Kawlpi ah Gospel Music Festival Kibawl

[Taang Sianpu]

 Tunung a i kizaksakna om bangin Oct.18,2011 (tuesday) nisun leh nitak pen "Gospel Music Festival" hunin kizang hi. Agape A.G Biakinn ah nuamtakin kibawl hi. Guahzuk hun tawh kituak hi ta leh a lawp velvel teng mah kipai a, biakinn dim mah kipha hi.

Holand panin mikang Pastor honkhat hong pai-in healing ministry tawh thuah a, cina dam zong om hi. Sunan hong vak uh hi. Praise & Worship nasiatakin kibawl a, kawlpi dungsuk a om pawlpi tuamtuam, Zomi bek hi lo Falam leh a dangdangte zong sam uh a, kilawmtakna hoihtak khat zong ahi hi.

CHIN VUANGYICHOH, PU NO THAN KAP IN THA HONGPIA:-

Sunhunin Chin Vuangyichoh ahi, Pu No Than Kap zong hongpai in mipi mai, Pulpit tungpanin thapiakna hong nei hi. Hibang a thu hoih tawh Pasian biakna bawl nadingin phalna cihte ah buaina a om loh nadingin mapang khawm ding hi hang. A kisam a om leh zong huhtheihte kihuh kipanpih ding hi hang, ci-in deihsak thumanpha pawlkhat hong gen a, tha kingah mahmah hi.

Tutunga gamdang pan a lenglapite hong makaih pen Rev.Philip Thang in hong makaih hi. Maikum ah zong Kawlpi mah ah a picing zaw a bawl kik dingin lunggulhna nei uh hi. Kawlpi ah a bawlma un Yangon Tuwana Stadium ah nasiatakin bawl uh a,  hunbawldan  a thupi diakteng hih anuai a bang ahi hi.

YANGON, TUWANAH STADIUM AH:-

Hih Gospel Music Festival pawipi pen nung nipi sungin Yangon Tuwanah kimawlna huangsungah nasia takin bawl uh a, mipi tulsawm, 10000 bang kipha ding ci hi. Tuatakah tulaitak Kawlgam Vuangyichoh pa nangwn hong pai a, thapiakna nei ci hi. Mipi in bawltak sa lua, tha ngah lua uh ahih manin maikum ah zong bawl zawh nading lunggulh ahih manin upna kamciam a lakuh leh i sanggam, i beh Kachin sungpanin Company sunga nasem lian zaw deuh sagih in teng za khat ciat ( each 100 lakh) piak dingin kamciam uh hi.

A kisam ding a a geel uh pen teng za guk hi a,  tua hunsungin teng za sagih (700 lakh) ngah tazen uh hi. Hih hunsungah Yangon Grace A.G panin Rev.David Go Lian Sum (a) David Sum mahmah tawh zong mapang khawm uh a, music tumte zong amau a teng mah zong kihel cih kiza hi.

Kawlpi a bawlna maan/Photo tawm hong khak ing.

Khazih itna sungah, Peter Khampu.
Kalaymyo