Google leh Hostgator in Domain Name a Mawkna in India Business-te Pia

[David Lian]

Google India leh Hostgator India kipawl in India sumbawlna (business) te website a free in pia uhi.

A domain min uh .in extension hi ding hi.

Hih program pen  ‘India Get Your Business Online’ kici a, website, domain leh hosting a mawkna in kum khat sung sumbawlna neu leh lianlawlote (small medium businesses – SMBs) online a sumbawlna huhna leh panpihna ahihi

Free Domain Name Hosting to India SMBs

A tupna uh ahih leh, India SMB-te 500,000 peuhmah kum thum sung in a online ding uh deihna hi pen hi.

Zomite zong business leh sumbawlna tuamtuam nei tampi kiom in ahi zong in online presence nei ki om mello ahih manin deihsak huai mahmah uhi.

Kum khat sung website pan na van leh services tuamtuamte zuak in hoih na sak leh zoptoh suak theih a, na lunggulh kei leh tawp theih lel hi.

Tua bek hilo in website pen professional tak leh baih tak a bawl theihna hong kipia ding a, email address leh na website promote na ding free coupon Rs. 2500 INR man Adwords advertising zong hong ki pia ding hi.

A lamdang mahmah khat in India ah 8 million kiim SBM om a, tua sung pan 5% bek in website nei uhi!

Business na neih leh hih bang hamphatna tamlo ahihmanin hun om lai in apply pah in.  A apply nuamte in PAN card neih kisam hi.

A thu theihbehlap nuamte in http://www.indiagetonline.in/ pan na sim un!

 

Source: VaphualNet