Itna leh zahtakna tawh Pu Gou Gin mangpha ka khak hi

[Zomi Center]

Pu T. Gou Gin ka itna tawh zahtakna pia in mangpha ka khak hi

 

Zogam leh Zomi tawh kisai in Zomi-te sung ah ka zahtak pen khat ahi, Pu T. Gou Gin in mual hong liapsanta cih thu ka zak a kipan, lungleng khuangai in ka om a, ka dah mahmah hi. Zomi buppi a’ding inzong a dah huai ahihna thu tel mahmah ka hih manin hih ka dahna thu hong pulakkhia hi ingh.

 

Pu Gou Gin tawh ka kithuahkhak sung tengin ama tung panin gam leh minam vai, gam ki-ukna leh gam kimakaih dan, Zomi Reunification Movement India gam Politics tawh kisai thu tampi ka sinkha hi. Ka kithuah hun sung atom hangin, a sun a zan mahin a kizui ka hih manun, minam makai picing, makai kician, makai thupi mahmah khat, a etteh huai mi muan huai khat ahihna ka tel mahmah hi. Zomi sung ciangbek hilo minam tuamtuamte lak ah, kumpi thuneite lak ah a kihel, a ta khat ahih manin, ka zahtakna lian mahmah hi. Zong ka it mahmah khat ahi hi.

 

Pu Gou Gin pen Zomi a it mahmah, Zomi min a gum, Zomi-te minam kician khat ahihna a lamto mahmah, sak leh khang, sim leh mal khempeuh huamkim in, Zomi kici minam khat ihhihna a pholak, a kiplet mahmah Zomi makai masa khat ahi hi.

 

Ka mangngilh theihloh ama zia khatin, khat vei, Sugnu khua panin singtang lam, taamlak nawkin Zomi-te tenna khuata pawl khat vaan dingin ka kuan uhhi. Singtang gamteng pen kizawng mahmahlai ahih manin, Pu Gou Gin (tua lai in Ex. Minister hita) hong zin ding cih a theih uh ciangin, a hih theihtawp un kisa in, khuazang in hong dawn uhhi. A hih theih zahun ankuang hong lui uhhi. Mun khat ka tunna uh ah, Pu Gou Gin tawh khuazang in ankuang umkhawm dingin na vaihawm uh a, Pu Gou Gin leh a pawl teng an nekna ding ci-in a nuam zawdeuh dingin mun khat na kipuah hi. Tua pen Pu Gou Gin in keikiang ah, “Khup aw, ih mite zawng mahmah ahihteh, amau ih makaih nop leh amau tawh kibang in an nekhawm tukhawm ding hihang” hong ci in, mipi an kuang umna ding a kibawl, kuangpi khat um in, sual tung ah hong tusuk hi. Kuangpi khat sung ah buhsih leh, zawngtah akikhah buhciim kigawm, aksa tawmtawm kikhah pen ka kim a tu teng tawh sawkkhawm in ka nekhawm uhhi. Ama tutna ding a kibawl a mun nuam pen ah pitek putekte tusak hi. Ka om dan hong nuam hetlo in, ka zahtakna khang semsem hi. Annek khit ciangin, hong genbeh khat omlai a; “ih mite zawng mahmah a, hai mahmahlai hihang, tua a zawng, a hai mite pen ih mipihte hi, amaute ih makaih nop leh amau tawh kibang in ih om masak kul ding hi” hong ci hi. Ngaihsutpak in a thupilo tawh hong kibang napi, Imphal ka tunkik uh ciangin, singtang a mizawng mihai a mipihte tawh a kibang a ankuang umkhawm pa penin Imphal Ministers zumpi sung ah kuamah kihta peuhmahlo in, uliante tawh hong kimuhpih thei hi. A mipihte a’ding in a deihsakna teng uliante tung ah tangtak in genpheipah hi. A niam pen tawhlah kithuah thei a, a sang pente tawhzong kithuah theimawk hi. Amah teekteek bang cileng, nuntakna khat sung a’ding in mihau, mi ci thei, mipil khat hi a, khuapi sung ah nuamtak in a nungta thei khat ahi hi. Zomi-te a it man, a vei man, a lung hihmawh man, a khual man, a deihsak manin, zu leh ham leh, a sak a khang ah a mipihte vaan ding, huai ding pen haksa a sa hetlo Zomi-te makaipi khat ahi hi.

 

Zomi-te sung ah Pu Gou Gin in ahong tuhsa khaici a pokhin hi a, a gahphat semsemna ding, a limci’t semsemna dingin khangthakte tung ah Pu Gou Gin in minam vaipuak ahong guan hita hi. Sak leh khang, sim leh mal kikhenlo in, khuapau zui a kituam bawlnate hemkhia a, Zomi min tawh minam kician khatin kiptak in ih din tawntung zawhna dingin Pu Gou Gin zahtakna piakawm in mainawt huai mahmah hi.

 

Pu Gou Gin ka phawkna, ka itna leh zahtakna ka piakna in ka lunglen khuangaihna hong pulak hi ingh ei.

 

 

Go Sawm Khup

Tulsa, OK. USA

 

June 6, 2012