Zomi nam leh Khazih Kalsuan Khopzia ding

[Taang Sianpu]

Zomi nam leh Khazih Kalsuan Khopzia ding
“Amute Pasian, Topa ahi minam thupha ngah ahi hi...” (Phatna-late 33;12)
By Tg. Sianpu

Zomi nam leh Khazih thu ah kalsuan zia ding pen ki theihmawh bawl theilo a, ki nawl
khin theilo thu ahi hi. Bang hang hiam cih leh gam ki-ukna leh minam pen Pasian'
khutsung ah zong a om ahih lam manghilh kei ni.Bang zahtak in Zomi it ingh ci a,
a nuntakna a kipia phial zong in a nungta, i biak Pasian' hong it kei a, Pasian
mah No. 1 na ah a koihlo Makaite pen sawt kikhomlo ding, a thei hut bang lel in
ong maimang pah lel dinghi.

Israel te in zong Egypt gam pan in a pai khiat laitak un haksatna tampi lah tuak,
gaulzawhna tampi mah lah tuak uh hi. Minam makai ahi Moses, David kumpi te
a kipan Lai Siangtho bup sung ah en leng Pasian' zahtak vive ahi uh a, Pasian
a zahtak lo minam it makai in a sep uh ciang Pasian in dan pia a, galte' khut
sung ah ap in, gual lel sak dikdek zeel hi. Tua bang hun ciang in amau
leh amau (idolatry) milim biakna pan in hong kileh kik in Pasian' deihna leh
Pasian' itna tawh kituak in ong kalsuan kik tak uh ciang in gualzawhna
ong ngah kik zeel uh hi. Tua pen Pasian' piak lesson khat zong ahi hi.

Tua ahih man in minam a ding in bang zah tak in i vei a, vei ingh akici zong
n a nuntakna sung ah Pasian zahtaklo ahih leh Saul Kumpi bang in Pasian'
sathau nilhna pan in amak' Khasiangtho i taisan na ciang dong ki tung lel ding hi.
I theihna, i pilna bek suang in i minam i makaihsawm leh bang mah, koih mah ki
tunpih zolo ding a Pasian thahatna leh Pasian vangliatna i suannak a leh kuakua
in ong kham zong in ong dal zolo ding hi. Sawl Kumpi zong a tung lai in Israel te
kumpi ding ngait in Pasian' sathau nilh, ama teel ngiat makai hoih leh a masa pen
kumpi ahi hi. Ahih hang in Pasian tawh hong ki gamlat tak ciang in a tawpna ah
Pasian' kha siangtho in tansai ci a, a seppih Pasian' a it ahi David na tawm
thah ding in delh a, a hazatna man in a nuntakna sih nuam in silo a, nuntak
nuam in nungta lo cih i theihsa ciat hi. Tua ahih manin Zomi a ding a sem
nuamte, a sep sawm te, sem khin ingh akici te, a sep phat sawm mahmah a
kuamah peuh in Pasian' manghilh lo a, eima theihna sang in a nungta Pasian'
khutlum nuai leh ama deihna tawh kituak in i om kei leh cikmah hun ciang in
minam makai kisuak thei suaklo ding a, mipi in zong ki muang zolo, ki muang
ngamlo ding hi.

Lam khat leuleu pan in mi pawl khatte bang in ki minam vei sak lua kisa,
i Pastor te a mit uh ong keuh uh henla, Politics hong thei le uh hoih ding hi"
aci bang om phial mawk hi. I pastor te pawl khat bang in politics a sem lua
tham hi zaw a, zong a siam zaw tham uh ahih lam theilo lai cih danhi.

A tatak in bel i pastor te in Politics hong sem takpi henla, Governance ong
hanciam takpi le uh tu laitak a Politics sem akisa mahmahte' mun ding omlo in,
hong nelh siah cip pah ding uh hi. Bang hang hiam cih leh Politics te in mipi'
tung ah influence pen tawm mahmah hi. Amau tum tak, amau deihna bang in a
paipai uh hi lel a, biakna ahih leh nipi kalkhat in khat veita Pastor te in thu
gen theihna nei a, influencecy level pen politicians te i a zah 20 bang in
kikhai hi.

Tua ahih man in Zomi pastor te in politics ong sem tatak ding hi le uh Zomi
olitician te kellu phum teng, amau thanemna (weakness) teng hong ki
awk khia phingpheng toto ding a, mipi in tua politician te sang in amau
tung ah panpihna aneize, mi dang khong koko se lo a, thungetna leh
mapanpihna tawh a makaih pastor te mah na muang ding uh hi. Tua
hun ciang in politician te in mun neilo ding, mun ngah nawnlo ding a, mipi' i
upna (trust) zong om nawnlo ding hi. Politician te in a ankuan ding uh om
nawnlo ding a, nuntakna haksa in, mipi a ding lah bang mah sem zo tuanlo i
kampi leh huih thau bek mah tawh mi a kap suk, kap toh thapai ding lo siah a
sep ding dang uh omlo ding hi.

Tua pen bang tawh kibang ding hiam cih leh:-

Tapidaw Han (cementary) cingpa khat in a Pastor tung ah thunget
pih ding a cialna tawh kibang dektak hi.

Han cing pa in a khasum khamlo in, comission tungtawn ahih ma in
a khasum akham na ding, a nuntak zawh na ding nasep a tam
theithei a neih na ding thungetna (prayer request) nei hi. Hancing
pa i nasep tam ding cih pen misi tampi a om kul ahi hi. Tua pen a
pastor pa in tua a pawlpi mi pa i kisapna thungetsak ding hai hi.

Ahih hang Pastor icih in mi cinate, thu ngetsak in damna a ngah
na ding, lungsim, pumpi leh kha cidam na ding leh sihna leh
natna a om loh na ding ama naseppi ahi hi. Tua ahih man in a
tung a ama pawlpi mipa' thunget cialna (prayer request) pen a
ngah sak ding in lah hi sa zo lo, a ngahsak loh ding a lah a member
i lunggulhna leh ki tangsapna a pia ding a pastor a sem lah hi zeel....

A tom in gen kik leng:-

1. Mipi' panpihna ngah nop man in thu man tawh, manlo tawh, akilawm tawh,
akilawmlo tawh internet sung ah huih thau tam lot luat loh ding lesson ong mu sak hi.

2. Minam it leh minam a ding bang zah in sem kisa in, vei akisa zong in Pasian' a bulphuh, Pasian'
deihna a masuan lo makai khat pen sawt kikhom ngeilo ding a, gualzo ngeilo ding ban ah, mipite' makaih khial in, lam pial pih lai ding hi cih pen Saul leh David nuntaknate tung pan kimu thei hi.

3. Minam in Pasian a taisan, a paisan ciang in Pasian in galte' khutsung ah hong tungsak a, hong
guallel sak hi. Ama ang i pom kik ciang in, gualzawhna leh nuntakna tawh hong
dawn tuah in hong gualzawhpih ding Pasian' khut kuak masuan sa in hanciam to
ni!


Zomi leh Khazih sung ah,

Tg. Sianpu

[Cingbawi]

Hoih mahmah ei. Hong gelh zeel ou leh. Thupi mahmah.

[naalianzomi]

thupi ei hibang te: tha ngah huai mah mah ei.