Zomite leh Vaphual Omzia (Nungak Tangval te in hemgen na in, Nang Vaphual no la ding maw lawm? Nang vaphual man maw? ) ki ci uh? na sim sun le teh hoih sa lua ing.

[Rev. Mang Ngaih cin]

Zomite leh Vaphual Omzia

 

By:Mang Ngaih Cin@Cinpu,

 BA; M.Div 3^rd  year

       Suangphei Khua.

           

A u in a len khiat kik ding ciangin, a naupa’ kiangah khitui mualtuang sa in “Nau! Nau-aw, hih lai mun sang a nuamzaw gam khat mu khin ka hi aw. Tua lai-ah a tawntung i tenkhop theihna dingin, ni khat ni ciang hong sam ding ka hi. Tua lai mun nong tunnop leh thumanna leh cihtakna kiptakin len tinten in, tuate na nuntakpih in aw. Tuate i gamh a hi. Mangngilh het ke’n aw Sial Lain,” ci-in a vaikhak khit ciangin a leng khia vingveng hi. Tua huna kipanin tuni dong vaphual ahi a u Lawi Thang leh a naupa Sial Lian a kimu kik nawn kei uh hi.(Zomi-te Vaphual tawh I ki ciaptehna a hang pen anuai a I genteng banah, hih unau nihte tangthu pan ong kipat hi ci in, Zomi tangthu thei mipil pawl khatin gen uh hi.)

             Leitung ah minam khempeuh in, kiciaptehna (emblem) lim kinei kimciat a, genteh na-in, Mikang ahi Americante’ Muvan-lai, Kawlte’ Utong, Kachinte’ Khankha, Mikang ahi England-te’ Humpi-neelkai, Russiante’ Vompi, Shante’ Naga (gulpi) tawh cih bangin na kiciamteh uh a, Kha Siangtho ahih leh Vakhu tawh kiciamteh-in, Zomite Vaphual tawh  kiciamteh uh hi. Hih kiciamtehna limte in deihna leh cihnopna khat ciat neitek hi. Kawlgam in 1980 kum Union a kikipsak hunin, Zomite’ kiciaptehna dingin a zat uh ahi Vaphual na kipsak (recognize) uh hi.  Tua ahih manin Vaphual thu tawh kisai-in atom thei pen leh a theih huaizaw deuh pawlkhat i kikum nuam hi.

 

Vaphual Minphuakna

            I Zokam-in, na khat peuhpeuh mi’ muh loh ding deihin i sel nopciangin lei sungah phumpak thei hi hang, tua pen thuk to lua lo-in a tungtham tengah i phum pen phual, lei sungah phual ki ci hi. Thukkhuk mei sawtvei pi a am ding i deih hun ciangin, vut tawh vukin i koih hi; tua pen meiphual kici hi. Kaisum, balke, aalu, cihte-a kipan khatpeuh i em ciangin thukkhuk meisungah phum hang a, tua zong vut sungah phual, mah i ci hi. Sing ngah khatpeuh, lengthei, singpi, Nunun cihte a min baih ding deihin, i umnop ciangin ngataam sung hawng ah kiphum thei a, tua pen Ngapang sung ah phual mah kici hi.

            Tua mah bangin, vaphual zong, vasa nam hi napi-in, singdawn ah butom lo-in, singsung a hawm sa zongin, a hoih kei leh puahbehin, tua sungah kiphualin atui a opna ding bawl uh ahih manin, khanglui i pu i pate in abubawl a tui op zia dung zui-in min na phuak uh a, “Vaphual” na ci uh hi.

 

Vaphual Cihtak Zia

            Zogam-a om vasa khempeuh lakah vasa gol, vasa lianpen pawl leh Zomite’n thupi i sakpen khat in Vaphual ahi hi. A mel hoih bek hi lo-in, a lungsim cihtakna, a kisihpih ngamna, a ki-itna thupi ahih manin, mihing nuntakna sungah kiciapteh-na dingin mun thupi a ngah ahi hi. Vaphualte bangzah takin itna-ah citak cih tawm enpak hileng, vaphual-pi atui a op-a kipan a note lentheih hun dong, singhawm sungah opcipin apa te’n an puak tawntung uh hi. Hih hunin apate sihna manna khat nei hi leh api leh ano teng zong an pia ding om nawn lo ahih manin singhawm sungah a sih uh kul hi. A gil akial ciangin lengkhia-in hi leh, apa-te atun ciangin, mihingte mah bangin ki ummawh thei uh a, lawmdang ngai hi, bang hangin ciampel na hiam? midang tawh kizom hi teh ci-in tulum, a hih kei leh an puak nuam nawnlo in nusia cip thei hi. Tua ahih manin a sih dongin a bu sungah a ngakcip ahi hi. Ciampel lo citak mahmah, cihna hi.

            Tua ban ah vaphual nupa khat zaw sangsang i mat leh a khatzaw pen zong vansangpi ah lengto-in, a kha khupin lei ah kikia suksak-a, thakhat in si leu hi, kici hi. A tua cih kei leh zong tua kuam tengah kumkhat sung peuhmah lungzuanna tawh hamhamin, a mah guak tua kuam lawi nuam peuhmah lo-in, a lawm-i vangtang hi ki ci hi. Tua ahih manin vaphual ki-it zia a thei-te in, cikzia in kaplum nuam lo, thatlum nuam lo uh hi,kici hi.

            Tua bang zah dongin itna leh cihtakna nei ahih manin ki-ciamtehna bek hi lo-in, khangluite in mihau miliante, mipil mi thupite, a it a ngaih mahmahte uh  vaphual tawh na genteh uh a, mizawng migenthei leh lungsim hoih lote va-ak tawh na genteh uh hi. Mipi milian khat hong mindai-in hong zawngkik leh Vaphual tangsa va-ak suak cih paunak-in na zang uh hi. Tua banah hi bangin la na sa uh hi.

            A va kilel kilel a, Va cihlai ah Zo Phualva mah tungnung e

            A mi kilel kilel a, Mi cihlai ah hau-i ta mah tungnung e.

ci-in mihau milian te’ a tungnunna vaphual tawh na genteh uh hi. Tua bang dong cianga, itna leh cihtakna anei vasa pen Zomi te’n thupi sa-in kiciap tehna-in a nei ahi uh hi.

 

Vaphual Singngah-min Bawm

            Vaphualte pen a honin kikhawlin, giahna mun leh gamtatna, an zonna mun cih bangin nei-in, singgah minbawmin nungta uh, hi kici hi. Vaphual in singgah min khat anek nop ciangin thakhatin tua singkung tungah tu (tuang) pah lian lo-in, akiim apaam panin gal etphot a, gal lau-huai, patauhna ding bangmah om kei e, lungmuanhuai taktak in ciai a cih hun ciangin tua singkung tungah vatu (tuang) in singgah min ne ngeingai uh hi. Tua bang hun ciangin lungmuang takin om uh ahih manin, vaphual beng dinga a pangkholte in, a deihdeih uh telin kapthei uh hi, kici hi. Tua mah bangin tangvalnote in zawlhel, lengkhawl dingin a vakkhiat uh ciangin, a hawh nopna ngaknu-te’ inn ah thakhatin lut ngampah lo uh a, a innkiim panin la hawng vasa-in, kinelnel phot masa uh a, tua pen, khanglui te in, “Vaphual singngah minbawm” na ci uh hi.

 

Vaphual Mopi

            Vaphual lim a mu ngei tek dingin kong lamen hi. A mel hoih-in etlawm mahmah a, a guhsung hawm ahih manin lenzang mahmahin, akha zap ginngaih pha mahmah hi. A honin kikhawl uh a, a hon mahin giak khawm uh hi. Vaphual pen mun khempeuhah kimu mengmenglo-in, gammang tulak singniimna mun, Muallian, Guamlian-te lak bekah om uh hi. Mihingte mah bangin vaphualte zong ki-it, kingai thei-in, kipi kiteng thei tang-hial uh hi. A kingaih zia leh a ki-it dante koih ci hiam, cih i tel khit lian loh hangin khangluite in vaphual mopi-na mumun mahmah uh hi. Mihing bang hi leh tanupi leh thusapi dingdan khatin, nih va makuan se uh hi. Tua banga mopi ding a kuan vaphual nihpen, zankhat vatam uh a, a zing ciangin a monu uh tawh thumpha-in hong ciahkik uh a, tua pen khanglui te’n la-in na phuak in,

            Vaphual mopi i tungciang ah

            A khaveng zap ging-siau e. ci uh hi.

Mihing nuntakzia leh kipi kitenzia tawh kibanglua ahih manin, mopi ding khat a omciangin “vaphual-no la ding maw” ci-in hemgenna-in kizang hi. Monu tangin vaphual no kizang ahi hi.

            Tua banah ngaknu melhoihte tangval te’n vaphual tawh genteh uh a, ngaknu te’n zong tangvalte vaphual mah tawh genteh uh hi. Tangval te’n “Phualva aw, singdang ang ah na tul ding…”  ci-in la a phuah uh ciangin, a lawm ngaihnu iplah lua, pam maih sa lua ahih manin, vaphual tawh na genteh uh hi. Zinei-tung pasal khat kiangah, “Nang vaphual man maw lawm”  a kicih ciangin, nang zi neita maw lawm a cihna hi a, zi tangin vaphual kizangin hemgenna-in a kizang ahi hi.

 

Zinei Kik Vaphualte Modotzia

            Khangluite in sing henga vaphual kua na to thei uh hi. Tua bangin vaphual kua a tawh uh ciangin Singzum, a hih kei leh suangzum khat peuh a kua-ah nusia-in api leh ano teng man uh hi. Tua pen vaphual apate anzongin a paina pan hong ciah uh ciangin, tua lai-ah lungleng khua ngai-in om uh a, kum khat bang a cin (ngak) khit ciangin, zikik deih thei uh hi kici hi. Tua bangin zikik a lak uh ciangin, tua singzum a hih kei leh suangzum pen va keng uh aa, mo a dot uh ciangin, teci-in zang uh hi. Kei pen ka ginnat loh manin kazi katate a sih suah ka hi kei-a, an zongin ka pai kalin hih singzum in hong sutlupsak hi vaci uh hi. Tua bangin teci ding a neilote adangte in muang lo thei uh hih tuak hi. Tua ahih manin, ciampel lo ahihna zia te kitel mahmah ahih manin, Zomite in, zawl-la leh lawmthute ah, “Phualva bang ciampel kei ni” cih kammal na limzat mahmah uh hi.

 

Thu Khupna

            Hih vaphualte’ omzia leh gamtatzia pen mihingte’ zia tawh kibang bek tham lo-in, Lai Siangtho deihna tawh zong kituak mahmah hi. LST sungah vaphual a genna i muh khol loh hangin, vaphual’ lungtang puakzia leh Pasian’ deihna kibang mawk hi. James 2:26 sungah, “Gamtat na omlo upna in asi hi” na cih hi. Thu-um mi khat in gam leh minam a it ding thupi a, Gam leh minam a it leh i gamtatna tawh lakkhia-in, puah ding thupi hi. 1John 3:18 sungah “Kampi bek tawh ki-itlo in, lungsim takpi tawh ki-it in, gamtatna tawh kilang sak ni” na ci hi. Tua ahih manin, i gam in thupha ngah a, Pasian’ min a thangsak gam leh minam a suah theihna dingin laisim mimal kim tungah itna, cihtakna leh sepkhiatna tawh kipum khatin Phualva limla Zo vontawi-te mapang khawm ciat ni, ci-in kong zawn hi.