CNF/A Office leh Galkap len Hong Honsawm na uh tawh Kisai LZI Pan Zaksak na

[Zomi Community Network]

Zomi U leh Nau,

Na zaksa bangmah un, Kawlgam pen Democracy gam hong suak hita hi. Ih thungetna te Topan hong dawng aa, leitung bup kipawlna tuamtuam pan nasia tak aa genpih na te tungtawn leh a sunglam pan phut na te hang in, a hun tungta a hih man in, kawlgam ki uk na hong ki khel vat hi. Nung deuh aa Kawlgam kava zin sung in, kawlgam pen Democracy gam a suak takpi a hih lam ka mu hi. A hizong in, nau ngek suaktung bang aa, picing nailo a hih man in, nung kin nawnlo aa a picing democracy gam taktak hong suah nading in thu ngen toto lai ni.

Tua tawh kizui in, January 6, 2012 ni in Kawlgam kumpi lam Chin State level leh CNF/A te kikal ah gal kikap nonloh nading thukim na bawl uh hi. Tua tawh kisai pen a lungdam huai thu a hihi. CNF te bek hilo in kawlgambup democracy hongsuak aa thautawi gamnuai mi khempeuh tawh kilem na hong om nading ih thungetna a hihi.

A hizong in CNF/A leh Chin State kumpi kikal thukim na a neihna sung vuah, cikmah aa a neih ngei nailoh uh Tedim township sung ah CNF office leh CNA galkap len neihding hong ki thukim na uh tawh kisai in Zogam bup leh tuipi galkai Zomi te in ki sangzo vetloh a hih man in, kawlgam lam pan state level leh gambup kumpi te tungah CNF ten Tedim gamsung aa zum honghon ding uh leh galkap len hong bawl ding uh san zawhloh na nasia tak in laitawh puak uh hi. 

Tua bangmah in, February 16 ni in ZIUSA pan palai pawl mi 6 Indianapolis, USA ah CNF makai te tawh maitang kimu in CNF ten office hong honloh nading leh galkap len hong bawl loh nading un khauhtak aa a kigen ban ah, lai tawh CNF Supreme Council tung ah ki puak beh hi.

Tua bangmah in, Tedim, Tonzang leh Cikha Township te ah CNF in office leh galkap len te honghon peuhmah loh na ding in LZI  (Leitungbup Zomi Innkuan Kipawlna) pan zong CNF Supreme Council tungah lai khauhtak in kikhak hi.

Gamsung gampua aa om Zomite in CNF ten office honghon sawm na uh leh galkap len hong hon ding thukim lohna a ki pulak bangmah in, CNF Supreme Council lampan zong hong sangsiam aa, kawlgam kumpi lampan zong hong thukim pih in, Zogam bup ah ki itna, daih na leh khantoh na ih neih nading lam et na tawh ih ngak hi.


Dr. Chin Do Kham
President
LZI