KALAYMYO THUTHANG PAWLKHAT

[Zomi Center]

Dear All,

Ih omna mun tawh kisai thu kitheihpihna ci-in a beisa kumbei kuanteng leh kumthak khit Kawlpi khuasung thu tawm khat a kihawmsawn i hi ding hi.

1. LUNGDAMBAWL KILIMBAWL CIAT:-

A thu dangdangte gen lo-in a diakdiakin a beisa kum Christmas pen amun mun ah thupitakin kibawl ciat hi. Nek leh dawn tawh a la kitam pha diak hi. Zanvak ahih leh pen GZA tawh kituak ahih manin tuatak ah lah kihel nuam, zanvah maban lah om ahih manin pawlkhatin nuammawh sa sim uh cih ding ahi hi.

Topa Zeisu bawngkuang sungah hong suahna limla-in bawngbuk a bang buhpawl tawh ahi a, bi tawh ahih zongin mun tampi ah kibawl a, biakinn gol pawlkhat ahi, CMBC bangin a pulpit gei vuah bawlin etlawm mahmah hi. St.Mary, AMC, Emmanuel leh a dangdang tampite in biakinn huangsungah bawlin lungsim hong sukha tuam mahmah hi.

2. ACCIDENT TAM DIAK:-

Lungdambawl leh kumthak huhau teng pen a hun dangte sangin accident a om thei zel ahih kawmkal ah tukum pen Kawlpi ah lim om pha diakin kigen hi. Minam dangdang leh vengdangte gen ta kei le'ng Zomite teenna veng teng leh Zomi, Laimi leh Mizote' thuakna pen tam mahmah hi.

Motor cycle hathawl lua leh khamtheih zang a, a hawlte' hangin mi tampi in sihna hanmual hong liamsan uh hi. Kawlpi pen lampi neu, mei om lo, hat hawl lua, a siaktak lopi pawlkhat in zong hawl, beer/zu sai tam, zukham tam pah ahih manin a etlawm mahmah leh a zat nuam mahmah motor cycle hangin hanmual hong liamsan tam khin zo a, mailam ah akuabang teng in thuak lai ding cih kigenthei lo a, septheihna lampi tuamtuam tawh mipi mahmah in panla a, sep ding khuahun hita mawk lo diam, cih pen mipite' lungsim tauna aw ahi hi.


(1) Lungdambawl madiak sun khat RTC veengah cycle leh setbing kitaihna hangin liamtuak uh a, cycle hawlpa lamet bei, si pelmawh ding hi, cih ciang kiza hi.

(2) Lungdambawl nitakin Lia Zam Nuam Cing (a) Nuam Cing pen Ciimnuai Boarding ah Guide sem hi a, a Siamah seppihte leh Siate tawh pawisim a, a vakna uh pan in a mi kithei lo cycle in hong taih lupsak hi.

(3) Lungdambawl leh kumthak kikal in Tahan ah sanggam Mizo numei khat cycle tawh a tuang pen eimite thawlazyi khat in hual nelh a, a zing ciangin zato panin si cih kiza hi.

(4) Kumbei nizan kim pawlin ei mi nungak khat mah motor cycle in taih a, Mandalay zato ah kipuakin dam zo lo ahih manin a sisa in innlam hong tung kik hi.

(5) Lungdambawl madeuhin zong Haimual motor tawh saklam khual zin ding Eimi, Tahan tangval khat leh a hawlpa bek vanpua a a tuang pen Lamzang khuakiang ah lampialin a nungzuipa Tg.Khaipi in a mun panin hong nusia
hi.

Hih teng pen ommun pan a zak pak teng bek hi a, a dang zong om lai kha ding hi. a liam a bai pen tam tuam mai hi. Kawli pen Beer sai, zusai leh numei gina lo kicin tuak lua mawk ahih manin motor cycle pen khuasung gallian penin a kituat laitak ahi hi.

3. INDAINGLAY THONGINN AH ANVAAKNA A TUAMTUAM:-

Hih pen pawlpi tuamtuam tampi panin kisem a, i telcian khat le nih i kizaksak pakna hibek hi. Pinlong Tuiphumte in kumsim a aneih den uh hi a, tukum zong vok golpi go-in anvaakna leh Lungdamna thutangkona nei uh hi. Galilee AG te'n zong tuamah bangin nei uh hi. Bethel te, leh Tahan lampan a kipan pawlpi tampi in vaak uh a, septak mahmah hi, cih gen ciat uh hi.

4. THONG PAN SUAHTAKSAKNA:-

Kumpi in a beisa kum lam a a neih ngei mahbangin tukum Kawlgam suahtak ni tawh kituakin Thongkia hon khat suaktasak a, tuate pen a kum a tam nawn lo deuh teng ahi hi. Kawlpi, Indainglay Thong panin tua ni-in mi 60 val hong suak ta uh a, Paangpi veng a kipan eimi honkhat zong kihel a, i lungdampih hi.

5. PINIC & EXCULSION KIPAI NGEINGAI:-

Lungdambawl kuan leh Kum Thak madiak teng pawlpi tampite in khangnote lawpna leh lungsim suahtaksak nading ngaihsutpihna tawh Kalewa, Mittha Leipi; Kyaukthalone, Zayagyo Tuikholna kuampi, Thugyise leh mun pawlkhat ah pai ciat uh a, kim leh pai a kawlte in hong eng thei mahmah uh hi.

Hih hunte ah mipawlkhatte in Gupkhiatna thugenna leh kilawmtakna hoihtakin zang ciat uh a, khen khatkhat mimal panin ahih leh motor cycle khawng tawh kuan a, zunek gualnopna a a zang om om tuak hi. Tuabangte pen amua leh amau lamkal ah tukgawl a, a liam a bai mah om luilam hi.

6. HAN LUI PANIN HAN THAKAH:-

Hanluite kidim lua ta ahih manin kum thak a kipan, tuma kum nih kum thum laipan a a geelsa uh ahi, Kapleiveeng khua pam, Tlangzawl khua gei-ah misite kivui sak ta hi. Han pen Tapidawte, Buddistte, Muslim leh Hindu te a ci-in khen 4 in khen a, kizomsak hi. Hih munah a kidumphumte lampi langkhatah, Ohgu te a langkhatah cihbangin khensak
hi. A beisa hanlui ah pen tuabang hi lo mawk ahih manin a nei zo lo, a kidumphumte' han tungah a singlemteh uh botkhia-in, Ohgu/Taih han a kician neilh hi mawk a, mipi nautangte' lungzuang mahmah diak uh hi.

7. WESLEY CUP KIZOM KIK:-

Hih pen zanlamin i nette' sungah gen khin i hih manin saugen nawn kei ni. Wesley Clinic (or) Hospital kipat zawh kum (25) cinna Silver Jubilee Cup min tawh a bawl uh ahi hi. A beisa Sept.9,2011 ni a kipan kimawl a, tu kum thak Jan.4,2012 panin Quater Final panin zom kik uh a, tu'n Semi Final kizo ta-in, Jan.13,2012 (Friday) teh Final kizui
ta ding ahi hi. A mun pen Tahan Saklam Tualpi (Mizo veeng) hi a, sun nai nih pawlin kipan ding ci hi.

Tua lo a dang pawlkhat pawlpi tawh kisai diakte pen a pawlpi zui a kizaksak ci ni. Omna ciatah Topa' thupha. Happy New Year to you all!!!

Thupuak, Peter Khampu.
Kalaymyo