- Tg. En Sian Mung, Murlen

Thupatna : Lai Siangtho sinna (theological Degree) nei ka hihloh hangin, keima phak khomkhomin Lai Siangtho ka sim veve hi. Tedim Lai Siangtho bek hi loin, Mizo (Lusei) Lai Siangtho leh Mang (English) Lai Siangtho zong ka simthei zel hi. Tedim Lai Siangtho (Puahphatna) leh Lai Siangtho (Version) dangte kibatlohna tampi om a, tuate a vekpi in i genkhin zo kei zongin, tawmkhat kikum lehang uthuai ka sa hi.

1. Piancilna 2:8a : Tedim Lai Siangtho tei masak, Mizo Lai Siangtho leh Mang Lai Siangtho-ah Edenah huan khat bawl hi ci napin, Puahphatna-ah,Eden huan khat bawl hi ci hi. Eden huan bawl cih leh, Edenah huan bawl (planted a garden in Eden) cih pen kibang lo hi.

2.Thukhente 11:1a : Tu-in Gilead khuami Jefthah, a thahat galhang khat hi a, ahih hangin amah pen zawlta ahi hi.
Tedim Lai Siangtho-ah Jefthah pen zawlta kici a, ahi zongin Mizo Lai Siangtho leh Mang Lai Siangtho (TEV) ah zawlta kici tuan loin, Numei paktat khat tapa (son of prostitute) ci-in kikoih hi.

3. Samuel Nihna 3:2 : Hebron ah David tapate suak hi. A taciil pen Jezreel khuami Ahinoam tawh a neih AMMON ahi hi. Tedim Lai Siangtho-ah David taciil min pen Ammon ciin kikoih a, ahih hangin, Mang Lai Siangtho-ah AMNON ci-in kikoh hi. 

4.Kumpite Nihna 7:5a : Tua ahih ciangin amaute Syriate phualah a pai dingin phalvaak tuungin tho uh hi. Galten Samaria khuapi a umcih laitakun khuapi sungah kialpi tung hi. Miphak ki kulh kongpi lutna-ah om uh a, Khuapi sungah lah ann omnawn lo a, a puksi veve ding i hih ciangin galte phualah pai ni ci-in kikum uh hi. Hih galte kianga a pai hun uh pen Puahphatna-ah Zingsang phalvaak tuung ci a, Mang Lai Siangtho (TEV) ah, Zingsang phalvaak tung ci loin, Nitak khuamui kuan (as began to get dark) ci hi.

5. Esther 4:16d : Ngeina ahihloh hangin, kumpipa kiangah ka va pai ding a, ka sih leh zong a si ka hi mai ding hi ciin dawng hi. Ahih hangin Lai siangtho sunga kammal minthang mahmah, Ka sih leh zong a si ka hi mai ding hi cih thu pen Puahphatna sungah hong kihel nawn lo mawk hi.

6. Jeremiah 38:14a : Kumpi Zedekiah in kei hong sam a, Topa biakinn kongkhak tumna-ah a hong sam hi. Tedim Lai Siangtho-ah kumpi Zedekiah in kamsang Jeremiah pen, Topa biakinn kongkhak tumna-ah samdanin gen a, Mang Lai Siangtho (NIV) ah ahih leh, Topa biakinn kongkhak tumna-ah hi loin, Topa biakinn kongkhak thumna-ah sam (Third entrance to the Temple of Lord) danin genzaw hi.

7. Mangmuhna 12:4a : A mei tawh vanah a om aksi seh sawm suah seh khat vatkhia-in, leilak denna hiMangmupa Johan in vanah lim lamdang gulpi san, a lian mahmah khat mu hi. Tua gulpi-in a mei tawh, vanah a om aksi, seh sawm suah seh khat vatkhia-in, leilak denna hi ciin Tedim Lai Siangtho in gen a, ahih hangin Mang Lai Siangtho (NIV) in sehsawm suah seh khat ci loin, Seh thum suah seh khat vaatkhia (a third of the star out of the sky) ciin gen hi.

Thukhupna : Tedim Lai Siangtho pen maan lo, cihna hi loin,a teite zong khial thei a,a khetna lamah zong a kikhial omhikha ding hi. Tedim Lai Siangtho (Puahphatna) sungah min kilaih tampi om hi (Gtna. Judah - Jew). Tedim Lai Siangtho sunga Ni, Kha, leh Kum te banah, nambat pen Lai Siangtho dang (Mizo, English) sunga tawh a kituak lo tampi tak mah om hi. 

Courtesy: LAITAI, July & August 2011, pp. 40-41, Editor Rev. Suan Khan Thang, Zomi Baptist Churches, Champhai, Mizoram, India. 
 
Hau Za Cin
Phuitong Liim

Thupi sa-a kong teikhiat hi ei.

Views: 266

Reply to This

Replies to This Discussion

Tua a kikhial na te pen Kawllai, Lai lai(Hakha) Tedim teng beek a kibang hiam? kibang peuhmah leh pen Kawlgam bup liinglawng sak zo ding Satan nasepna lianpi hi ding hi. Hong thahat peuhmah ka sak mah hi. Free a LST bu tuazah hawm khia zo cih pen Satan in Lai Siangtho zang a na hong sem taktak ta hi ding hi.

Reply to Discussion

RSS

© 2024   Created by Zomi Community Network.   Powered by

Badges  |  Report an Issue  |  Terms of Service