Alungduai nawnlo, ong nawh ii Pasian

[Zomi Center]

Tukum, Thawhkik ni, Topa in hun manpha ong pia ahihman in ZCF Canaan, KL, Malaysia ah ka omkha hi. Makaite'n maipha ong pia sawnsawn, ong angvan ahihman in hun awng ongzangsak uh aa, kalunglen ong pha hi. Tua hikeileh, tukum Zomi Namni lah paimanlo, crusade lah sim manlo kahihman in kalung akim zolo ahihi.

Canaan ZCF pen a etteh huai mahmah, ka etteh sim gige Pawlpi khat hi-in, hih Pawlpi hangin muhthakna, Pasian' lunggulhna katheihkhiat tampi omhi. Lungzuang khuangai, adah akapte lungtang apuakpih, athuakpih, abil un bengngongte khuazaaklohna zaakloh pih in, amit un mittaw te khuamuhlohna thuakpih uhhi. Akhe un khelbaite kalsuan
zawhlona mun tunpih uh aa, akhut un bantawngte sepding teng asepsak Pawlpi ahihi. Topa mai ah etlawm in ithuai hi.

Pawlpi Siapa Sia Lian Za Huam bang a Pawlpi ah Nipi masa bek kikhawm man ing cita lawmlawm aa, khasum piak hileh, acialtaak hetlo Sia ahihi. Pawlpi dangte ah Neekkhawm (Communion) piak ding kisamh ahihman in kicing lah mahmahhi. Pawlpi lutangpi Sia Pau (Nahnuai) leh upa teng bek nusia hi. Nahnuaite lungduai dan zong atuineek mahmah uh ahikhatam kacihtha suak hi.

Khangno kicing ahihman in, la kisa te ngaih thei mahmah aa, hunbup Sing Song Service icihte himaihi. Zogam lasiam teng kikaikhawm phial hiam cihnop huaihi. Tu nipi Praise and Worship kipat nading, Thawhkikni la tawh ong pan uhhi. "Hankhuk sung ah lumhi, kei honpa Zeisu, a nicin ding ngak hi, kei To Zeisu"... cih hi aa, Zo nupi, tapa khat aneihsun, akithahsak, asi anaai asiaksak kawm aa, a luang gei aa tamlo ding in katuathi. Tua laitak in drum tum khangno mahmah laikhat in akhuang deihtak ong lop keuhkeuh in, "Hankhuk sung pan tho tozo..."cih tamlawhla ahinawnlo, gualzawhla tawh ong zoppih to aa, Praise and worship makai teng ong dian zuahzuah ciang, kei mahmah ong
kilam to, athoto ong bangsak hi. Lamakai Peter Khai acih pen, Lamzang pan aa Kawlpi lam aa peem ka hi
uh ci aa, Tedim khualutna Gua-mual ii nisuh leh nitum khuate hoh la siam deuh uhhiam kacihtha ong suakhi. Tutak in Zomi idol akicihnaak leh Gua-mual nisuahna Sezang leh nitumna Lamzang khua pan kihello in om ngeilo hi. Tuate zong atuineek uh ahitam kaci leuleu hi. Ka neulai in Tuithang ah Tungzang pan khangnote ong pai in numei 4 in labu sung aa, Bangdang hilo Zeisu sii hi" acih ong sak pen, tawntun zo mahm,ahlo, pan kik zel, nui zel uh aa, ala lah ahamsa hilo, hizah aa hamsa sa mipila in ong sasak lel lo uh aa kaci aa, kanau in ala sung ah nuihna kihel maw ong cihi. Tuatwh kateh ciang Topa kilaih mah si! Ong nawh ssi teh kaci khahi.

A lam sam(asuah cil aa sam) zong akimet nailo phial khangno mahmah lai khuang tumpa'n akhuang gei aa sikdal nawl asat pen asat khial kasak leh azaknop mahmah ding aa asat na hizen aa, bass guitor tum pan asuak phalo ding aa atum pen ameek khial hilo in, a aw atawng ding aa atum na hizenhi. A Pa hunlai in guitor sui tawm aa tum ahihlam zong kathei hi. Naaksiam taktak mawk mah uhciai kaci aa, ko hunlai aa khangno kici te, guitor nei na ngawn khutme kikuai thei tawh katuat ciang mit aa muh hunsung aa hizah aa kikhangto kacihteh, "Topa lungduai nawn kei sii teh, ong nawh lualo nahiam" kaci kha hi. Pasian phatna aa kilamto, nungaknote, tangvalnote' khutte kamuhteh, khangno kik ngelngel leng maw cih, ka uttha ong suaksak uh aa, khangno kik nawn hetlo ding kithei kahihman in "ka mo ding, ka maak ding" zuthawl kaban piaknoptha ong suaksak uhhi. Ko hun lai aa, khaicii khuk tawhna khutte Topa phatna aa kilam, etlawm lawmlawm kasa aa Topa lungduai nawn kei siteh, kinawh lualo maw kaci leuleuhi. Hunzangpa hunding teng laaksak, guuksak in hun awng kazang hi. (Hih munpan ong ngaihdam nading athuumpah kahihi-kimu gega aa kithum nuamsamlo ahihteh)

Tu sawngteng deihlam ahihloh hang Kawlgam nawhciah mahmah kha bilbel kahihman in Kawlgam kikhel zia amanlan dan kagenhi. Zogam Zomite thuneih nading ngen aa kinuaknuak kimlai, ngetding kamzong kikeek ngam nailo, mualtung miteng, amau munciat ah thuneih na ding ong kipiaksawm leh akilawm lam kagen hi. Pasal te zong kihel lua kholkhang in Nupite antan thunget hat hang hi ci-in teci kapanghi. ASSK in piakloh phamawh ding thugen aa, "Kawlte ongthuakna uh, Kawlte khemna athuakna uh tam khin, sawt khin ahihman in mualtung mite'n ong umpaklo ding uhhi, kum tampi hanciam kulding hi" acih na tungtawn in asep sawm nu kum tampi ong cidamding zong thupi ahihman in thungen lai ding hihang kacihi. Ei leh ei ong ki uksak leh ki uk thei nai ding ihihiam, panmun kituhteh in kibuan thang mailo ding ihihiam kacihtha ong suakleuleu aa, Topa hun ngaklah si teh, manlang lua loding maw kacihtha ong suak
leuleu hi. Topa lungduai nawn tak lohi. Kawlgam ah galkap muh nading hamsa mahmahta aa galkap mungeilo kitam
mahmahta ahihman in Ygn khuapi laizang ah galkap nih khawng inndei sung ah koih in, galkap mu nuampeuh ci-in lutman la in sum zong lehang kacihleh ong nuihsan ngeingai uhhi. Kawlgam ciah lehang i meltheih natawm peuhmah tahi. Nidang i van ong dawn nuam meltheih niallah hi aa tu'n meltheih vandawn ding om nawnlohi kacihi. Inntung lehang zong inntek ding na omnawnlohi. Nidang inn tung nangawn a ki innteeksak zaw om aa, zin tun man piak kul, report kul hitaleh tu'n tuabang omnawnlo ahihman in innteek omlo tawh kibang in awng lua phialhi kacihi. Topa nawh sep siteh kacihi. Kawlpi vanleng tual simloh, "kei in kei taktak kahihi" cih kulnawnlo in hmat-pong-tin, passport lah akulna om nawnlohi kacihi. Ei leh ei nangawn kei mah kahiam ci aa kivel zel kul ahihlam kagenhi.

Kawlgam kinawh laihna thu kagen ciang, gamthumna paiding aa ngak mipite lunglen tuak uh aa, "Noteng bel Kawlgam ah ong kiman nading omkei in, man nading ong nei USA gamkhawng mah vapai zaw unla, den aa Sunday School lasa i tanote va paipih un, amau golciang ong ciahkik pih un" ci-in kavaikhak hi. Topa'n ong pattah sak leh hun ong cingpak
ding aa ei sang Topa'n ngaaklah zaw hi kacihi. Topa lungduai lua nawnlo takpi hi.

Tumahmah in endih un. Mipil misiam aa ineih GZA Makaipiteng, ei lak, ZCF Canaan khawng, Singapore khawng ah mangpau hel lo peuhmah aa thu gen ding ahihsak theihloh uhhang, a inn vuah mangpau pau ngam khat zong om nawnlo uhhi. Sia Enno lah paungam kei, Sia Mung lah paungam kei sem, Sia JM Paupu, Sia Do Kham, Sia Khual cihte a inn vua mangpau pau ngam khat zong om nawnlo uhhi. Banghanghiam cihleh atate uh mangkang gam aa khang, laisin, graduate vive hi-in a Pate mangpau apau uhciang na nuihsan uhhi. Na maizum uhhi. Amau sung ah Bishoppa bek in a inn ah mangpau zang ngambekhi, azahpih ding, azum ding, nuam asalo ding aomloh manhi kacihi. Topa manlang lua lomaw, ong nawh siteh, lungduai zo nawn mahmah lomaw kacihi. Tomno kal sungin mangkang no
tampi mu hihang. Topa lungduai nawnlo hi. Topa'n ong lapsang nop ciang, ong thatang kaihkhiat in kaihkhiat zawh
mahmahlo te a zuu, ava nangawn in thuaklah liangding in paikhiatloh ong phamawh sakhi. Ong pattah nopna hizaw hi. Zusa tawh i paikhiat nai kei leh, uiphuk khawng, kauphe khawng ong laang lai dinghi kacihi. Topa ahun kicing nawnlo in, lungduai lua nawnlo hi.

Thusuak te'n 2014 ciang Zomite alamdang in, minamdangte'n lamdang asak zah ding in Topa in ong lamsang ding cih gen uh kici aa ka umphial lel hi. USA leh gam lian pan aa graduate i tano te'n agam vuah nasep gina angahloh nading thungen ding hihang kacihi. Tua hileh Kawlgam kongkhak kihon takleh, Zomi teng gamdang nasep ngahloh ong kituak ding aa Kawlgam lam ong zuan in, Kawlgam ei khutsung ong tung dinghi kacihi. Kei gelna hi-in Topa gelna hihsang ong hoih zaw laidinghi.

Tuma kum nih laikhawng aa Zomi Namni aa "Na up kei uhleh na ciamteh un" i kicihte, tu'n ong taangtungta hi. Micitak, mikuhkal nuamte kizang keileh, kua kizang ding hiam icihte, ei mahmah in i lam-et luat nai mel loh hun sungin ongtung hita hi kacihi. Topa lungduai nawnlohi. Ong nawh, ong ngaaklah mahmahhi.

Atawpna ah, ong sawlkhia mualtung aa i Pasian, zangel itung aa, tuipi gei itung zong in, Mississippi piaunel gei, Rocky Mountain mual dawn natung uhzong in ong mangngilh kei un. Zat nading athei aa ong sawl khia Topa nong mangngilh uhleh, zatloh, zattheihloh in ong koih leh nuam khollo dinghi, Topa' lungduai nawnloh ahihlam thei un, ong zolzol
nawnlo hi, ong not Topa hitahi kacihi.

"Zomite pen asawtlo mitmuh sungin, Kawlgam bup ii Sia, saih-ka sia ahilo, Kha lam alak Sia minam ong kici teitei dinghi", ci-in upna tawh kapulaakhi. "Zomite'n Gupkhiatna Thu ii tangko kei leh, Shwe dagon mual tungpan ong kitaangko masa khollo ding aa, Topa in Zomite ong nawh zatnuamhi" kacihhi. Alungduai nawnlo Topa'n ong tangtung sak pak in ka umhi. Kawlgam ah Khasiangtho meikuang kilawh in, Kha ong kibuak lam kilangtel kasa hi. Alungduai nawnlo Topa'n ahun hawmthawh lamzong katheihi.

Lungdamna, ngaklahna tawh Topa kinawh lualo maw, kaci kha hi.

Hang Khan Lian
Tawnvei petmah -Lumut, Perak, Malaysia