Zomi it in puah ding icih ciang in

[Taang Sianpu]

Zomi it in puah ding icih ciang in ei leh ei, i pumpi mahmah zong i it kul a, i puah, i kep, i zep, i khoi ding kisam mahmah masa hi. Self development, personal hygiene a kipan pat ding thu hi.

1. Ei leh ei kipuah ding (pumpi mahmah pan pan ding)

2. Sil leh ten (Sianthona, samhiat sinsen, hanawt sinsen i.e, personal hygiene)

3. Nikten puansilh mahmah zong hi sinsen ding hi pah mai

4. Nek leh dawn ah zong siangtho, akilawm ciang khat (Khamtheih, guih theih khat peuh, zu, za, kunza, khaini etc.)

5. I pumpi pen puah ding kisam a, zep zek mah zong kilawm zaw hi (a diakdiak Malaysia a om Zomi te a ding in khuasung ah vak suk, vak tohnate ah siang sinsen, kician sinsen leng palik te in zong hong maingap lo tuam a, hong zahtak tuam hi)

6. A pualam kizepna leh sianthona a thupi ban ah a sunglam zong thupi mahmah kan lai hi. (i.e, sun teng, sung silh a kipan... khat veivei ciang in eimi sung diakdiak ah sungten khong pen a kimu hilo lel ahih teh ci in, a kek, a kisia, a luilua, a sianglualo khong zong kizang thei hi. A kimu theilo nate zong thupi sen hi. Sung silh, sungten a siang sinsen, puantaihna lum tawh saih sinsen (iron) in, siantho sakna in a pualam pan akimuh theih loh hang in a silhte, a zangte confidence hong pia a, confidence hong neisak hi- Numei/ Pasal a nih in).

7. A kimu theilo a sunglam icih ciang in zong lungsim leh kha lam zong kihel hi. Lungsim siangtho, lungkimlohnate puaksiam, hehnate puaksiam, Pasian' deihloh lungsim puakziate hemkha in mawhsuut in, siang tho in om leng i lung zong nuam hi).

A tung a te ahi a kimu thei, akimu theilo, lungsim, kha, pumpi taksa sianthona leh puah siamna in mimal khantohna hong piangsak a, mimal khantohna in, innkuante khangtohna hong piang a, pawlpi, khua leh tui, gam leh minam dong ah khantohna leh picihnna hong manawh hi. Zomi i itna pen sum leh paai zong himasa khollo a, Zomi it ingh cih zungzung pong zong hi tuanlo in, i min mai, min nung ah Zomi koih leetlaat zong hi pah masa khin tuanlo hi. Ihihna i kitheihna leh i theihna i zahtakna zong ahi hi.