ZOMI FOOTBALL ASSOCIATION (ZOFA) CUP 2011 TANGKONA

[Zomi Center]

Find more photos like this on Zomi Social Network

I theihsa le i zaksa om mah bangin Pasian huhna tawh  abeisa 2006 kum akiphuankhia Zomi Football Association (ZOFA) kumsim in kimawlna kinei thei a, tun a kum 6 cinna " A (6) veina ZOFA Cup 2011 " zong kipankik thei i hih manin, vaihawm makaite le hun nuam hong zanghsak i biak Pasian min i phat khawm hi. ZOFA pen minam buppi huam a min kiphuak le kisem ahih mah bangin akisam sum le paiite gam sung pan le a tam zaw tuipi galkai Zomite sung mah pan vive ahih manin, panpihna a pia Zomi kipawlnate le mimal te' tungah ZOFA Committee tangin lungdamna thu i puak hi. A diakdiak in tukum ZOFA Cup 2011 ading Zomi Innkuan USA in mapanna hong nei thei uh ahih manin, ZIUSA makaite le mipi tungah lungdamna i puak hi.

ZOFA CUP 2011 tawh kisai kimawlnate le sep le bawl ziate tawh kisai adiakdiak in gampua lam zaksak/ tangko dingin ZOFA  Central Committee i sehna om bangin, ahi thei zahzah hong pulak/ khahkhia zel ding hi ung. ZOFA Cup 2011 pawipi honna ( ZOFA CUP 2011 Openning Ceremony) pen October 24,2011 ni-in Tahan Zomi tualpi ah kinei in, Rev. Tuang Khan Kap (Formation Committee of KVBC) pen zinmangpi ( Chief Guest & Speaker) in kicial hi. Tukum zong Team 17 kihel thei-in, Kawlpi khua pua pan Team 4 kihel cih kiza hi.

Tukum ZOFA Cup 2011 Team khenna ( Match Fixture) le tuni October 26,2011 (Wednesday) kimawlna lim ( Photos) pawl khat mite ettheih dingin hong khahkhia ung. A hun zui in, hih Match Fixture tungtawn in nisim kimawlnate update hong kizasak zawhna ding hong hanciam zel ding hi ung. Tukum ZOFA kimawlte zong khangno thei mahmah le siam thei mahmah uh cih kiza hi. A tawpni dong mah kimawlte sung akipan khua sung le veng sungah buaina om lohna ding thungetna tawh mapang ciat ding kicial phapha hi hang.

Thungetna ah phawk ding:

Tuni October 26,2011 ni ZOFA kimawlna sungah Emmanuel Baptist Church Footbal Team pan sanggampa khat pen kua mah sukkhakna om loin, a mah le amah tuk ziauin sisuak cih thu kiza ahih manin, a nusiat a lawmte akipan nu le pa, U le nau le pawlpi mite ading thungetna ah phawk ciat ni cih i kizasak hi. Tua banah hih thu hangin ZOFA Cup 2011 le ZOFA Committee makaite sungah thubuai a om lohna ding zong thungetna ah phawk ni. I sanggam pa hong nusiat zia tawh kisai a thu cing zawin zing le thai lamah kizasak toto lai ding hi hang.

Bangbang ahi zongin, ZOFA pen amin phuahzia akipan mipite lam pan diksa/ diksa lo cih zong ki om kha thei ding hi. A min sangin i ngimna i tup bulpite ahi Zomi Tualpi ( Zomi Stadium) ding leitang Acrea 10 neih zawhna ding le tua sungah Zomi Innpi ( Zomi Community Hall) lianpi i neih zawh nang ngimnate kithupi ngaihsut pen hi. Zomite tam teenna pen khat ahi Kawlpi (Khawlzang) ah Zomi min tawh Zomi tualpi le Zomi innpite i neih zawh loh manin, midangte' veng sung a om Tualpite le Hall te maitang singhawng belh in i kawm hun tam khin lua ta hi. Tua thute hangin ZOFA hong piakhia hi zaw cih i kizasak nuam hi. Tulaitak ZOFA Committee i nasep ding maban lianpite mai kum sung akipan Kawlgam, vaigam le tuipi galkai Zomibup tungah mapankhopna ding vai hong kitangko khia taktak ta ding cih zong ZOFA Committee (kawlpi) pan kiciantak kiza khin hi.

Tukum " A (6) veiina ZOFA CUP 2011 " tungtang ah kimawl khangnote, vaihawm makaite le adiakdiak in akisam panpihna ( Sponsor) asem Zomi Innkuan USA te' tungah i biak Pasian in minamte' thupha kicingtak hong sit kei ta hen cih i thungetna ahi hi. Kum simin ZOFA Cup kinei den ding ahih manin, mai kum ading zong Zomi Innkuan..( ? ) cihte in minam le i Pasian min tawh i kihelzawhna dingin tumah akipan thungen in, kigingkhol ciat ding ZOFA Committee in lametna lianpi kinei cih i kizasak nuam hi. ZOFA Cup le maban nasep zia dingte tawh kisai theihbeh nop le dotnop aneite in a nuai a mite' tungah suaktatak kidong thei den ding hi. Laisim mipite tungah Pasian in kipumkhatna le sepzawhna tha hong guan ta hen.

Contact to:

Kham Do Dal
General Secretary
ZOFA, Kawlpi
Email: [e-mail]

Kam Suan Mung
Treasurer
ZOFA, Kawlpi
Email: [e-mail]

Thang Sian Kham
Former GS & Consultant of EU
ZOFA, Norway
Email: [e-mail]
Mob: [phone]

Note: ZOFA tangthu tom kim asim nuamte in hih a nuai a Link pan kisim thei ding hi.
http://www.tongsan.org/news/34-tongsan-news/71-zofa-cup-results-200...


ZOFA Central Committee tangin,

Sia Khampeek (Tongsan Pu)
Norway (Camp)

 

[Taang Sianpu]

ZOFA Update:

2011 ZOFA Cup tuni 24 Oct.2011 ( 2:00pm) in Tahan Tuaipi ah  honna pawipi thupi tak in kibawl hi. Tukum ZOFA Cup  bawlung kidemna ah  team 17  pha  a, tua sung ah kumdang banglo in  Kawlpi Khuapua pan in

1.Tedim CMBC pan team 1

2. Chantagyi BC pan team 1

3. Mualpi  Youth Fellowship pan team 1 cih bangin   hong kihel thei uh hi.

Bawlung pawipi honna pawi sungah  Rev. Tuang Khan Kap in thugenna hong nei in,

Kumpi lampanin  Kawlpi myone ukpipa in  thugenna tomno leh honna hong neih sak hi.

Biakna lam pan in Uliante leh Kumpi lam pan  in Uliante tampi tak in hong muak thei uh hi.

Tutung  a 6veina ZOFA Cup  abei  khempeuh LZI,USAte in hong sponsor uh ahihi.

A 6veina ZOFA Cup Pawipi honna mante nana en ciat  dih 0o leh lawmte.

Lungdam

Sia Pauno (ZYA sec.)

-- 
Zahtakna lianpi tawh; 
Zomi Khangno Kipawlna
Kawlpi
TOPA THUPHA MAW LE !

E-mail: [e-mail]

SRC: [e-mail]