Gullu mual vai Party te le mipi kimuh khopna khawmpi

[Zomi Center]

  

  

Amun;: Taungphila Hall. Kawlpi

Ahun : 26 March 2013 ( 9 : 00 am – 2 : 30 pm )

Hun khen 2 in kizang hi.

Khen 1) na gullu mual le kimlepam man ( Photo )  le video lahna ( 9 : 00 -11: 30 am )

Khen 2) Mualbul khuate lungsim pulakna le Party te dinmun  pulakna ( 11: 30am- 2:30 pm )

 

Hunkhen nihna

Hun- 1)  Hun kipat pulakna

Hun-2) Gullu mual project vai mualbul khua mite lungsim pulakna

A)     Sia Jessi (Latpanchaung khua)

Gullu mual a kitawh ding vai tawh kisai in  amun amual a om ka hihna tawh kizui in ka lungsim tawnga om thute kong gen ding hi . Hih vai ah mipi hamphat nading le supna dingte ka etkak ciangin kikhai sa lua ing. Tu laitak mipi dinmun pen  nungkik / thu nen / dih/ phal/ kha leng a sawtloin kahna hagawina khuamial sungah a kikia ding hi ta hi. Mainawt  / nang/ hanciam ding cileng lah kumpi la company tawh a kitalsik ding kihi ta hi. 

I Gam sungah leisung sumpiang tam mahmah hi. Ahi zongin  gam makaite in nung le ma en kawm in ong kalsuan theih  uh kisam kasa mahmah hi. Khantohna dingin zuaktheih zuakmawh teng zuak lehang sum bel kingah mah ding hi. Zuak  sum tawh khantohna  I zom sangin  mi pumpi bulphuh in khantohna  ding zon huai sa zaw ing. Tua hi keileh khat vei teitei ciangin ut leng utkei leng a kidong tuak thei ding cih ngaihsut huai hi. 

B ) U Kyi Lyen ( Myah lyn khua)

Amasa in hih vai ah hamphatna le hamsiatna te gen nuam ing. Hih project te hangin  singkum lopa kisia ding , huih nin ding, logam Zanglo te kisia ding,  a tawpna ah hih vai hangin gam le lei teng hamsiatna mun a suah khak ding ka lau mahmah hi.  A Sep ding taktak uhleh a tunga ka thute ah bangmah nawngkai na pianglo ding hi ci in kamciam ong piak ngam ding ka lunggulh mahmah uh hi.

 

C ) Dimzang khua pan

 

Hih vai ah a sia le a pha om dingin ka um a, a sialam ka gen masa nuam hi. Tu ciangciang Sen company te nasepna khempeuh ah buaina piang den ahih manin hih vai ah zong ong tu ci lel khaleh ci in ka lung himawh mahmah hi. Democry taktak tawh I kal suan theih hun ciangin to pan leng a ci nuam ka hi hi. Hunman right le right tuamtuam te khempeuh  Sent e in  a thupi ngaihsut kha uh hiam thei nuam ing. Azenzen a kinung kik theilo ding thu ahih leh Democracy gam khat peuhpeuh tawh hileh hoih zaw in um mawh mai ing.

 

Hun- 3)  Naythar phonggy (Gullu and Kabaw valley watch group )

 

Tu ciangciang kawlgam mun tuamtuam a buaina ( mining vai ) te I et kik ciangin Transparency om loh hang  hi cih kimu thei hi.  Hih GKWG sungah kibawlna namkim kihel hi.  Bang hangin hih kipawlna ong piang khia hiam cihleh mipi te in theihloh manin supna baina  I thuah khak ding lunghih mawh man ahi hi. Mipi te aw pilvang ta ni Pilvang takin gamta ni.  Mipi sungah awareness bawl ding kisam mahmah hi.

2008 Consititution , Act 4 sungah  Gamsung thuneihna a sangpen pen mipite khut sungah om hi, a cih mah bangin hih vai ah zong mipite thukimna pen ong thupi mahmah ding hi. Bangmah kisem nailo ahih manin  hoih takin gel in ngaihsut mahmah kul hi. Supna baina bek ong piangsak thei ding thu ahihleh zong a hun lapin I khak tan thei dingin hun manpha a neite I hi hi.

Gullu mual pen Zogam sungah a om hangin kawlpi tawh a kimat ahih manin a sia a pha khempeuh kawlzang in a kithuak ding hi zaw hi.  Kawl paunak ah khua hun pen singkum lopa in kem hi cih khat om hi. Ahi zongin singkung lopa te kisialeh khua hun zong ong kikhel ding hi. 

 Mual tawh nading power pen suangmeihol kizang ding ci ahih manin nak lung phamawh huai mahmah hi.  Hih pen amau adingin sum  bei a tawm penpen thu hi a, ei adingin a thusia mahmah thu khat a hi hi

.  

Tu tadih in I leisung sumpiangte to nai kei lel leng ut huai sa ing. Hi ci koih lai lel leng hoih zaw ding hi. Hih te khempeuh  hoih takin i kepcing ding pen mi kim’ tavuan ahi hi. Kumpi thuneite tavuan ahi hi.

Party te in zong hih pen Party vai bek in en loin gambup vai mipi vai in ngaihsun in nong gamtat ding uh kisam ding hi. Hih vai ah amun a muala om mipite mailam ding ngaihsun in a kisam bangin in I kalsuan kul ding hi.

 

Hun- 4) Party tuamtuam te thugenna

a) Pu Van Kim (President, Kalay.  CPP)

 

Hih vai ah hun lap takin kong kihel theihloh uh pen kisuang mahmah ung. Party vai tuamtuam  manlahna hangin athupi mahmah ahi, gullu vai pen na nusia kha ka hih manin ong thum masa nuam ing.

Hih vai pen mipi ading supna baina lianpi a piang thei ding thu hi a, midang te sangin a kima om ei teng mah in pan theihna panin I panhuan kul ding hi. Hih vai pen kampi bek tawh a kizo ding thu hi lo hi. Ei tektek in I sep kul ding hi. En I hih theihkei leh zong a sem a bawlte sum le pai tawh I panpih thei ding hi. Gullu mual panin Nickel bek hi loin van manpha tuamtuam piang lai hi ci in ka thei hi. 

GKWG pawlte thanem het loin nong mapan ding uh kong thum nuam hi. No tawh ma apang dingin a Ready ka hi uh hi.

B) Pu Chin Sian Thang (ZCD)

Gamsunga om leisung sumpiang khempeuh pen mipi neihsa ahi hi.  Mipi theihloh le thukimna omloin bangmah kisem theilo ding hi.Zogam leitang ahih manin State government tawh thukimna lai bawl kul hi.  Tua thukimna laipi te mipi tungah ong tangko ding kisam hi.

Tu ni  ciangciang tua thukimna te kua mah in kitheihpih kha lo hi.  Mipite tungah asia apha akim takin ong gen ding uh kisam hi. Sepna gelna khempeuh ah leitung level in I sep ding thupi hi. Hih vai pen thu lianpi hi . Gam khat le gam khat vai hi.  Vanzuak vanlei I hih manin vanman ding pen I kidek zek ong kul ding hi.  Hih pen nawhsa thu in hih loin mipi tawh hoih tak thu ki-min masak ding ong thupi pen ding hi.  

 

C) U Ko Lay (Gs. NLD. Kawlpi)

Hih vai pen thu khat peuhpeuh ah thuman thutak bulphuh in I sep khiat kul ding hi. Thumanlo tawh ong kigamtat khak lohna dingin ma I pankhop ding ong kul ding hi. EIA/SIA  te hoih takin en in I letkip ding kisam hi .Amaute in tuate gina takin a nei nai uh hiam.

Mipi phattuam pih khol loh ding ahihleh kisem veh keileh hoih zaw ding hi. Kim le pam singkung lopa susia lel ciang ding ahih leh seploh mah hoih zaw ding hi.  Bangbang ahi zongin tu tadih in kisem nai kei photphot leh hoih pen dingin ka lamen hi.

 

D) Pu Zozam (MP. CNP) 

Gullu mual vai pen  Zomi le party makai kat kahihna bek hi loin gullu mual kim pen  keima meekuang lui na hi mawk ahih manin hih vai pen keima aituam nangawnin  ka ngaihsun hi. Hhi gullu panin bang piang taktak hiam cih pen ka lunglut pen thu hi. Nickel bek hileh companyte in hih zah in hanciam hethet lo ding hi.

Hih vai pen CNP zumpi ah EC teng tawh nakpi takin kaki kum uh a lunggulhna nam 10 ka nei uh hi.

1) Gullu vai Mining Dept te in mipi tung tangko kisam hi

2) Mining Act kician neih mengmeng nading kisam hi.

3) Asem ding companyte in mipi tawh kimu in thukimna la hamtang ding

4) Bangteng piang taktak hiam cih Mining Dept in mipi tung tangko ding

5) Side effect khempeuh mipi tung theikhol sak ding

6) Nasem ding mi (numei/pasal) kician tak gensiang ding (minam )

7) Mipi te tan( share ) bawl sak ding, bond (sep hun ding) kician tak lak ding, Independent Audit nei ding

8) Nasepna hanga supna baina te leitung level in liau ding.

9) Project a  en-cik ding kipawlna gina khat nei ding

10) Bangbang ahi zongin gullu mual to nailo limlim ding.

 

Hun- 5)  Mipi khempeuh dinsa in Gam lapi kisa hi.

Hun -6) Hun zawhna pulakna

 

(Media te tawh Press zong kinei to suak pah hi)

(Thu kigen khempeuh a kitom lak ahi hi)

 

Liantuang

Kawlpi (09400511757)

Gullu vai March 20, 2013 Statement.pdf