Nu leh PA' Kiangpan laikhak

[David Lian]

Kongit Boihno,

Kateek zawk tektek ciangin hong theisiam in hong it tektek dingin hong lam en ingh.

Up mawh loh pi-in anbeel peuh sui kha in, mehtui peuh sabuai tung ah bua sak zelzel kha thei ingh. Tua bang ciangin hong tawng ngawh lo-in, hong tai gawp kei in. Bang hang hiam cih leh ka mit zung hoih nawn lo-in, kamit mangin khua hoihtak amu theih nawn lo hi’ng.

Ko piteek, puteek te pen nuapangte tawh kibang kik in kamkhat aw-sang in hong paupih pian le uh cin khasia thei mawk hi ungh.

Kabil hoih nawn lo-in nong gen thu, nong hopih na aw zah pahpah lo leh za sunsun leng zong aleh amak in za mawk ka hih manin ‘bengngawng’ ci-in hong kobawl zanzan kei in maw…
Damtak in hong gen kik in la tua ahikei leh zong lai tawh hong gelh liang zaw mai le teh…
Bawino aw, a teekthei lo hileng hoih mah ding hiven mate…

Kaguh kataang khuah nawn lo-in kei thaguak in ka din zawh nawn loh ciangin limtak in hong len in hong dintoh pih in maw…

Naneu lai-in lampai hong kisin sak in na tuk khak ding kong letmah bangin keizong kiptak in nong let kik ding hun hita ei…

Kagen sa thu, ka gen kikkik ciangin hong ni’ng lo-in nong na ngaihsak kenkan ding hong lam en ingh.

Nang’ na thei lai tam maw na neulai in 'balloon' khat na deih mahmah lai….

Balloon kong leisak madong sun tawh zan tawh ‘balloon balloon’ na cihcih thapaih lai e….

Piteek puteekte giim leh khangnote giimnam kibang lo ahih manin hong thei siam in.

Tha nei nawn lo ka hih manin kisil ding takpi zong haksa sa mahmah ingh.

Khangham khinsa te’n khuavot thuak hak saphadeuh in, tuivot tawh tawmvei cik a kidiah khak nangawn zong a nattut theih pahpah lam pen nang' zong nidang na khangham zawk deuh ciang in thei ni teh…

Nang zong na thei kha lai tam maw, na neulai in kisil nuam lo-a na tai valval a……….,

Na nung panin kong delh vangvang lai hunte khawng….

Namsia hong sa-in kisil dingin hong aana' sawl kei in maw…

Sun tawh zan tawh ki hopih ding nei lo-in kei guak bek om den ing.

Hun awng na ngah ciangin hongpai in tuibuuk muamtam tanvei ahi phial zongin kamkuum khawm dih ni…
Innvai lovai teng tawh na buai kinken lam hong thei mah ingh.
Napa tawh ka neulai hun te khawng kong gen kik ciangin na lungsim ah tua te aom kei phial zongin tawmvei cik beek hong ngaihsak ta peuh in maw…

Ke'nzong maw, na neulai-in nong taangthu gen mualmual te khawng limtak in kong ngaihsak hiven... na phawk kha lai tam maw…

Ka hun hong cingin lupmun tung bek ngak in ka-om hun ciangin hoihtak nuamtak in, nongcing nongkep ding lam en ingh.

Up mawh loh pi-in lupna tung khawng kawtsak in, ka namsiat sak khak zenzen leh zong hong na theisiam in…

Ka hun nunung tomcik vei sung bek hiding ahih manin hoihtak leh lungduai takin nongkep nonghuai ding lam en mahmah ing…

Kasih ding hun hongtun’ taktak ciangin kagei ah hong dingin sihding lau lo-in tha nongpiak ding lunggulh lai-ing.

Ka om nawn loh hangin na lung lau kei in!
I pa Pasian tawh ka kimuh ciangin a bil panin huau in 'nang thupha hong piak nading' ngen ning.
Banghang hiam cih leh nang’ na nu le na pa hong it hive cin....

Nong kinman in lungdam mahmah ung!

Hongit tawntung,

Nanu leh Napa

By,

Pau Khan Khan

6 December 2011

Ref: A Letter From Mom and Dad

NB:Hoihsa lua ka hih manin Facebook sunga Zomi Zogam gelh kong copy kik sawn hi.