Supervisor ngah thak Zomi vontawi Pa Joseph Lian Bawi lungdampihna

[Taang Sianpu]

Zomi bek hilo leitung mun khempeuh pan aki pai nopna, sum leh paai zonna leh pilna leh siamna zonnna ding in aki pai penna gam ahi USA ah Zomi tampi tak mah zong kiom kawmkawm ta hi.

Zomi-te tampi I omna sung ah khat in akihel ahi Texas State, Austin khuapi a om HYATT hotel (www.austin.hyatt.com), Convention Services (Floor) ah a sem Pa Joseph Lian Bawi pen, a seppih lawm leh gualte tawh kipawl siam in, tungsiahte’ pahtakna tawh Supervisor dinmun hong ngah ahih man in lungdam pihna ka pulak nuam hi.

Mivom, Mikang leh minam dangte tawh nasem khawm ahihna sung ah, amah bek Asia gammi hi lai sawnsawn hi. “Pilna siamna hang hi leh a ngah thei ngeilo ding kahihna leh hih pen Pasian’ hong piak linlian ahihna ka phawk a, Pasian’ hang bek mah hi” ci in gen hi. Ama genna ah, “pau leh ham lah siamlo, mel leh sa leh pilna lah neilo a, midangte ading in ahi ding mah abat hang in, kei ading in ahih leh Topa’ hoih pha diak hi” ci in Pasian’ tung ah a lungdamna leh, Leivui pan hong lamto Tungsianmang pen koi koi ah I tung zong in manghilh hetlo in I minam in Pasian mai I zon nak leh gualzawhna leh mite’ pahtak leh laptohna ngah ding cih pen kimu thei hi.

P. LianBawi pen apa Rev. Neng Khen Mung (Phaipi) leh a Nu Hau Ngaih Cing te’ ta pasal 6 leh  tanu 3 a neih sung uh pan a neu 3 na ahi hi. Khangno sung ah lai a uk baih mahmah pawl hi in, Zomi-te ading in lailam nasepna ah a naui a bang in kihelna zong ana nei ngei ahi hi.

1. Tongsan, Kawlpi (2006)

2. Laaizom, Malaysia (2004-2005)

3. ZOMI TiMES, Malaysia (2008)

4. Zo Vontawi Magazine, Malaysia (2005-2009)

LianBawi ([e-mail]) mahbang in Zomi tampi tak in I nasepna ah gualzawhna, mapai daupaina leh pahtakna a ngah zong tampi mah kiom ding in ka lamen hi. Mikangte’ lak ah bang tan tung, bang ciang pilna nei cih tawh lung kialo zaw in, I kipatna tantan pan bang ciang khangto cih lam tawh hanciamna I neih nak leh I sep leh bawlnate ah Pasian in thupha hong pia ding a, hong lamto ding hi cih a etteh taak mahmah leh I phawk ding thu khat ahi hi. Hih tungtawn in mun tuam gamtuam a om akua mah peuh in Topa’ mah masuan gige den in, I sep leh bawlnate ah hanciamna tawh matutna anei ding in hih la tawh khatvei aki hanthawn kik nuam hi.  https://www.youtube.com/watch?v=L9RFBYFh0-o

Taang Sianpu

Tulsa, OK