UN ngah nailote' mailam ding leh vaipai zia ding kuppihna

UN card, Laidal ngah nailo, kipawlna card bek a tawite pen vai hong sah pian ding cih bel i theihsa ciat hi.
A thupi pen ah, UN a ngah nailote a ding in sep ding pawl khat keima mimal muhna hong hawmsawn nuam ingh.

1. UN ngah naillo khat in tu a kipan in Kawlgam pan hong tai khiatna leh, Gamsung ah, kumpi a kikhel khit hang in, ciah kik leh lauhuai mahmah ahih lam kician sinsen in lotngahsa in (a ni a kha a kipan) na kiging gige den hen.

2. Gam sung ah biakna vai leh minamneu khat ihihna hang in simmawhna leh balwsiatna pen a kithuak pen i heihsa ciat hi ta mah leh, tua register ding a lunggulh nu/ pa in ama buaina, a case or a tangthu pen Zogam sung hi hamtang ding hoih hi.

3. Operasi (Operation acih uh, bem te siansuahna) sung ah a i kihel loh na ding in vakna, omna leh thu leh la khat peuh ah pivang in, thu kan in, i om den ding thupi hi. Ahi zong in deih loh pen khat in UN Card nei nailo in ong kimat khak zenzen leh tua pen kamsiatna hi a, galtai tongsung ah galtai hihna (refugee hih tatakna, i tangthu leh gamsung ah ong kibawlsiatna) kician sinsen tak in gen theih ding kisam a, tuanu, tuapa in Refuge khat hih theih na ding ciangtanna thute (criteria or international protection) a kisap lam gen siang thei peuh leh, thong sung ah bang tan vei hiam khat a om ding in akiging sa in om ding kisam hi.

4. Thong sung ah a om sung in galtai hihna kician tak in a gen theih nak leh a hun khat ciang in UN te hong pai ding a, thu hong dong ding hi. Refugee tatak hi cih theih na ding a tangthu a neih leh min sanna hong la ding a, a sawt lualo in minsanna (registration) zong hong pialo ding kici theilo hi. Tua pen UN te i mandate ahi, "protection of the refugees" thu khunpi zui in a kalsuan ding ahih man in, i kamsiatna tawh hong kimatna pan in, kamphatna tawh UN ngah lawh na hong suak lel ding hi. Nidang lai bang mah in, UN ngah theih na ding in palikte kiang natawm ah kimat sak hun khong zong om kik lo ding kici thei tuan lo veve hi.

5. Tua ahih man in Malaysia a om Zomi gambel siau, minsanna a ngah nailo (register a ngah nailo) khat a ding in anne zo lo liang, ihmu zolo liang in lungkham ding hilo hi. Ahi zong in kidop siam veve ding zong Topa' deihna hi a, i kidop kawmkal ah tuahsiatna khat i neih leh tua pen Pasian' in i mailam a ding in geelna khat nei hi zaw kha dnig hi ci-in a kizo sa in i om ding thupi ding hi.

A kisamte kikum toto kawm in, zomto lai ni.

Note tawh i gam leh minam a ding in na mapanpih uh...

Views: 109