UNHCR zum lut nading tangthu bang ci bawl ding?

[Tg. GT]

UNHCR ah Galtai siauh na ah i tangthu cing (case) bang cih bawl ding cih hong gen thei ding a om leh lungdam mahmah ding hi. Tua ban ah tangthu bawlsate (sample) dan a om leh zong hong lak thei ding a om leh tampi phatuam ding hi. A diakdiak in mi thakte a ding in bang ci bawl a, bang teng kihel sak ding, koi ci leng hoih cihte ki thei khinlo hi. Hehpihna tawh khat peuh in or a tuamtuam hong lak sawn un.

[Taang Sianpu]

Zumsung lut na ding in tangthu icih (case) pen a thupi pen hong suak hi. A masa pen kigin kholh ding ahih mah bang in a thupi mahmah leh, interview dangte, mailam dingteng pen hih interview in khensatna pia ci leng kikhiallo ding hi. Tua ahih man in tangthu i bawl ciang i ngaihsut khol ding leh i kigin ding thu pawl khat hong hawmsawn ningh.

1. Refugee icih bang hiam cih tel ding kisam hi. Kuate hi a, bang teng huam hiam cih...

2. Refugee hihna ah zong UNHCR zum lamte in amau santheih bang ciang, bang teng leh bang issue teng om cih pen theih ding kisam mahmah hi.

3. Refugee a siau, asylum a siau khat in a paikhiatna gam pan ong pai khiatna pen a thupi pen hi a, ong paikhia ciang bekhilo in ong taikhia, sih dek phial mah a hong taikhia ahih kul hi.

4. Refugee khat in hong taikhiatna gam pan in ama omna gam ah a ciah kik theihlohna kilang tak in a gen theih kul ding hi.

5. Refugee khat in ama hong tai khiatna gam ah ciahkik thei nawlo, ciah kik zenzen in, ki puakkikna khat om leh zong a nuntakna lauhuai mahmah hi ci kilang tak leh uphuai tak in a gen theih ciang bek in "International Protection" kisam ahih na ki ciamteh ding a, tua ciang bek in RSD (Refugee Status Determination) a zo ding ahi hi.

[MC Khaipu]

Asylum san theihna ding in hih bangteng hi, race, religion, nationality, members in political groups or any social groups. Na case ah hih a tung a thu nam ngate' nih leh thum bang tuang sak ding hi. Tua hih leh baih zaw deuh ding hi.