LZI Kipawlna Kiteelpi kibawl ding (Thupulakna EC-07)

[Zomi Center]

Leitungbup Zomi Innkuan Kipawlna (Zomi Communities Organization)
USA, Canada, UK, Denmark, Norway, Sweden, Germany, India, Singapore, Malaysia, New Zealand, Philippines, Korea

 

Thupulakna (Press Release)

 

A Thu : LZI Kipawlna Kiteelpi kibawl ding

A Simna          : LZI/Press/EC-07; March 21, 2012

 

1.      March 10, 2012 ni a kibawl Leitungbup Zomi Innkuan (LZI) Kipawlna, 2012 Kumcin Khawmpi thukhensatna bangin LZI Kipawlna Kiteel Tanupawl (Election Commission) in 2012~2014 km sung LZI Kipawlna a makaih ding Executive Council (EC) panmunlen kiteelna (Kiteelpi) a kibawl theihna dingin Kiteelpi atuh thei ding Kuangluite (Candidate) Minte a kaihkhop laitak ahi hi.

 

2.      LZI Kipawlna Thukhunpi leh Dante (Constitution and Bylaws) zui-in LZI Kipawlna EC panmun (15) alen ding Makai kiteelna ah muntuam gamtuam a om, LZI Kipawlna tawh a kizom Zomi Innkuan kipawlnate leh Zomi-te khua leh tui kipawlnate panin kipawlna khat ciang Candidate a tampen (7) ciang a kipuak thei ahi hi.

 

3.      Muntuam gamtuam a om Zomi Innkuan kipawlna leh Zomi-te khua leh tui kipawlnate in amau kipawlna sungciat panin LZI Kipawlna EC sung ah Makai panmun alen dingin a muan uh, LZI Kipawlna Constitution leh Bylaws a sang thei, makai, tangmi, palai, pawlmi khat peuhpeuh a puakna dingun Election Commission in kipawlna tuamtuam a Makaite tung ah zasakkhin zo hi.

 

4.      LZI Kipawlna EC sung ah kum (2) sung Makai panmun alen nuam, Kiteelpi atuh nuam tuipi galkaai Zomi khatpeuh in LZI EC Candidate khat in na Min uh ahong kipuak theihna dingin na omna munciat a LZI Kipawlna tawh a kizom Zomi Innkuan kipawlna ahihkei leh Zomi-te khua leh tui kipawlna Makaite tawh kithuza in ahun lap-in Election Commission tung ah puak ding ahi hi. LZI EC Candidate Min puakna pen March 31, 2012 ni in kikhak ding hi.

 

5.      Kiteelpi pen muntuam gamtuam a om Zomi Innkuan kipawlna leh Zomi-te khua leh tui kipawlnate panin a kipuak Tangmite (Representatives) leh LZI Kipawlna EC Makaipite tawh akilam Zomi Innpi (General Assembly) sung a kibawl ding hi a, Zomi Innkuan kipawlna leh Zomi-te khua leh tui kipawlnate panin a kipuak LZI EC Candidate teng sung panbek in kiteel ding hi.

 

6.      Kiteelpi pen Online Voting System zangin April 9, 2012 ni panin April 15, 2012 ni ciangdong Election Commission makaihna tawh kibawl ding hi. LZI Kipwlna EC panmunlen (15) a kiteelkhit ciangin Election Commission vaihawmna tawh EC sung a panmun tuamtuamte alen ding kiteelna khat khit khat kibawllai ding hi.

 

7.      Election Commission pawl in LZI Kipawlna EC panmunlen ding Makai (15) leh panmun tuamtuam zui-in kiteelna a bawlkhit ciangin, tu laitak a EC panmunlen Makai luite vaihawmna tawh EC panmunlen alui leh athak panmun ki-apna, thupha kipiakna kibawl ding hi.

 

8.      Kiteelpi tawh kisai thu a theinuamte hita leh, LZI EC Candidate a puak nuamte in Election Commission Chairman Dr. Do Khan Khup ([e-mail], [e-mail]) tung ah kikan, kipuak thei ding hi.

 

 

 

Executive Committee

Leitungbup Zomi Innkuan Kipawlna

 

 

Tang’in;

 

Sd. xxx

(Go Sawm Khup, Pa)

Thuvaanpi

 

Tulsa, OK.

March 21, 2012

Download PDF Version: LZI Press Release for March 2012 Election.pdf