KSCM Music sang honna & lungdamkoh pawi kibawl

[Zomi Center]

Zomite leh biakna tuamtuamte' sungah i angtanpih leh mi tampite in phattuamna a ngahpih uh ahi, "Kalay School of Church Music" (KSCM) Sang in kum 4 cinna sanghonpawi leh Pasian' tungah lungdamkohna tawh Aug.7, 2012 (tuesday) 4:00-6:00 Pm.sungteng KSCM sangah biakpiakna leh hunbawlna thupitakin nei uh hi.
    
Tuatakah Revd Tuan Khan Mung (a) Tua Mung' makaihna tawh sanghon cil a kipan akuamapeuhte' i panpihna te khat khit khat hong gen to ciatciat hi. Tulaitak a mapanpihte a kipan Music sang ii dinmun leh mabante zong hong gen hi. Tuabanah tunung diak mahmah a US a paina-ah i mipihte' omna mun pawlkhat a vahawhna leh hun neih dante, Sang a ding piakkhiatna a tuamtuamte hong gen a, tha kingahin ki-lungdampih ciat hi.

A diakdaikin Music sang ahih mahbangin van kisam honkhat zong hong pua a, Model thak vive, Kawlpi lamah a kimu ngei nai lo (om nai tuak lo) Electric Drumset khat leh guitar hoih nono, tampi man hon khat hong pua a, tuate lahkhiatna leh apna zong kinei hi. Sang kahna innsungah hun kibawl a, mipi ki tazo lo ahih manin innpua lamah zong honpi khat om hi.

    

Falcon Band te zong a 4 un kimtakin hong uap thei uh a, music thakte hong tum ziahziah uh a, tha kingah lua mahmah ahih manin anne kimlai nusia-in, video ka na zaih keei uh hi. Guitar te zong khat ciangin teng giat man pawlpawl vive hi a, drumset zong a tuampi hi a, tamkhop mah man hi. Tuabanah Camera hoih mahmah khat zong US panin letsongin kipia a, tuate zong hong gen hi.

Mipi khempeuh voksa hunseu tawh hong vak a, thu-le-la hi ta leh nekna dawnna ah kitai mahmah ciat hi. Hih hunsungah Sia Mung' i a nasep khopih ahi, Revd Hlawn Mung (MMC) leh lengla thupi pawlkhat zong hong kihel thei hi. Video la kawm ka hih manin maan pen hunnei khempeuh kizaih kim man lo suak a, pawlkhat kong khak hi. Na na etsak un la, gentuak leh theisak tuak a om lai leh Sia Mung in hong gen beh leh ci hang.

Topa'n KSCM maban a thakin hong kalsuanpih ta hen.
Lungdampihna tawh,

Peter Khampu