Breaking News: Zangkong Khuasung ah Zomi nam it mahmah khat

[Taang Sianpu]

Zomi Breaking News:

A. Zangkong khuapi aizang Sule pagoda gei a singkung nuai, Zozum daai pam ah Zomi tangvalno khat a guaktang in lampi gei ah kamtuam pau tawh pau phatphat in om cih thu:-

B. Hih thu pen bang hang in Zomi lawmlawm Zangkong khuapi sung ah guaktang in kamtuam pau tawh zumna ding mel theilo in, lu leh taw theilo in om cih thu akizak phet in a thu leh la kician tak in a kan khia ding in Zozum HQ pan in papi pawl khat kiseh hi.

C. A thu leh la khempeuh a kankhiat khit tak uh teh muh khiat thu in ahih leh tua Zomi Tangval pa min pen, "Tg. Zomi It Pen" hi cih thei khia uh hi. A thuk zaw in a kan beh uh ciang in tua Tg. Zomi It Pen in Zomi khempeuh leh ah amah a it pen ding in akiciam ngam sinsen khat zong hih tuak lai a, a nuntakna natawm a pia ngam khat ahih lam mukhia uh hi.

D. Zomi tua zah in a it khat in khuasung mipi muhna mun ah guaktang in, theihloh kampau tawh bang hangin pau hiam cih mipi lam pan in lamdang kisa mahmah ahih man in a thu nakpi in a kan cian beh uh ciang in a nuai a teng hong mukhia uh hi.

"Tg. Zomi It Pen" in khuasung singkung nuai ah a guaktang in a omna pen Zomi a it luat man hi ci uh hi. Bang hang hiam cih leh:-

1. Zomi it lua ahih man in Zomi te bawlsa, lamsa, neihsa inn sung bek ah om nuam a, Zomi-te inn lamsa pen Zangong khuasung ah a zonzon hang in mu paklo ahih man in, Zomi itna hang mah tawh amah bel tuam om in lampi tung ah a om hih tuak hi.

2. Kamtuam pau in bang hang in pau hiam cih a ki kan tak ciang in, amah peu a pau-awk khat ahih man in ama pau pen a zate in kamtuam pau asa kha uh hih tuak hi. A tatak in eipau a paupau mah ci uh hi.

3. Pau theilo ahih man in a thu leh la a kidot tak ciang in lai tawh gelh thei bek hi. A lamdang khat ah lai tawh a gelh ciang in Zolai tawh zong gelhlo in, Kawllai vive tawh gelh sese dan hih tuak hi. Zomi leh Zogam it mahmah khat in bang hang in Kawllai bek zang hiam cih lamdang kisa ahih man in a kan cian uh ciang in, tua Tg. Zomi It Pen i genna ah, Zolai icih hong ki patkhiatna pen Mikangte kiang pan hi. Zomi si leh sa zong kihel beek lo, Zomi te bawl hilo, Kawlgam natawm ahilo, tuipi gal khat pek pan in hong puak uh lai hi a, Zomi-te lai hilo hi. Mikangte lai, Mikangte hong bawl sak ahih man in, Zomi leh Zogam a it luat man in Zomi te bawlsa lai ci in Pau Cin Hau lai lah theilo ahih man in, a theilo veve ci-in, gamla pek pan namdang, gamdang mikangte a i zat sak sese sang in i omna gam sung a om i theih veve Kawllai, Kawlkam tawh a zang hi zaw hi cih mukhia uh hi.

4. Zomi leh Zogam a it mahmah khat, a nuntakna natawm a pia ngam zawzen khat guaktang in om lawmlawm hiam cih aki dot leuleu ciang in, a muh khiat thu ah, Zomi te puankhuisa bek deih a, Zomi it lua ahih man in Zogam pan a kibawl puan leh pheituam bek teng nuam dan hih tuak hi. Zomi te ngiat in leilak pan a tuh sa nikten leh puansilh Zogam pan a vaikhak hong tung thei mahmah lo ahih man in, Zomi leh Zogam itna tak tawh mi namdang, gam dangte puan khui sa, minam dangte puan zuaksa leilo, zanglo in a guaktang in a om zaw na hih tuak hi. Zogam pan aki tuh ngiat pat puan, tual puante a vaikhak zawh ni tampi hi ta in, tung thei paklo ahih man in Zogam leh Zomi itna tak tawh, a guaktang in a om ahih lam kimu khia hi.

5. Anne lo, tui dawnlo in tha leh ngal neilo in a om hehpih huai kisa in aki dot leuleu tak ciang in, Zomi it lua ahih man in Zogam pan aki tuh ngiat antang bek duh, nenuam ci a, Zogam tuikhuk pan aki khaih khia tui bek mah dawn nuam ahih manin a vaikhakte hong tunma teng an ngawl, tui ngawl in a om nahih tuak hi. Ama omna lampi gei ah ansai tampi mah om hi tase leh Zosai lian mu pak lo ahih man in nam dangte' sai, namdangte an, Kawlte' khawhsa leh zuaksa a ne nuamlo nahi gige hi. Tua pen Zomi leh Zogam a it luat man cih kimu khia hi.

PS:
A tung a thupiang teng pen mun muanhuai mahmah na khat pan akiza thute hopsawnna ahi hi. "Tg. Zomi It Pen" mahbang in Zomi leh Zogam i it theih ciat nading in Zomi Nam Ni muak nuam ciat ni cih, lai khaksawnte' deihna hong pulak sawn ahi hi.

[Taang Sianpu]

A min dang neilo hiam, tua bang min a om thei ding mah hiam akicih ciang aki kanna ah "Peter" cih khat kihel hih tuak. Tua pen a pawlpi? pan a kipia min dan hih tuak in ahi zong in Zolai, Zongeina sung ah Zomin limlim Peter cih bang om ngeikei, i minphuakte' hong phuahsak mang lo in, behlap cih bang om ngeikei, Mangmin khong tawh a min a behlap teng pen Zomi it lo teng, Zo ngeina, Zo min phuahzia a palsat teng hi cilai dan hih tuak sawnsawn...

Tua ban ah biakna sia pawl khat in kikhop a man uh ciangin va pai phei in, hehpih huai sa ahih man un nek leh dawn, silh leh ten leina ding $um (pocket money) a piak leh a sum en in, "hih sum (money, cash) tung ah Zomi-te man/ lim tuanglo a, Zogam lim zong suaklo hi, Kawlte min, Kawllai leh Manglai ahi, mi namdangte a peuh, Kawl te' milim lim peuh ei tawh bang kisai hiam. Zomi te lim leh Zogam lim a ki suaksak lo Kawlte' milim biakna lim peuh tuang in, namdangte lai tawh aki gelh bialbualte khong tawh buailo hi ingh. Hih bang mi namdangte lim leh mel tuanna sum (dangka) limlim a zonzongte Zomi it tatak lo hi cih san in a sum kipiate zong sang nuamlo in nolh kik ci lai hi...

Ahih hang hih News sung a bel, amah kipia in, aman deih lo hih nong lai ai ve. Sang nuamlo zek lai. $um tung ah Kawlte' lim peuh, Buddhist te biakinn peuh kisuanna sum tawh kei buai keng ci ngiat dan hih tuak e...

A ID (matpongtin) a nung lam a et leh Kawllai in "Chin" kicih sak ahih man in, "Kei Zomi kim lai, Chin hong suaksak ci in" a matpongten zong balkek in, lampi gei a...

https://www.facebook.com/groups/zomitimes/permalink/358146054209492/