Van Leh Lei Piangsak Pasian

[Tg. Thangno]

Vaan leh lei piangsak Pasian,
Ni leh kha piangsak Pasian;
Ka nuntakna a hong bawl ka Pasian,
Ni taang leh guahtui hong pia,
Tuuk ciangin an hong la sak,
Na vangliatna kong phat hi ka Pasian.

Topa aw ka lungdam hi,
Nisim nong lungdamsak hi;
Ka hin lai teng na min ka phat den diing,
Tumging tawh nang kong phat ding,
Laamna toh nang kong phat ding,
Halleluiah ! na min thang den ta hen.

Khat vei vei neek ding neilo,
Khat vei vei silh ding neilo;
Ahihhang Topa’ hoihna ka phawk hi,
Van ah leeng vasate leh,
Gamlak unok paakte in,
Ka nunna nisim in tha hong dim zel.

Tuni in kei a ding in,
Hun hoih hun nuam hong kipia;
Topa’ tung lungdam ka ko ding hi,
Lungdam koh Biakna pia in,
Topa ka pahtawi diing hi,
Ka hatna teng tawh a min ka phat ding.