Malaysia ah kipawlna khat a picin theihna ding in akisam thute

[Taang Sianpu]

Malaysia gam a ding in kipawlna community icih in a kisam bulpi teng tampi lak ah a kisam pha diak thu zuih ding, zat dingte in:

1. UNHCR tawh kizopna hoih ding, ngang ding, lem ding (thu leh la tatak, vai tatakte ah).

UN mithak ciaptehna vai van zo ding, Innkuan lutpih vai, kimat kihenna vai ah lem takin kizopna om ding kisam

2. Palik, U Lian, Kumpite tawh kizopna lem ding, hoih ding, mi nei ding. En pelikte i theih pong tawh hong hi thei samlo a, palikte in hong theih ding kisam hi. I kipawlna min, card hong muh phet un i mipite hong kep na ding leh, a makaite hong theihneih, hong huai bawl theih ding ciang dong in palikte tawh kizopna, ki telsiam theihna kisam hi

3. NGO te tawh kizopna lem ding (communication skill kisam a, i neihsa a om leh tuate kep paisuak zawh ding zong kisam hi)

4. Minam sung a madawk, thumu, makaite tawh kizopna a nei gige, kinken kisam
-Minam sung ah a madawk, a thuthei zaw deuh, a thunei zaw deuhte langbawl, langpan sawmlo zaw in, thu dot bawl thei in, khut kilen in kizop theih ding kisam hi. Kipawlna pawl khat i thanemna ah, a minam sung ah mipil zaw deuh, a ki dawk zawdeuh om leh a mipil, mi siamte khong simmawh zawsop, gensia in, pawlbawl lo in, nawlkhin zaw khong om zenzen thei hi. Tuadan minamte pen khantohna ding lampi kikhakna thu masa khat ahi hi. Minam sung a om mi hau, sum leh paai a neite, a thei, a pil, a siamte amau mun ding bawl sak thei in, human resource bek hilo, resource khempeuh kaikhawm in, a zatdan a sim ding kisam hi

5. Mimal tawh kizopna siam ding kisam
-Communication skill ici diam, mipi a zawng, a hau, a pil, a hai, a gilo, zukham, sakham, mi pil, misiam a vekin kizopna siam ding kisam hi. Sum nei zaw deuh, meltheih hau zaw deuh, eima meltheih zaw deuh bek hopih, vai vanpih cih bang tawh minam ki khangto ngeilo zaw hi. Meltheih neilo, pilna neiloi, a hehpih huai phadiakte panpih in, koh ding neilo, a cihmawhte a huaisiam, a kem siam, a van siam kism hi. Eima kiang ah huhna ong ngen meigong khat, naupang khat, mizawng khat zong thusim in, thupi bawl in, a thugente lunglut tak in ngaih sak in, amau kisapnate ahi thei zah in panpih ding hi. A huh theihna a om kei phial leh zong kin bawl in, lungsim tawng takpi tawh mipi itna nei in, hopih in, maitai in, hehnem thei ding itna lungsim neih kisam hi.

Atung a thu leh la teng tawh a kituak kipawlna khat peuh pen mipi in muan leh suan in nei den ding a, minam leh gam a ding in mi tampitakte' nuntakna kikhelna a piangsak kipawlna, innpi, zumpi a suak thei pan ding ahi hi