Haksat Hun Ciang Phawk Ding Thu ( 4 )
Leitung i nuntak sungin, haksatna ki phukha tawntung hi. Ze-etna zong ei tawh kituak in hong pai zel aa, ih lamet loh kal in buaina lian pipi ki nei kha zel a hih manin, “ Haksatna hun ciang aa phawk ding thu 4 te” cih kong gelh khia hi.
I. Pasian in eite aa dingin hong geel kholh sak hi.
Pasian in leitung le vantung bawl hi. A kampauna bek tawh aksi te piang khia ziahziah hi. A hi zongin, mihing te a bawl ding ciangin a khut mahmah tawh bawl in, a hu-muam aa, a nungta kha ki suak hi. Tua a hih manin Pasian in, “Keimah bek Pasian hing, a dang Pasian om lo hi…” (Isaiah 46:9) na ci tawntung hi.
Khang tangthu masa 28 na sungah, David Kumpipa in, Pasian biakbuk ding khat lam nuam in a vanteng a cing in koih khin hi. A hi zongin Pasian in David kiangah, nang pen galhat lua na hih manin, ka biakbuk ding nang na lam kei ding aa, na sung pan aa piang na tapa in lam ding hi ci hi. Tua ciangin David Kumpipa in zong a geelna sa om teng Pasian in a theih sak biakbuk tawh kisai teng a vekpi in Solomon tungah gen khia in lai tawh zong kiciamteh hi.
Tua mah bangin, mite nuntakna sungah ih phutkhak ding thute khempeuh zong Pasian in a geelsa vive hi aa, Pasian theih loh khat beek om lo hi. Ih nuntakna sungah ih phutkhak thute Pasian phalna om lo aa piang khat beek om lo hi. Tua a hih manin, thu khat peuh a pian’ laitak in zong eite in ih telpah loh hangin, a tawntung aa dingin Pasian in a hoih zaw aa hong geel sak hi gige hi.
Topa Jesu in John 16:13 na sungah, “thuman thutak Kha Siangtho hong tun’ ciangin, thuman thutak a vekpi in note hong hilh ding hi..” ci hi.
II. Pasian in hun saupi aadingin geel khol hi.
Mihingte in thu saupi ih geel theih loh hangin Pasian in, eite aa dingin hun saupi muhna tawh honggeel sak in tua tawh hong kalsuan pih tawntung a hihi. Khat veivei, haksatna ih tuah ciangin, lamdang sa in, bang hang in Pasian in hih bang kamsiatna le haksatna hong thuak sak a hi hiam? “Pasian aw, koi ah om na hiam? hong mu lo na hiam?” ci in Pasian ki mawh sak kha pahpah hi.
Khat vei, gamdang a painuam mi khat in, a pai theihna ding entry visa ngahlo a hih manin, hih bangin thuum hi.
• Pasian tungah, sehsuah le sumpi zongpia ing.
• Pasian nasemte tungah cit piakna zong pia ingh.
• Lai Siangtho sim in thu zong ka ngen hi.
• Mi dangte sangin ka siat zawkna bang hiam?
• Bang hang in Pasian in kei gamdang hong pai sak lel lo hiam?
Hih bang teng tawh Pasian tungah khasiatna kampau hi. Eite sep zawhna le sumpi piakte, thungetna te siksan in Pasian in na lamdang hong seem aa thupha hong pia ding hi le ih ngah ding thupha tam hetlo ding hi. Eite piak khiatna le Pasian huahna ki tehtheih ngei ding a hi hiam? Eite thungetna le Pasian hong hehpihna saikak theih peuh mah in om ding a hihiam? Ih tupna khat peuh tu mahmah in hong tangtun loh hangin, Pasian in hoihsalo zong hi thei ding hi. A hih kei le hun khat ciangin hong tangtung sak veve ding a hih manin, ngak zawh ding le Pasian geelna bang zuih theih ding kisam hi.
Mihing te in tu mahmah in hongpiang le cih ih ut laitak in, Pasian in mihingte aa dingin, a hoih pen in geel sak aa, ngak ding zong hong deih a hihna thu Piancil 37. sung aa Joseph tangthu ngaihsun pha leng:
• Joseph pen apa in it pha diak hi.
• A sanggam dangte neihloh puanhoih zaw khui sak
• Joseph in mang lam dang nih man hi.
• A sanggamte an puak dingin gam lak-ah pai hi.
• A sanggamte in “mangman’pa” ci in bawlsia uh hi.
• Dum sungah khia uh hi.
• Joseph puak an limcite ne uh hi.
• Ishmael sumbawlte kiangah zuak uh hi.
• Potiphar kiangah ki zuak sawn hi.
• Thu om lopi (mawh lopi) in thongkhiatna thuak hi.
• A thongkiat pihte mang khiat sak hi.
• Pharoah mang khiat sak leuleu hi.
• Egypt gam ah gam makai lian khat hong suak hi.
Hih Joseph tangthu ngaihsun leng, apa in ngeek bawl in anlim nono a piak hun, puanhoih zaw deuh khat a bawl sak hun, a u te in khel bawl in a puan suah sak in, dum sungah a khiat hun, a zuak hun khawng un, bang zah tak in khasia ding a hi hiam?
A hi zongin, gambuppi ah kial hong tungin, mi khempeuh an lei dingin, Egypt gam ah hong pai uh hi. Tua hun ciangin, amaute innkuan buppi a nuntak theihna dingun, Pasian in hun saupi geel khol-in, Joseph a puak khol a hihi.
Ih nuntakna sungah, khatveivei ih tel zawh loh thu khelkhel hong om ciangin, lungkham in cihna ding theilo aa ih om ciang nangawnin Pasian in hun saupi aa ding geelna khat na nei gige hi. Ih minam le pawlpite zong Pasian thupha hangin nidang zah sangin ki khangto zaw thamta a hih manin, a diakdiak in Yangon tung zo kitam ta hi. Yangon khua sungah mi tam mahmah aa, zuauthu gen, mikhem zong tam mahmah hi. Khat veivei khemna supna khawng na tuahkhak hun hong om ding hi. Eite ginat loh man aa, motor tung khawng ah sum mangsak cih bang ih hih kei nak le, lungsim cihtakna, na lawm na gualte aa dingin deih sakna tawh na vaihawmna pan in a kilawm hetlo thuakna khat peuh na neih khak le zong, Pasian in thei lau zen hi. Mai lam na kalsuanna aa dingin, thu hong sinsak hi gige aa tua pen sangkahna ah kisin kholla phutkhak ciang aa theih pilna pawl hi. Manpha veve hi. Hong tung lai ding hunte ah pilna tawh gamtat theihna ding, pilvang taka a om theihna ding a hihi. Pasian in eite aa dingin hun saupi hong geel sak in hong kalsuan pih hi.
Ih nuntakna sungah thu haksa ih phutkhak ciangin lungneu in, lungkia in ki om thei hi. David in zong, ama phutkhak thute haksa sa mahmah a hi hangin, (Ps.73:6-7) na sungah, Pasian biakinn pi sungah thu ka tel muh ciangin ka lungkim pah hi ci hi.
III. Pasian in ama tungah ki ngak ding hong deih hi.
Thu um mite nisim kalsuanna ah Pasian lamlahna ngak gige aa Pasian tungah kingak ding hong deih hi. Thu um mite Topa tungah kinga in, Topa muan’ding hong deih hi. Leitung mi ih hih manin, Topa kiangah ih gen sangin, ih kiang aa khat peuh kiangah gen pak leng kici zaw thei hi.
Hih Topa muang a, ama tungah kinga ding cih ciangin, sum le paai thu bek hi zenzen lo hi, vai khempeuh thu khempeuh a hihi. Khat veivei cimawh kisa lua in, Topa in hong huh nawnlo dinghi in teh cih zong ki ngaihsun kha thei hi. Lai Siangtho lui sungah, Kamsangpa Elijah zong, gualzo lua mahmah aa a om khit phet in, Kumpinu heh gawp aa Elijah nang hong that ning a cih le lau lua un gamla pi
mun dong va tai hi. Gim kisa lua in, Pasian tungah, Israel gamsungah kei bek om ingh, kei nangawn thah hong kisawm a hih manin kong tai hi. Hong sisak mai in ci hi. Topa in, Baal milim mai ah kunlo mi 7000 bang om lai hi ciah kik in, ci in sawl hi. Pasian tungah kingah in, na lunggim ciangin Topa in, nang bek hi zenzen kei teh na kikholhpih ding mi tampi om lai hi hong ciden ding hi.
IV. Pasian in nuntakna nop tak zat ding hong deih hi.
Ps. 127:1-2 na sungah, Topa in inn lam kei le, a lam mite nasepna a mawkna hi… Topa in khuapi hu kei le a cing mite cinna a mawkna hi..ci hi. Hih leitung ih nuntak sungin, buaina haksatna le lungkhamna zong thuak ding mah hi hang, A hi zongin ih thuakna le ih gimna tuat leng, ih thuak sung sangin ih thuak loh sung sau vei zaw veve lai ding hi.
Tua ahih manin thu khempeuh ah, thu um mite in a hoih lam vive aa san thei ding le leitung tom cik khat ih nuntak sung pen a nuam theithei aa zat ding Pasian hong deih sak hi.
Mite pen kisiam zo hetlo ciat a hih manin, innkuan sungah zong ki lemlohna thu sia pianna pen a bulkan khia leng thu neu mahmah khat peuh na hi zel hi. Innkuan sung, nupa kikal, pawlpi sung cih nangawn ah thuneu cik khat peuh in hong nuam sak lo thei hi.
A tawpna ah Pasian in, leitung ih nuntakna tomcik khat pen a nuam thei pen aa ih zat ding hong deih sak hi. A hau pen, a pil pen, a siam pen ih hih loh hangin, ei tawh kituak in nopsa in Pasian muanna tawh kalsuan thei leng a hampha hi lel ding hi hang.
Rev Gin Khen Mang
