LZI Kipawlna pan Dahna Pulakna - Tedim leh Tonzang kikaal a mawtaw tuahsiatna

[Zomi Community Network]

Leitungbup Zomi Innkuan Kipawlna

(Zomi Communities Organization)

USA, Canada, UK, Denmark, Norway, Sweden, Germany, India, Singapore, Malaysia, New Zealand, Philippines, Korea

DAHNA PULAKNA

November 26, 2010 ni in, Zogam Tonzang khuapi pan Tedim khuapi azuan, khualzin mi apua Chin-Taung-Than Bus mawtaw khat (a nei – Cinpu) tuahsia in Zomi laizom sanggamte mimal (17) in nuntakna beilawh uh a, aliam abai mimal (40) val pha hi. Hih mawtaw azui khualzin mi nuntakna abeilawh sanggamte leh aliam abai sanggamte atamzaw pen November 25~28, 2010 hun sung a Tedim khuapi ah a kibawl Cope Centennial Jubilee Pawipi asiim ding ahi uhhi.

Leitungbup Zomi Innkuan Kipawlna in hih tuahsiatna pen Zomi-te tangthu sung ah a mulkim huai pen, a khasiat huai pen, nuntakna tam a kibeilawh pen, aliam abai a tam pen tuahsiatna khat ahihbek thamlo in, Zomi buppi tawh kisai pawipi asiim dingin akuan laizom sanggamte tuahsiatna ahih manin Zomi-te nambup tuahsiatna (National Tragedy) khat in kisang hi.

Leitungbup Zomi Innkuan Kipawlna in hih nambup tuahsiatna panin nuntakna abeilawh laizom sanggamte hangin adah akap, khasia lungleng khuangai a om a innkuanpihte, a sanggam meeltheih tanaute, a khuapih tuipihte, a pawlpi mite tawh akibang in nakpi takin kidah mahmah a, na kisa mahmah hi.

Tuamah bangin, Leitungbup Zomi Innkuan Kipawlna in hih nambup tuahsiatna panin aliam abai laizom sanggamte thuaknate tawh akibang in lungsim kha sung ah kithuakpih a, liamna baina panin amanlang in damna leh lungsim pumpi thahatna angahkik zawhna dingun thupha kipuak hi.

Hih nambup tuahsiatna tawh kisai in Leitungbup Zomi Innkuan Kipawlna, Executive Council in December 11, 2010 ni abawl, leitung muntuam gamtuam a om Zomi Innkuan kipawlna Makaipite tawh thukikupna sung ah minam buppi dahna kahnate Anungta Pasian tung ah kithutuak takin kohna hun khat kizang hi.

Tuipi galkaai Zomi-te in nambup tuahsiatna panin nuntakna abeilawh laizom sanggamte galna ding leh aliam abai, adamlo laizom sanggamte vehna ding (panpihna) sum leh paaite, a munmun a om Zomi Innkuan kipawlna makaite tungtawn in Leitungbup Zomi Innkuan Kipawlna min tawh kaihkhop dingin kivaihawm hi.

Dahna sung pan itna tawh,

Executive Council

Leitungbup Zomi Innkuan Kipawlna

December 12, 2010. Tulsa, Oklahoma, U.S.A.

Press Release from Leitungbup Zomi Innkuan Kipawlna