Khuado Pawi Thupuak 2011 ( ZIUSA Pan)

[Zomi Community Network]

ZOMI INNKUAN USA, INC.

“KHUADO PAWI”  THUPUAK

 

Zomi-te’ Ngeina Pawipi “Khuado Pawi” abawl USA Zomi khempeuh tungah Zomi Innkuan USA mintawh  lungdampihna, angtangna leh Zomi-te’ Kumthak thupha kong puak uh hi.

 

Zomi Innkuan USA kipawlna Ngimna Bulpi khat in, “Zomi-te in minam kician, minam picing semsem dinmun khat atun’ zawhna dingin kipawlkhawm in vaihawmkhop theihna ding” cih ahihi. Minam kician, minam picing khat in ngeina hoih nei-in kemcing hi. Zomi-te i tunna mun, i pemna gamlian khat ahi USA leitang tung ah, i ngeina hoihte kemcing in laamsang i hih man in Zomi-te minam kician, minam picing khat i hihna kilangsak hi.

 

“Khuado Pawi” in Zomi-te “Lungdamkoh Pawi” ahihi. Zomi-te in ei sang a vanglianzaw om a, tua tung pan in thupha hong pai cih  a-um minam i hihi. Nuntak kivakna ding sep leh bawl tuamtuam a nei USA Zomi mimal khatkim ciat in ih sep ih bawlna tungtawn in i thupha sangte, i upna, i biakna khat ciat tawh kizui-in kideidanna omlo in suakta takin lungdam i koh ding hun a hihi. I pemna gamlian khat a hi USA ah “Thanksgiving Day – Lungdamkoh Ni” cih ki-nei hi. I pemna gam i ngeina hoihte i pompih kawm in, i Zongeina hoihte manggilhlo in i lapsangden ding Zomi khatciat mawhpuak hi cih phawkden ni.

 

 

“Khuado Pawi” in Zomi-te “Kumkhen Pawi” ahihi. Zolai simbu sungah, “K - Khuado Pawi Kumkhen Pawi” i cih bangin kumlui kumthak kikhenna pawi ahihi. Judah minam, Sen minam cihbang minam lian pawlkhat-te mah bangin Zomi-te in zong kumsimna a tuamin nei-in Kumkhen Pawi atuam neih minam khat i hihi. Zomi atamzaw i Biakna leh Leitungah a kizangpen ahihna zui-in Christian Kumsimna i zat kawm mah in, Zomi-te i ngeinahoih khat ahi Zomi-te Kumsimna, Kumkhen Pawi manggilhlo in i lapsangden ding Zomi khatciat mawhpuak hi cih zong phawkden ni.

 

Zomi-te Kumlui Kumthak khenna “Kumkhen Pawi”, Zomi-te Kumsimna tawh kizui-in kumkhatsung tawntung ih sep, ih bawlna te ah  i thupha sangte hangin i biak a vanglian Pasian tungah “Lungdamkoh Pawi” – Khuado Pawi – nuamtak zang thei in, mailam ah thupha tampi a sang Zomi-te i hih kim theihna ding i biak Pasian in Zomi-te khat kimciat thupha namkim leh daupaina hong pia ta hen. Amen!

 

Ngeina Kician nei-te, Minam Kician, Minam Picing ahihna phawkkim ciat ni.

 

 

Zomi Innkuan USA kipawlna buppi tangin,

 

 

Executive Committee

 

Zomi Innkuan USA, Inc.

 

October 15, 2011