Network to add comments!

Join Zomi Community Network - Your Network

Comment by Taang Sianpu on July 27, 2011 at 3:11am
I vek in hanciam to khawm ciat ni ei guai. Na vek un hong pakta mahmah ingh. Na hanciamnate uh leh na kuhkalnate thupi in pahtak huai mahmah hi!
Comment by L T Thang on July 26, 2011 at 1:01am

Na ngaih sut nate thupi kongsa hi.Mikiang ah ihva sin sang in ei leh ei kisin zoleng kisiam zaw sawp mahding

hi.Mikiang sumtawh kisin ahih man in ahun sawt dinghi.Hongpak ta na lawm

© 2024   Created by Zomi Community Network.   Powered by

Badges  |  Report an Issue  |  Terms of Service