Zomi-te mailam kalsuan zia ding a ngaihsut huai mahmah thu nam (5)

[Zomi Dimocrat]

1. Pawi lam tepawl, CNF lamte pawl a makaipite uh pen US, Canada etc. ah om uh a, thu leh la, gam sung vai, CNF zum hong vai leh a kipawlna vai uh gampua (overseas) pan in gal vaihawm uh in, a kisap ciah ciang kik in, vaihawm thei uh hi napi in, Zomi min a deih phadiak lam te in "overseas" lam pan sum leh paai lo siah gal sep theih ding om kei cih muhna a nei Ciimnuai Zomi lak ah ki om ta. Mite in gal sep theih uh hi napi in, ei pawl in gal sep theih ding in zong ngaihsun khalo leh, aki gal sep theih lo ding in mu zaw mawk ihiam?
   
   
2. Zomi leh Zogam a ding in muan leh suan in i neih ahi, ZNC in hih CNF vai khaktan zolo ding hiam? Kum 20 sung bang NLD leh Gamsung, UN, Leitungbup in hong theihpih khat ahih leh, bang hang in hih CNF te vai ciangciang khaktan zolo ding ahi hiam? CNF te' zum hon ding phamawh salo hiam, thudon lo hiam or CNF te in ZNC hong thupi sim saklo, hong lau saklo lua lel uh hiam? NLD lam pan zong Zodial ngawng ah awh ciang bek hi kei henla, hero award piak ciang bek tawh naupang lungkimna dan ciang bek hong hi sak sam kei uh henla, a thu tatak, a kisapna takak hun laitak, tulaitak in hong panpi thei lo ding uh hiam? Huhna e, i ngen mah hiam?
   
   
3. Local Tedim gam sung ah mipi in ki deihlo napi in, a hon sawm teitei uh pen human rights zahtaklohna, human rights violation nam khat ahih lam Zomi min a deih phadiak te in theilo uh hiam? Tapkual han leh, GZA sang ZNC thupizaw khong tawh sun thapai, zan thapai hun bei in (mi namdangte in hong zahtak sak beek lo, hong pimuh sa tuanlo in), thu tatakte ciang sep ding leh mapan ding ngaihsunlo uh hiam?
   
   
4. CNF upa thudotpite lak ah Tedim leh Tonzang pan (taangmi ahilo), Zomi pawl khat kihel hi. Tuate in Zomite hong leh zuak bawl uh hiam? Ahih kei leh, CNF te' sawltak in, amau cih bang nial ngamlo in, sila a suak uh hi zaw hiam?
   
   
5. Nung lam hun khat in LZI leh GZA koi lianzaw cih khong tawh a buai thapai pawl khat om in, tu laitak leuleu cing lah ZNC leh GZA khong kua lianzaw, koi thupi zaw cih peuh tawh buai thapai mah pawl khat om leuleu hi. Tua leh ZNC in a dangte sang lianzaw takpi ahih leh tu laitak lian a i tuah CNF vai, Chin State kiukna vai, gam vai te amau sep ding ci ihih leh, amau tu dong bang hang in bangmah sem nailo a, sep sawmlo, thudon lo uh hiam? Na nu le pa kua it zaw, na nu le na pa kua lian zaw cih pen naupang vai leh, thutheih loh lai a kampau hi a, tuhun i Zomi kalsuan zia leh i politics pai zia ah, tua bang thu nengneng ciangciang tawh naupang vai in, hun mawk bei sak hun ding i nei nawn kei hi. Mite sang in i zekai lua khinta zaw hi. Tua ahih mna in A lianzaw, a thupi zaw ahih leh zong tua a thupi zaw te in tu laitak a i buaina bang mah cih zo tuanlo, cih thei tuanlo, thudon tuanlo uh hiam?