Sangmang Cope hong tun zawh kum za cin pawipi sungah laibu tuamtuam hong kihawmkhia a, ih neihgil gamh leh goute vive ahi hi. Tu-in zong Insein-a Seminary Hill a om Myanmar Institute of Theology leh Myanmar Institute of Christian Theology sang-a kah kamphen kullo Zomite in 'Ciimnuai Khuavak Volume 12' ci-in hong hawmkhiata uh hi. Hih laibu mai 200 pha-in i minam sungah Pasian' thuthuk lamah i muan i suante' thului tuamtuam leh Seminary Hill-a sangkahte' thului gawm 35 val kigelh hi. Laibu nung behlapna( appendix) ah Seminary Hill-a sangkah ngei khempeuh i min kiciamteh hi.Mikim in ih muh theih dingin a tuamna hong attach ing.

Ciimnuai Innkuan Thu:

MICT-a sangkah i sanggam numei khat in 1992-1993 pawlin sum-le-paii sangsap hamsatna hangin tuibuk sungah amah leh amah ki-suicide in hong nusia hi. Tua bang thu a om ciangin,
" Ute-naute kipawlna association tuamtuam ah i om zongin luang kipham dingte hi hang e," ci-in makai masate in 'Ciimnuai Innkuan',ci-in October 1, 1993 ni-in na phuankhia uh hi.Thu bulphuh dingin "Itna, kipumkhatna leh kithutuahna"(Phil. 2:2) na teel uh hi.A kiphuat cil-a kipanin ngimna hoih tuamtuamte tawh na kalsuan uh a, zuih ding thukhun kician takin na bawl uh hi. Hamsat-dongtuahna a thuak sangnaupangte khat leh khat kipanpih ding, Yangon khuapi sung-a om pawlpite tawh biak piakna neikhawm ding cih leh gam leh minam adingin biakna tawh kisai 'Ciimnuai Khuavak' kum simin bawl zawh den ding cih ngimna hoihte tawh ma na pan uh a, tu-ni dongin maban kizom toto hi. Kum thak khit ciangin zong Yangon khua sunga om Lai Siangtho sangnaupangte(Tedim kampau teng) kimuh khopna Inter-seminar zong neih zawh ding geelna om hi. Hih tawh kisai-in thungetna tawh hong panpih ciat un. Hih 'Ciimnuai Khuavak Volume 12-na' pen bu 500 bek kibawl zo a, bu khat ciangin Kawlgam sungah Ks. 1500/- in kizuak hi.Gamdang khawng panin a sim nuam leh a deih velvel na om uh leh zong kilei thei ding hi.

Lai tawh nasepna in kum zalom 21 sungah gamthak nasepna lianpen khat ahi hi.


Khrih sungah Ciimnuai Innkuan tangin,


Suang Khen Pau
Chairperson cum editor
Publication Committee
Ciimnuai Innkuan(2010-2011)
Seminary Hill, Insein
Yangon