LEITUNGBUP ZOMITE TUNGAH ZAKSAKNA

I pianna Zogam leh leitungbup ah kikhenthang aa om Zomi khempeuh itna tawh hong hopih in i biak i paai Pasian’ min tawh na khut uh kong len masa hi. Pasian kiang panin daihna leh lawhcinna thupha note khempeuh tungah hong tungkim ciat tahen!

 

I minam sungah lungdamna thu (gospel) hong tun Kum Zacin Pawipi panin hong piangkhia Leitungbup Zomi Kipawlna (GZA) in Zomi khempeuh huamkim-in mainawtna dinga kipawlna a hihi. A kipancil ahih mah bangin i lam-et zahin na tampi i seppah zawh nai loh hangin hih GZA pen cikmah hun-in nungkik ngei lo-in damdamin mainawt ding a hihi. Bang hang hiam cihleh, eite’ tha suang lo-in eite hong bawl, hong cing hong kem leh lam hong pi den Pasian i muan man a hihi. Nungkik ngei lo ding hi. Tu-in mailam Zomite’ kalsuanzia ding ngaihsutna-in, “ZOMI I CIH CIANGIN” cih thulu tawh thu pawlkhat kong taangko khia nuam hi.

 

ZOMI I CIH CIANGIN: kuama hong piak hi lo taangtawng pek pana eima’ min ngiat a hihi. ZOMI min mah tawh kilo-in, kisamin Zomi i hihna (identity) i kemcing ding hi. Hih pen Pasian hong piaksa a hihi. Ahi zongin i phawk ding khat-ah, Zomi a kici lote i gal ahih loh lam i mangngilh kei ding hi. Zomite pen galphuang ding minam i hikei hi.

 

ZOMI I CIH CIANGIN: i omom i tuntunna-ah tukhawm khawlkhawm-in, a kithuah liingliing dingte i hihi. Tua ahih manin thupha sanga gamdang atung Zomite khempeuh aw, na omomna mun uah, i Zomipih dangte tawh kizom kikhawl-in na kipawlkhawm liailiai ta un. Tua banga kipawlkhopna dingin i minam pawi ahi “KHUADO PAWI”, “SIALSAWM PAWI” leh “ZOMI NAM NI” te na hamtang ngaihsut-in na bawlkhawm  liailiai ta un. 2011 December kha aa GZA Makaipite Kalaymyo khuapi-ah a kikhopna pana kikhensat ahi November Nipi nunung pen GZA Nipi ci-in lungdamkohna dingin kiciamteh hi. Na omomna mun uah na bawl khawm liailiai ta un.

 

ZOMI I CIH CIANGIN: thu haksa, la haksa a omte a phukhawm a thuakkhawm liailiai dingte i hihi. I minambup-in i thuakkhawm theih hun om ding hi. I mimal mal-in i thuakkhawm theih bek hun zong om ding hi. Bangbang hitaleh, kinusia lo-in haksatna khat peuh thuakkhawm liailiai-a, mainawt khawm dingte i hihi.

 

ZOMI I CIH CIANGIN: thu tawh a nungta dingte i hihi. A beisa huna Zomite’ kizopna leh thu kizakna mediate i et ciangin Zomite pen Thu tawh nungta zo nai lo-in thuakna, lawpna (emotion) bek tawh a nungta lai Zomite i hihna hong kilang hi. Paunak khat-ah “Mihaite in a lungtang uh a liangko tung uah pua uh hi” kici hi. Lungsim dai cihnopna a hihi. American President Theodore Roosevelt’ zi Eleanor Roosevelt in hih bangin na na gen hi.

 

“Mi picing lote in mimal vai buaipih uh a,   (Small minds focus on persons)

Mi bang lelte in thupiangte buaipih-in,       (Average minds focus on events)

Mi gina, mi thupite in thu buaipih uh hi      (Great minds focus on ideas)” na na ci hi.

 

A beisa hunin internet sungah Zomite in mimal i buaipih hi. I mimal mal-in i kiko hi. I kitawng hi. Zomite minam niam mahmah lai i hihna a pholaak khiakhia i hi gige hi. I lai-atte in i mimal niamna hong kilangsak a, a dahhuai mahmah a hihi. Tu-in Zomi i cih ciangin mimal vai buaipih nawnlo-in thu tawh nuntak i tum ding hi. Tuipi galkhat tung Zomite niam tuh lo-in pil tuh a picinna tawh i Zomi nambup nong laptoh ding uh ka lam-en mahmah hi.

 

Mailam-ah zong Leitungbup Zomite kalsuanzia ding a lem bangbangin zaksak den kong tum ding hi. Minam niamte leh mimal niamte bangin kitot kiselna tawh kalsuan lo-in thu tawh kalsuan a, minam picing hihna tawh ma i nawt khawm dingin kong phawksak hi.

 

Zomi khempeuh i biak Pasian in thupha hong piakim ciat tahen!

 

 

Hong it,

Rev. Dr. S. Pau Khan En

GZA Makaipi

October 1, 2012

Zomi I Cih Ciangin.pdf

Views: 207

Comment

You need to be a member of Zomi Community Network - Your Network to add comments!

Join Zomi Community Network - Your Network

© 2024   Created by Zomi Community Network.   Powered by

Badges  |  Report an Issue  |  Terms of Service