BIAKNA SIAPITE'N SEMKHAWM ZIAHZIAH TA-UH

[Zomi Center]

Tunungsungteng Kawlpi leh khamtung a biakna pawi tuamtuamte' lakah a ettehtak diak nih le thum lai kong awmsawn nuam hi. Hih thu Kawlpi pan nipi sim a kihawmkhia laite ah a kihel a om hangin kihel kim lo banah i group mail te ah hong kikhahkhia kim lo ahih manin keima theihpihna tan thangahtakin hong hawmsawn ka hi ding hi. Nungin kong
khahkhiat ding lai ka gelggelh laitak computer hong mitvat, ken save kha lo mawk ka hih manin hun hong ziakai to a suak hi.

1. Revd Go-3 (or) G3 Mapangkhawm:-

March 29-April 1,2012 sung Tedim gam AG khangno khawmpi Laitui khua ah kibawl hi. Tua hun sungah nitaksim Speaker dingin Yangon panin Revd Dr.Go Chin Zam (a) Zambawi (National Director, OM, Myanmar) hi a, sunsung thusinna tuamtuam ah Revd David Go Lian Sum(a)David Suum (Senior Pastor, GAG, Ygn. & President, GMI) leh Revd Go Van Mung (a) GoVan (TBC-Y & Prof.MIT) te hi a, thupi thei lua mahmah hi, ci-in gen tangtang uh hi. Section sung banah a za khakha te paiciat uh a, thusin dinga pai khangno vekpi 720 bang paithei a, sunsim thusin vekpi 1500
pawlpawl leh nitaksim thungai pen mipi a tawmpen 2000 bang pha ding hi, ci-in gen uh hi.

NB: Hih thu-ah nidang bangin pawlpi kideidanna om lo a, hong sepkhop uh etlawh leh ettehtak kasa mahmah hi. Tuaban ah Siapiteng pen a min uh a "Go" vive hi uh a, hong tuampian sim mahmah hi.

2. ZBCM Pawipi, Kalaymyo-ah:-

Hih pen hong kitangko khin ahih manin i tam genthuah nawn kei ding a, hihhunah thupi diaka katheih pen, FGA pan Sia Mungtawng leh RC panin Bishop Felix Khen te tawh mapang khawm uh a, thugente lah thupi thei-in pawlpi tuamtuam sepkhopna mah ahih manin etlawm kasa mahmah hi. Tuabanah Nai taupi (Watch Tower) golpi khat zong Bethel pawlpi biakinn huang sungah phut uh a, etlawm mahmah hi. Tedim nautaupi' zomah i neih nihna bang hithei dingin ka lamen hi.

3. Laipian/Siangsawn Pawipi kibawl:

Nung nipi sungmah hi a, Kawlpi Sayadaw huangkhang a, Revd Thang Hen Pau' innmun huangsungah nasiatak leh thupitakin bawl uh hi. Sanggam Laipiante pen a ettehtakna uh tampi kiza kimukhia thei hi. A dangdangte' gen ta kei leng upa leh siate zahtak ngiat uh hi. Pasian' zomah koih thei uh hi.

4. Chapchar Kut Pawi ki-limbawl:-

April 2-4,2012 sung nih leh zannih sung Vengpui Methodist Hall, Tahan ah nasiatakin bawl uh hi. A nitak nihna-in ka kihel kha a, thupi leh ettehtak kasak honpikhat om hi. A sepkhop a mapankhop dante uh mahmah ettehtak kasa pen hi. Thu kimang uh himai. Kipahtawi siam uh zong sa ing. Zukhamte nangawn in mi buaisak se lo-in amau thangah danin amau teng mah a nawl khatah kikawi diamdiamin lasate thapia thei se uh kasa hi.

Hih hun-ah Mizoram President, Pu Lalthanhawla Sailo zong a sap uh, amah zong pai ding geel khin hi napi'n, vai thupi pawlkhat a nusiat theih loh manin hong pai thei lo a, ama' hopihna lai milian khat mah in hong simkhia hi. Ken bel tawmlai mangsiakhiat thei sam cihciang bek ka hi hi. Mizo minam laam a tuamtuamte leh Solo sakna leh Music zong a siamte mah zang uh a uh hi. A nunung lam ciangin Fashion Show liapalte in hong lak uh a, mipi'n tha kingah thei mahmah hi. Tuate bel Zomi liapal te kan hi tuan sam kei; ki level lel uh cih ding hi. Zomi liapal khat zong kihel a, Falam a kipan kilawmtakna thupitakin zang uh hi. Tangvalte zong tawmlai mah kihel uh hi.

Ei leh ei a kiniammuh cihbang tuan peuhmah keng in, ih sanggam Mizote pen Zomi a kici tangtangte'n i etteh ding tampi-in tamlai mawk ei guai. A dang tampi genta kei leng, amau veengteng ah kultal lampi phah uh a, a veeng vuah guta om nawn lo phial zahdong hi ta hi. Lampi tungah sing tuah ding singbek khawng koih uh, mang het lo mawk
hi...etc...

5. Campaign kibawl ziahziah:-

Kawlte Tuibuahpawi tawh a kituak zawdiakin ei Christian biakna, pawlpi tuamtuamte in Campaign kinei ciat hi. Naupang/khangnote pumpi kepna mahmah leh a thupi pen Kha Gupkhiatna a ngah theihna dingun geelna ahi
hi. Hih hunsung kibawl kei leh mi nungteng zui a, amau a pawineite sangbang a nuamsa zaw Zomi (or) Tapidaw khangno tam thei mahmah den hi. Tua ngaihsutna, dalna zong hikawm ding hi. Tukum diakdiak democracy minpua i ngah cilna leh bihiang kum hi sawnsawn ahih manin tuibuah sung diakdiak hawhna ciahna ah kidopsiam kul thei kha diak ding hi, kici hi.

A TAWPNA-AH:-

Pasian' hong piansak Zomi i hih mah bangin puahin zuun ni; ahitazongin Pasian sangin Zomi cikmah hunin liansak zaw kha het kei ni. Tua kammalte tamzat lua liang kha kei ni. Kuaman hong tuh peuhmah ken teh. Chin leh Zomi peuh tawh zong buai hun nawn kei. Ih Christian pihte mah ahi uh hi. Hibang teng peuh tawh i buaibuai a leh I khuahun in hong khengkheng ding hi ta hi. Ih Pasian kimakaihsakin kipawlkhopna leh sepkhopna tawh Zomite kalsuan ta ni. ZOMI KHEMPEUH PASIAN' MI-AH MASOT TO TA NI. ZOMI PAAI DING CIHNA HI PEUHMAH LO A, TUA PEN A HI SA,
KUAMAN ZONG HONG TUH HIALHIAL LO DING AHIH MANIN IH ZOMI HIHNA A KIP LEH A KHANTOH ZAWKNA DIGNIN ZOMI SANGIN PASIAN LIANSAK ZAW TA NI. Laisim mimal tungah Topa'n thupha hong pia hen. Genkhialh a om leh ki-theihsiam!!!

(Maan/Photo dangte kem kha lo ka hih manin sanggam Mizote Chapchar Kut maan attachment ah na na etsak le uh teh).

Deihsak Thupuak
Peter Khampu.

"...Na hoih sep ding cimtak kei ni. A hun a cin ciangin a gah i at ding hi." (Gal. 6:9).