ZIUSA Palai Pawl leh CNF pawl Makaite Kimuhna thu

[Zomi Center]

ZOMI INNKUAN USA, Inc.

ZOMI COMMUNITY USA

Oklahoma, Florida, Washington DC, Illinois, Texas, Ohio, Oregon, Iowa, Indiana, Utah, Georgia, Arizona, Missouri, Kansas, Michigan, New York, W. Virginia, Pennsylvania, Nebraska

----------------------------------------------------------------------------------------------------------------

 

THUPULAKNA

 

Zomi Innkuan USA kipawlna Palai Pawl leh Chin National Front Makaite kimuhna

 

1.       Zomi Innkuan USA (ZIUSA) kipawlna Board of Directors pawl thupiakna bangin Executive Committee in acial ZIUSA Palai Pawl leh Chin National Front/Army (CNF/A) pawl Makaite kimuhna Feb. 16, 2012 (Thursday) ni in Indianapolis khuapi ah kician takin kibawl thei hi.

 

2.       Chin State Government pan kilemna bawl Palaite leh CNF/A pawl pan kilemna bawl Palaite kikaal a Cease Fire Agreement tungtawn in Zogam sung a om Bukphil khua leh Zimpi khuate ah CNA galkapte in Galkap Len (Base) ahong phuh ding uh vai leh Tedim khuapi ah kizopna Zum ahong hon’ ding uh vai tawh kisai in ZIUSA kipawlna buppi in kisang thei peuhmahlo ahih manin, tua vaihawmnate a kalsuanlohna dingun limtak in thudam tawh thu kisung zo hi.

 

3.       ZIUSA Palaite in CNF pawl Makaite tung Bukphil leh Zimpi khuate ah Galkap Len ahong phuh sawm uh tawh kisai US gam sung a om Zomi buppi tang’in ZIUSA kipawlna min tawh a kisan theihlohna thu limtak in kihilhcian hi. Abeisa kum (20) val hun sung a Zogam sung ah Zomi taangpi taangta, numei naupang in CNF/A pawlte a thuaklahna, a san zawhlohna, a lipkhapna thute a kipan CNA galkapte tatsiatnate thu khat khit thu khat khilin kicing takin kipulak thei hi. Tua ban-ah, a geelna bangin Galkap Len ahong phut teeiteei uhleh Chin State sung a om minam unau khat leh khat kikaal kitona hong suak ding a, a deih huailo tualgaal hong piang thei ding ahih manin mipi deihna thusim a, a vaihawmna uh a khawlna dingun kigenbeh hi. CNF pawl Makaite in ZIUSA Palai Pawl thusunte, thu pulakte limtak in hong ngaihsak uhhi.

 

4.       CNF pawl Makaipi Pu Zing Cung in thudam tawh thu hong genkik a, hibang kimuhna apian theihna ding a lunggulh sawt mahmahta ahihna thu, CNF/A pawl pen mipi zahtak in, mipi deihna tawh a kalsuan nuam pawl ahihna thu hong gen hi. CNF pawl tung ah lungkimlohna a kipan ngaihsutna tuamtuamte hibang in suakta takin pulak ding adeihna thu, mipi aw ngai in kalsuan ding ahihna thu hahgen mahmah hi. Tuamah bangin ZIUSA Palai Pawl thusunte zong limtak in ciamteh in, akisam bangin kalsuan dingin a kiginna thuzong pulak hi.

 

5.       Pu Zing Cung in ahong kamciamna ah ahong tung ding Feb.23~25, 2012 ni hun sung tengin CNF pawl in aphuh CNF Supreme Council Meeting om ding a, tua Meeting sung ah ZIUSA Palai Pawl in a thusun khempeuh kikup ding thu (Agenda) in nei in, limtak in ngaihsun a kikupna nei dingin hong pulak hi.

 

6.       Tua khitciang in CNF pawl Makaite in mailam a kalsuan nopna dante uh a kipan, Chin State sung ki-ukna vai, gam leh lei vai, khantohna ding vai leh galkap lam tawh kisai vaihawmnate hong hilhcian uh hi. CNF pawl pen gam sung ah Political Party khat in a din sawmlohna thu hong gen uh a, ki-ukna tawh kisai ah CNF pawl in 2015 kum gambup Kiteelpi ciangin kiteelna a tuh sawmlohna thu a kipan, Chin State pen galkhawk (3); Northern, Central, Southern Command in khenin gal lam tawh kisai vaite a hawmsawm ahihna thu, tua hangin Northern lam ah Tedim gam sung a kiteel ahihna thu hong genbeh uhhi.

 

7.       ZIUSA Palaite in hih galkawk tawh kisai in Tedim gam ah galphual kisat ding, galkap len phuh ding peuhmah pen mipi in kisang theilo ahihna thu, Zogam sung mahmah ah mipi buppi in hih thu a deihloh manin, galphual, galkap len deihlohna lahna letmat/signature kithuhkhin ahihna thu kigenbeh hi. CNF pawl in mipi deihna azahtakna dingun kivaikhak hi.

 

8.       CNF pawl in a maban uh tawh kisai a kuppih dingin CNF Supreme Council aphuh uh ahih bangin, atung a thute tawh kisai CNF Supreme Council in mipi deihna bang ciangin thusim a, CNF Supreme Council in CNF leh a galkap CNA pawl tung ah bang zahin thunei cih pen asawtlo in kitel ding hi.

 

9.       Chin State sung leh Kawl gam sung ah kilemna a om theihna dingin gam leh minam vai a mapang peuhmah in mipi thuneihna zahtak in, mipi deihna bangin kalsuan dingin kihanthawn hi.

 

 

Executive Committee

Zomi Innkuan USA

 

 

Tang’in;

 

Pa Go Sawm Khup

President

 

Tulsa, OK, USA

February 23, 2012.