GZA Khawmpi aa Ding Sum Ngahna List (Khawmpi Report #2)

[Zomi Center]

Mun Tuamtuam aa Om Zomi U leh Nau te,

Kumthak 2012 sung hong lutpih ih biak Pasian kiangpan hongpai thupha namkim in nang leh na innkuan sung ban ah Zomi khempeuh tungah hongtung ta hen!

December 13-18, 2011 sung GZA Makai Khawmpi (Kawlpi) nuamtak aa hong zawhpih ih Pasian min ih phat aa, hibang aa lawhcin na ih neih nading in thungetna leh sum leh pai tawh ma apang Zomi khempeuh tungah zong lungdam thu ihpuak hi.

Gamsung gampua aa om Zomi te itna bulphuh aa na ih sepkhop ciang in tha ngah huai leh lungdam huai mahmah aa, a paisa ih pi ih pu ten hong theihpih le uh hong lungdampih mahmah ding in ka um aa, vantung aa ih pa Pasian in zong hong lungkim pih ding in ka lamen hi.

A masa pen GZA Makai Khawmpi December 13-18, 2011 aa ding aa huhna hong kipia teng, a pia khia mimal leh kipawlna min te list pdf file tawh bawl in attachment tawh hongkhak ing. Nana et theih tekding uh lamen ing. Ah en theilo ih tam aa leh, e-mail mahmah ah zong hong khak kik lai ning. Sum vaitawh kisai hi aa, a ki pheng zat ding deih masa lo ih hih man in, pdf format tawh hong khak ka hihi.

Tutung GZA khawmpi sung aa khawmpi hong kah makai 345 zindo nading in Kawlpi (Kalaymyo) dungsuk aa biakna pawlpi tuamtuam le mimal te tungpan in Ks. 30, 80000 (teng sawmthum leh tul sawmgiat) kingah aa, Gamdang aa om Zomi te tungpan in US$ 3820 leh Ks. 16,23000 (teng sawm leh teng guk leh tul sawmnih leh tul thum) a kigawm in Ks. Ks. 44,88000 kingah hi. Gamsung gampua pan ih mapan khopna sum ngahzah kigawm pen Ks. 75,68000 (teng sawm sagih leh teng nga leh tul sawmguk leh tul giat) a hihi. A pia khia mimal, pawlpi leh kipawlna tuamtuam khempeuh tungah ih Topan a zah tampi in hong thuk kik sak tahen!

Mun leh mual a FREE aa hong zangsak Chin Taungtan Hotel, Agape pawlpi, ZBCM te ban ah, tha leh ngal sum leh pai tampi bei aa mapang mimal khempeuh te tungah zong ih lungdam mahmah aa Topa tung ah thu ih ngetsak hi. A mau sum leh pai bei aa khawmpi hongkah makai mimal khempeuh tungah zong lungdam ihko hi.

Nana zak khit ding bangmah un, Fundraising Committee leh Rev. Pau Khai makaih natawh Mailam ah Zomi leh Zogam khantoh nading aa nasep ih kipat nading in, midang te tungah huhna nget tawh kipan masa lo in, ei Zomi te sung mahmah pan in ih hih theihzah in tha san ni ci in, upna kamciam leh muanna tawh mimal honkhat kiseh aa, a kigawm in Ks.2500,00000 (tenng tulnih leh zanga) kingah hi. Bishop pa bang in Ks. 500000 (teng nga) pia pah aa, Ko Ko Thang in zong Ks. 10,00000 hongpia pah hi. Sanggam te pawl khat bang in a bilbah lai a pia tawh, a nai bulh lai suah khia aa a pia tawh ih muh ciang in ih lungsim hongsukha mahmah aa, ihgam leh ih lei khantoh nading Pasian in hong deihsak ban ah mipi te in zong ki vei mahmah ta hi cih hong kilang sak hi. 

Zogam leh mun tuamtuam aa om Zomi te sungpan hong kiseh nailo te hong kiseh behbeh laiding aa, veina tawh keizong hong kihel nuam ing a cite in GZA makai te tungah nong theihsak nading in hong zasak ing.

Nasep a kipan ding ih hih man in, mailam ah ih om mun ciatpan panmun la in, a sem te gal et lel lo in, khut kilen aa ma ih pankhop leh a khangto minam taktak ih suak ding hi. 

Theihsak Kholhna:  Khawmpi sung aa thu kikupna te leh khensat na te a kician in a sawto in kong zasak ding hi. Recording Secretary ding aa a kiseh mi 3 te tungpan in Final Report hong tung nailo a hih man hi. Ka ngah phet in a sawtlo in Khawmpi Report #3 kong khahkhia ding hi.

Hih lai a simkha mimal khempeuh tungah Pasian kiangpan kumthak thupha!  


Dr. Chin Do Kham
General Secretary
Global Zomi Alliance

PDF Report Download: 

GZA Khawmpi  ding Gamdangpan Sum Ngahna List as of January 2012.pdf

GZA Makai Khawmpi Zindona LOCAL Pan Sumngahna.pdf