Leitungbup Zomi-te hong linglawng sak November 2010!

[Taang Sianpu]

Leitungbup Zomi te Innkuan Khat, Pum Khat i suahna kikna mualsuang phuh kha- November 2010

Zomi a kuamah peuh,

Leitungbup Zomi-te tangthu sung ah laimai thak ki gelhzia a tuamtuam om a tua sung pan in, November 2010 pen Zomi bek thamlo Kawlgambup a ding in a ciapteh huai leh kha thupi, thu tam a pian kha hi kici thei hi.

A hang in:-

1. November 2010 sung in I lawm it Pawl khat in vangam Pa' Inn hong zuat san a,

2. November 2010 sung in Pawl khat in Zomi bup lungkoh kop pawi bawl uh hi

3. November 2010 sung in Ei khang hong tung kik nawnlo ding ahi i Zolai neih zawh kum 100 cin pawipi ki bawl hi

4. November 2010 sung in leitung ah i neih ngei nailo leh khat bek i neih pan ahi Zomi Electronic Dictionary (eDic) pen Siamsinte' makaihna tawh kipawlna dang
(5) mapang khawm in ki hawmkhia hi

5. November 2010 sung in kum 20 sung khat vei bek akibawl Kawlgam kiteelnapi kinei hi

6. November 2010 sung in a khan tawn in mee' (ballot) cih limlim a khia ngei nailo leh a mu kha nailo kum 20 nuai khangno leh khangham tampi in mee' cih a zak bek hilo in, va mukha, va khoih kha ngiat in, va khia lai uh hi

7. November 2010 sungmah in kum 20 sung gilbem ah a ki zau khum ahi Pi Aung San Su Kyi khah khia demdam uh hi

8. November 2010 sung in gamdang tung Zomi te lak USA ah a tam pen mipi' ki kaihkhopna ahi Zolai pawlpi Tulsa, Oklahoma ah kibawl hi

9. Malaysia UNHCR U Lianpenpa leh Zomi Innkuan Makaipipa Zomi bup ai tang ding in galtai vai tampi tak kikupna leh thugenna nei khawm thei uh hi

10. Zomi leh Zogam a ding in huhna leh panpihna hun khat sung in tam akipiakpenna ahi CCJ a ding US$ 40,000/ val NGO te' huhna kihel vetlo in Zomi-te' neihsa ngiat tawh piakkhiatna tawh Zomi leh Zogam itna lahna kinei hi

11. Minambup Reconciliation leh Reunification a ding in a lianpen leh a gen tak pen akici thei phial ahi pawlpi tuamtuam pen "R" Group Zomi-te in GCCF (Global Chin Christian Fellowship) ci in US$ 40000/ val bei in Kuala Lumpur ah a bawl na uh ah Kawlgam pan tangmi leh palai mimal 70 zong kihel a, "G" Group Zomi te in Zolai pawipi ci-in leitungbup mah pan a hi thei teng in Zogam kizuan kik tek in nasia tak in kibawl a, India pan in Zomi 70 mah hong kihel thei uh hi.

12. "R" Group Zomi-te in Chin min vawh i khil nuai sung a om teng Politics, Social leh vai dang khat peuhpeuh paulap in kigawm zo nawnlo ahih man in GCCF kipsakna pen Biakna Makai ahi Dr. Hrekio leh Dr. Chum Awi in makaih uh a, minam bup kipawl khopna ding in campaign a bawl hun laitak mah in, "G" Group Zomi te sung ah zong biakna lam mi zahtak leh mipil ban ah Pasian' sathau nilh sa siampi vive makaih in sepkhopna ding in kalmasa kisuan hi.

( 1 ) Dr. Simon Pau Khan En (Chairman)
( 2 ) Bishop Felix LIan Khen Thang(Vice Chairman)
( 3 ) Dr. Chin Do Kham (Secretary)
( 4 ) Dr. Gin Khan Khual (Member)
( 5 ) Dr. Do Suan Mung (Member)

13. November 2010 in Malaysia UNHCR zumpi sung ah Zomi zum nasem nih leh thum ki behlap hi.

14. America TV sung ah Zomi-te ngeina leh pawi a suak masakpen na leh local newspaper ah Zomi namte’ paipi leh minam vai November kha sung mah in kimu thei hi.

15. November 2010 sung in Zomi sung pan makai tampitak Malaysia a om Zomi galtaite’ lak van ding, pha ding in pai thei uh hi.

A bante laisim mipi in hong zomto lai ta un ci-in kong cial nuam hi. A huampi in en leng i guallehna leh i kamsiatnapi pen khat hi a, a dang teng Zomi bup a ding in gualzawhna lan i khaina, mualsuangpi i phuh hun leh, lamthak tawh kalthak i kipat hun ahi hi. Job i nuntakna sung ah a tuahkhakna haksatna leh sihna, dahnate in a Pasian' a upna nungtolh sak zolo, dalzaolo a, Pasian' mai zong in a ngei sang in Pasian in thupha a piak zawk mah bang in, tu a i tuah siat haksatnapi hang in i Pasian nungkik san lo a i masuante i zop mengmeng ding in hanciam ding kisam hi.

Singkungpi pen sang tektek leh huih pi, guahpi in nawk khak tektek mah bang in i Zomi buppi i movement pen hong lian semsem leh minamdang gen loh Zomi sung mah pan zong gensiatna leh kampau nengneng hong om zeuhzeuh thei ding a ngeina ahi hi. Honpa leh gumpa Topa Zeisu a bawlsia leh a langpan pen mi namdangte hi
peuhmah lo in, ama minam pihte mah hi cih hong phawk thak sak hi.

Tuate hang in i mailam khangtan sak zolo ding a, Pasian' tawh i kalsuan nak leh i tuak dahna leh kahna-te in Zomi-te ki pumkhatna ding hong khaktan zolo, Zomi bup in Pasian' i phat ding hong daltan zolo ahihna tutung Tedim Zolai, CCJ pawipi tungtawn pan in kimu zo hi.

Pasian' kammal sung ah "sihna aw na gu koi ah om hiam..." ci in a tangko mah bang in sihnagute in (accident-te in) Pasian' tawh i kizopna hong khaktan zolo a, Zomi bup ki thutuak in i mapanna hong khaktan zolo hi. A nungta Vanglianpa' anglum nuai ah, ama khutkuak muanhuai sung ah kalsuan in a nungta, a gualzo Zomi-te ihi hi!

Tg. Sianpu
December 09, 2010

[naalianzomi]

thupi taktak mah ei. mate.... mangngilh huai hei kei ei..... dahna aom mahbang in lungdam huaina zong tam mahmah in. Zomi te ongit, thupha ong pia- onglamsang bek lo aa ong lawnto. Topa min thangsemsem ta hen.Amen

[moemangsen]

Nong gualh suksuk leh ahi vivemah onghizel ven, hoihthei mahmah ei. Phawkkhakloh athupi mahmah honkhat ongpholak himawk ciai.