Zogam-Zomi Lokhawhzia ding

[Tg. Thangno]

Lokhawh zia

Zomi te khamtung ah ih nuntakna bulpi pen lokhawh ahih man in, mundang taai ni, lo kho nawn kei ni ih cih kei ngal leh ih lokhawh zia tampi ngaihsut phat ding om ding hi. Lokhawh dan amun leh gam om zia tawh ki tuak in daan tuamtuam ki zangh ahihi. Khamtung gam a lokhawh zia pen, kumsim in lokhawhna na khek den ih hih man in ih gam in hong cin zo nonlo in, ni khat ni the,singkung teng bei in, khuahun kisia in guahtui ngah non lo ding ih hihi. Ahi zong tua pen ih kep cing theih na ding zia om hi.
Logam kip mun khat nei in, tua pen leicial bawl ding ahihi. Leicial ih bawl ciangin lei hoih teng guah tui in taai mang lo hi. Ankung te leh lopa ih khawh khiat te hal mang ding hi lo in, leicial bawlna ah muat sak ding ahihi. Tua hi leh lei hoih kumsim in I ngah ding hi. Khamtung gam ah leicial bawl tawh anciin ding pen kumpi in hong pattah khin hi, abeisa 1960? kiim pawlpi, Khamtung gam makai Col Son Khaw Lian makai in, India gam, Naga land ah lei cial bawldan va en a, tua bang dan in khamtungah zat dign hong hilh hi. Tedim gam ah Keizang te khat in zui pah a, leicial bawl in, lopa leh ankung bulsum te hal lo in muat sak a, a tua cih pen kum sim in an hau lua mahmah hi. Kumpi te minphat na zong pia hi. Ahi zong amah zong ahauh tak the Tedim ah sum buk bawl hiithiat leuleu hi.

An kep zia leh neek zia.

Nidang lai in Dimpi khua a teng, Pasian nasem sia On Khaw Zam kiangah, Sangmang Cope topa va hawh hi. A innciing a vaimiim ki khai teng enen a, ‘ On Khaw Zam aw, hih na vaimiim teng kum bangzah ne ding na hiam” cih a dot leh, sia OKZ in, ‘ kum khat ne nung’, ci in dawng hi. Sangmang Cope in, ‘ ko hi le ungh hi vaimiim te gawi zan in, ka ne ding uh a, kum 4 ka khom ding uh hi,” ci-in gen hi.

Hi pen a hi thei, ahi khin sa, a ki zang thei thu a gen hi a, ngaihsut huai mahmah hi. Tua cih hi leeng kumkhat a nek khop ding ta ciing leeng ih tha hong dawn mahmah ding hi. Ahih kei leh, ih neekzah val teng sum suah leeng zong hi thei hi. Gan khawi in sa nene leng zong hi thei hi. An gawivui a nek pen Heilei lam ah ki pan ta a, nak nop mahmah ci hi.( Heilei ten India pan Hala set lei in angawina nei, a khua sung mei taang sak zihziah cih hong gen na pan ka theih). Sawltak Pawllu in, ahoih na khempeuh sin un la, zui in len kip un’ (phi 4:8) ah a cih pen hi te ahihi.

Tua hi-in, Pasian hong piak leitang leh singkung te ih zat siam nang, leh ih kep siam nang zong in hih leeng a, lo khawh zia, an nekzia, kep zia te sin leeng, ih zogam hong hing ding, ami te zong nuamsa ding in ka lam en hi.